Եվրոպայում կա՞ մեկը, որը կարող է Էրդողանին պատասխան տալ

Ավստրիայի կանցլեր Սեբաստիան Կուրցն իր զորակցությունն է հայտնել Ֆրանսիայի նախագահ Էմանուել Մակրոնին, որի հասցեին վիրավորական արտահայտություն էր թույլ տվել Թուրքիայի նախագահ Էրդողանը: Թուրքիայի նախագահի հայտարարությունների անթույլատրելիության մասին էր խոսել նաեւ Եվրամիության անվտանգության հարցերի հանձնակատար Բորելը:

Եվրամիությանն ըստ ամենայնի շտապ անհրաժեշտ է արժանապատվության հարցերի մի հանձնակատար: Անհասկանալի է, թե ինչով է զբաղվում Եվրամիության անվտանգության հարցերի հանձնակատարը: Եվրամիության անվտանգությունն ապահովում է ՆԱՏՕ-ն: Չկա ՆԱՏՕ, չկա անվտանգություն: Ինչի՞ համար է անվտանգության հարցերի հանձնակատարի պաշտոնը: Թեեւ, այդ հարցն իհարկե պետք է որոշեն եվրոպական հարկատուները: Նրանք պետք է որոշեն, ընդհանրապես, ինչի համար են պահում իրենց կառավարություններին, որոնք ի վիճակի չեն համարժեք տեղը դնել մի խուլիգանի, որը կարող է բացահայտորեն ոտնահարել մարդկային հարաբերության ու քաղաքակրթության բոլոր նորմերը:

Ինչի՞ համար են վճարում եվրոպական հարկատուները, եթե ոչ առաջին հերթին՝ արժանապատվության: Եթե եվրոպական էլիտաները չեն կարողանում ապահովել եվրոպացու արժանապատվությունը, օրինակ Էրդողանից, ապա ո՞րն է այլեւս նրանց բյուրոկրատական գոյության իմաստը, որ եվրոպացու համար արժենում է տարեկան միլիարդավոր դոլարներ:

Ավստրիայի կանցլեր Կուրցը արել է իսկապես համարձակ քայլ, զորակցելով Ֆրանսիայի նախագահ Մակրոնին: Հաջորդ անգամ Էրդողանն ըստ երեւույթին Մակրոնից բացի իր ասելիքը կասի նաեւ Կուրցին: Հետո անշուշտ Եվրոպայում կգտնվի մեկը, որը կզորակցի Կուրցին, կամ Մակրոնին ու Կուրցին: Այդպես, եվրոպական էլիտան շղթայաբար կզորակցի զմիմեանս, իսկ Էրդողանը շղթայաբար իր ասելիքն ու անելիքը կանի նրանց բոլորի հանդեպ, շղթայաբար:

Իսկ զորակցելուց բացի, Եվրոպայում կա՞ մեկը, որը կարող է Էրդողանին տալ պատասխան, երբ խուլիգանն Անկարայից հաջորդ անգամ երկար կմտածի, մինչ բերանը բացելը կամ որեւէ բան անելը:

Չկա, մի ամբողջ Եվրոպայում չկա էլիտա, որն ունակ է համարժեք պատասխանել Էրդողանին եւ զսպել նրան:

ՌԴ նախագահ Պուտինը 20-րդ դարի աշխարհաքաղաքական ողբերգություն էր համարել ԽՍՀՄ փլուզումը: 21-րդ դարը մեկնարկել է համեմատաբար նոր, չի անցել դեռ քառորդը, բայց արդեն իսկ կա 21-ր դարի աշխարհաքաղաքական ողբերգությունը՝ եվրոպական արժանապատվության հիմնահատակ ավերումը, որի համար, ի դեպ, դեռ վճարում են Էրդողանին՝ որ նա չսպառնա միգրանտներով: Դա իսկապես աղետ է, քաղաքակրթական աղետ: