«Բանակում չեմ ծառայել, բայց հիմա ես էլ պատրաստ եմ գնալ». Հայկ Աֆրիկյանը՝ դերասաններ Դավիթ Աֆրիկյանին ու Դավիթ Մարդյանին սահման ուղեկցելու և նրանց միանալու ցանկության մասին

Դերասաններ Դավիթ Աֆրիկյանն ու Դավիթ Մարդյանն այս օրերին Վարդենիսում են: Tert.am Life-ի հետ զրույցում Հայկն ասաց, որ եղբորն ու ընկերներին ինքն է սահման ուղեկեցել` որպես մեծ եղբայր, շատ այլ հայտնի մարդիկ կան, որոնց անունները չի ցանկանում ասել: Չեն սպասել որևէ ծանուցման, զինվորագրվել են ու մեկնել:

«Եղբայրս` Դավիթը, բանակ է զորակոչվել Թատրոնի և կինոյի պետական ինստիտուտն ավարտելուց հետո, ծառայությունն անցել է Մեղրու շրջանում: Ինքս բանակում չեմ ծառայել առողջական խնդիրների պատճառով, բայց հիմա ես էլ սպասողական վիճակի մեջ եմ, շուտով ես էլ նրանց կողքին կլինեմ: Պատերազմ է, բոլորս պետք է գնանք, կապ չունի, որ մի տնից երկու եղբայր ենք, ամեն հայ պետք է մտածի իր հայրենիքի մասին: Կոնկրետ ինձ համար սահման գնալը որոշում չէ, որովհետև ինքս ինձ հայրենասեր եմ համարում ու պատրաստակամ եմ ամեն պահի պաշտապանել հայրենիքս: Ուղղակի պետք է կայացնել որոշում և պայքարի գնալ: Երբ արթնանում է մարտական ոգին, բոլորս զինվոր ենք դառնում»,-ասաց նա:

Հայկի խոսքով` հիմա շատ առողջ է, տիրապետում է կարատեի, կրակել գիտի. «Ամեն ինչ հրահանգավորումներից է կախված: Կամավորնեն այնքան շատ են, որ ինձ հերթ դեռ չի հասել, բայց կհասնի: Անվտանգության նկատառումներից ելնելով` շատ մանրամասներ չեմ կարող ասել: Կասեմ, որ հաղթել ենք, հաղթելու ենք: Մենք քիչ չենք, բոլորն էլ պատրաստակամ են կռվել` ահել, թե ջահել»:

Դերասանը նաև ասաց, որ այս պատերազմը վերջին ակորդն է լինելու. «Տրամադրվածությունը շատ բարձր է, մարտական, ոգեշնչված: Բոլորն են այդ վիճակում, ոչ միայն ես: Տղաները չեն գնում պարտվելու կամ հենց այնպես, գնում են հաղթելու համար: Բոլորին կոչ եմ անում միանալ, քանի որ հայ ազգը երբեք չի կոտրվել ու չի կոտրվելու, պետք է բոլորս միասնական լինենք»:

Մարիամ Խաչատրյան