Հայկական ահաբեկիչների «գողական պանյատները»

shame.am-ը գրում է․

Լոս Անջելես-Մոսկվա ուղղությամբ թռիչք իրականացնող ինքնաթիռն այսօր արտակարգ վայրէջք է կատարել Կանադայում՝ ուղեւորներից մեկի ոչ ադեկվատ պահվածքի պատճառով: Պարզվել է, որ միջին տարիքի հայ տղամարդը թռիչքի ժամանակ սկսել է գոռգոռալ, սպառնալ, որ ահաբեկիչ է: Ինքնաթիռի անձնակազմը, հասկանալով, որ վերջինս արդեն վտանգավոր է, նրան կապել է նստարանին, ապա հարկադրված վայրէջք են կատարել Կանադայի Բաֆֆին կղզու վրա գտնվող Իքալուիթ քաղաքի օդանավակայանում, որտեղ նրան ոստիկանությունը բերման է ենթարկել հենց ինքնաթիռից: Հասկանալի է, որ հայի մոտ վտանգավոր որևէ բան չեն գտել: Ըստ ականատեսների` նրա «ահաբեկչությունը» սահմանափակվել էր «գողական պանյատներով»:

Այս դեպքը հիշեցնել տվեց օրեր առաջ տեղի ունեցած մեկ այլ միջադեպ, երբ Մինսկից Կիև ուղորվող ինքնաթիռը ետ ուղարկվեց Ուկրաինայի Անվտանգության ծառայության պահանջով, իսկ ինքնաթիռի վերադարձից հետո իրավապահ մարմինների ներկայացուցիչներն ինքնաթիռից Հայաստանի քաղաքացու իջեցրին: Հետո կրկին պարզվեց, որ հայը մեղքի բաժին չունի, ու նրա «ահաբեկչությունն» էլ լիովին տեղավորվում էր «чужой похмел» հասկացության շրջանակնեերում:

Եթե այդ դեպքերը դիտարկելու լինենք ազգային սնապարծության դիրքերից, ապա մենք դեռ հուսադրող նախադրյալներ չունենք: Մեր ահաբեկիչների մոտ աճ չի նշմարվում, չկան քաղաքական, կրոնական, ազգամիջյան շարժառիթներ, իսկ դա որակազրկում է երևույթը: Առայժմ մենք աշխարհին հայտնի ենք միայն «գողական պանյատներով» ահաբեկչական միջադեպերի հարթության վրա, ինչը վարկանիշային աղյուսակի ամեենաստորին հորիզոնականներում է: