Պատերազմական շրջանում որոշ ապրանքատեսակների գնաճ է նկատվում

Պատերազմական շրջանում հայաստանյան շուկայում որոշ ապրանքատեսակների գնաճ է նկատվում։ Մասնավորապես, վերջին շրջանում ահազանգ կա, որ զինվորական համազգեստի գներն են էապես բարձրացրել։ Նաև ռազմաճակատ ուղարկվող այլ ապրանքների գնաճ կա։ «Մեր դիտարկումներով՝ զինվորական համազգեստի շուկայում  որոշակի գնաճ արձանագրել ենք։ Փոխկապակցված ապրանքների մասով ևս ունեցել ենք գնաճ»,- Lragir.am-ի հետ զրույցում ասաց  «Իրազեկ և պաշտպանված սպառող» ՀԿ նախագահ Բաբկեն Պիպոյանը։ Նա խնդրի լուծման համար կարևորում է կողմնորոշիչ գների սահմանումը պետական մարմինների կողմից։

«Այս իրավիճակում կանխարգելիչ միջոցառումներ պետք է իրականացվեն։ Իսկ կանխարգելիչ միջոցառումները միայն մրցակցային մարմնի սանկցիոն գործիքակազմերի հնարավոր կիրառումը չէ։ Էլ ավելի կարևոր է պատկան կառույցների կողմից  ուղղորդող գների սահմանումը։  Հայաստանում շատ ապրանքների կողմնորոշիչ գների մասով կան խնդիրներ։ Եվ հնարավորինս շատ պետք է իրազեկել հանրությանը, այսինքն՝ մենք տեղեկություն ենք տալիս, որ այս ապրանքը 10 հազար դրամ  արժե»,- ասաց Պիպոյանը։

Նա նշեց, որ իրենց ուսումնասիրություններին զուգահեռ նաև տեղեկություն եղավ, որ ՏՄՊՊՀ-ն ևս ուսումնասիրություններ է իրականացնում այս շուկայում։ «Իսկ թե պետական մարմնի կողմից դա արձանագրելուց հետո համապատասխան գործիքակազմ ու վարչարարություն կկիրառվի, թե ոչ, ցույց կտա ժամանակը։ Իսկ այն, որ դա անհրաժեշտ է՝ որպես կանխարգելիչ գործիք, փաստ է։ Ավելին, պետությունը հենց նման գործիքներ ստեղծել է՝ հաշվի առնելով, որ ինչ-որ պահի դրա անհրաժեշտությունը լինելու է։ Դա ինքնին ապացույց է, որ այդ գործիքը պետք է կիրառել»,- ասաց նա։

Ըստ մասնագետի՝ առաջին քայլով պետք է իրավակարգավորումները գործեն, մրցակցային մարմնի կողմից մեխանիզմները գործի դրվեն, երկրորդը՝ պետք է պրոպագանդա լինի, հանրությանը ճգրիտ թվեր ներկայացվեն՝ կողմնորոշիչ գներ։

«Օրինակ՝ տեղեկություն եղավ, որ պահանջարկով  պայմանավորված՝ կորոնավիրուսի թեստերի գինը այսուհետ կկազմի 15 հազար դրամ։ Դա որպես ձեռքբերում ենք ուզում դիտարկել, բայց եկեք հասկանանք, թե քանի՞ լաբորատորիա կար, որը մի քանի օր առաջ էլ 15 հազարով անում էր այդ թեստը։ Եվ մարդը, ով նախորդ գինը չգիտեր, չի կողմնորոշվում՝ դա լավ է, թե վատ։ Այսինքն՝ մենք այս դեպքում պետք է կարողանանք կողմոնորոշիչ գները տալ՝ հասկանալու համար շուկայում գները փոփոխովել են, թե չէ։ Դրան զուգահեռ պետք է հաշվի առնել, որ որոշ դեպքերում այնպիսի ապրանքային շուկաներում կարող են գրանցվել գների փոփոխություններ, որոնք չի բացառվում, որ լինեն տրամաբանորեն հիմնավորված»,- հավելեց Բաբկեն Պիպոյանը։