Մովսես Հակոբյանը պատասխանատվության կենթարկվի՞
Քաղաքականություն
Լեռնային Ղարաբաղի Ազգային ժողովի նախկին պատգամավոր Վահան Բադասյանը օրերս հրավիրվել էր Հայաստանի զինվորական քննչական վարչություն՝ հարցաքննության։ Բադասյանն ավելի վաղ հայտարարել էր, որ ՀՀ Զինված ուժերի գլխավոր շտաբի պետ, ՊԲ նախկին հրամանատար Մովսես Հակոբյանը՝ չարաշահելով իր պաշտոնական դիրքը և խախտելով գնումների մասին օրենքը, շուկայականից բարձր գներով իր ձեռնարկության և պաշտպանության նախարարության միջև կնքել է ցորենի գնման պայմանագիր, ինչի արդյունքում բանակից յուրացվել է մի քանի տասնյակ միլիոն դրամ։ Բադասյանը կարծում է, որ իր ներկայացրած փաստերը բավարար են, որպեսզի հարուցվի քրեական գործ։
Արցախում, սակայն թերահավատ են, որ պաշտոնյաները կարող են ենթարկվել պատասխանատվության։ Մեզ հետ զրույցում ազատամարտիկ Քերոբ Ղազարյանը, ով հիշեցնենք, Բերձորում հայտնի իրադարձությունների ժամանակ ծեծի էր ենթարկվել, ընդգծեց՝ Մովսես Հակոբյանը համակարգի մի մաս է և չի ենթարկվի պատասխանատվության.
«Չեմ կարծում, մեզ մոտ դա ընդունված չէ։ Գուցե ինչ որ բաներ պարզվեն, ինչ որ մարդիկ գուցե տուժեն, բայց ոչ պաշտոնայները։ Եթե գործից ազատվեն՝ կարող է և պատժվեն, բայց գործողները համակարգի անդամ են, այնպես որ թերահավատ եմ»։
Հաճախ է քննադատվում Մովսես Հակոբյանի նշանակումը Գլխավոր շտաբի պետի պաշտոնում, այն դեպքում, երբ քառօրյա պատերազմի ժամանակ ցցուն դարձած բացթողումները նաև նրա թերի գործունեության հետևանք էին։ Մեր զրուցակիցը նշեց՝ Հակոբյանն ունի իր առյուծի բաժինն այդ ամենում, բայց միակ պատասխանատուն չէ։
«Միայն Մովսես Հակոբյանի վրա բարդելը ճիշտ չեմ համարի։ 1994 թվականի պատերազմից մինչև քառօրյա պատերազմը 20 տարի է անցել, բա մնացած ժամանակում ի՞նչ է կատարվել, այդ ընթացքում ամբողջ ժամանակ միայն Մովսես Հակոբյանը չի պաշտոնավարել։ Հասկանալի է, որ Մովսես Հակոբյանը և՛ լավ, և՛ վատ իմաստով իր լուման է ունեցել այդ գործում, նա էլ իր առյուծի բաժինն ունի։ Ի վերջո բանակի մարտունակությունը ամենավերջին պատերազմի արդյունքներով են չափում։ Իսկ քառօրյա պատերազմից հետո՝ և՛ նյութական, և՛ տարածքային, և՛ մարդկային կորուստներ ունենք։ Իհարկե կային նաև քաղաքական հարցեր, որ թույլ չտվեցին մեր բանակը տարածքները հետ բերեր, իր անունն ու պատիվը վերականգներ։ Համենայնդեպս ունենք այն ինչ ունենք»,- եզրափակեց Քերոբ Ղազարյանը։
1
2
3
4
5
1
2
3
5
1
3
4
5
