Կրծքի չափսն ու աչքերի գույնը տարբերակիչ հատկանիշներ են, ոչ թե՝ սեքսուալության ցուցանիշ. գրավչության 5 կանոն (photo)

Յուրաքանչյուր կնոջը հատուկ է կանացի գրավչությունը, որը չի սահմանափակվում միայն արտաքին տվյալներով: Կնոջ գրավչությունը ենթադրում է ավելի շատ կանացիություն, քան գեղեցկություն:

Tert.am Life-ը մոդել Լյուսի Հայրապետյանի հետ զրուցել է կանացի գրավչության մասին՝ փորձելով բացահայտել դրա գաղտնիքները:

«Գրավչություն, սեր, կիրք, կարոտ... Սրանք այն տարածություններն են, որոնք, ըստ իս, սահմաններ չեն ճանաչում։ Դեռ մանկուց լինելով կարգազանց՝ չեմ ընդունում կանոնների առկայության փաստը ոչ մի հարցում: Թվում է, թե հեշտ է պատասխանել «Որո՞նք են գրավչության 5 կանոնները» հարցին, հավատացե՛ք, հեշտ չէ: Կարող եմ թվել գրավչությանը նպաստող 5 հատկանիշ կանանց համար, որոնք իմ կարծիքով ամենացայտունն են: Կուզենամ, անպայման, նշել, որ կրծքերի չափսն ու աչքերի գույնն ինձ համար ուղղակի տարբերակիչ հատկանիշներն են, և, ըստ իս, դրանք ոչ մի ընդհանուր բան չունեն սեքսուալության և գրավչության հետ, որովհետև վերոնշյալ էներգիան պետք է ներսից գա»,- նշեց Լյուսին՝ դիտարկելով գրավչությանը նպաստող 5 հատկանիշներ.

1. Ամենաառաջնայինն եմ համարում կանանց բնական և պարզ լինելը՝ առանց կոմպլեքսների և ձևականությունների։ Բնական ասելով ի նկատի ունեմ թե՛ մինիմալ դիմահարդարումը և թե՛ հոգու անկեղծությունը։

2. Կանանց մեծ մասը փորձում է լինել տղամարդկանց համար ամեն ինչ՝ ընկեր, սիրուհի, գործընկեր, մայրիկ... Պետք չէ (ժպտում է): Իհարկե, լինում են պահեր, երբ պետք է լինես լավ խորհրդատու՝ ըմբռնող և վստահելի, բայց չի կարելի հատել սահմանը։ Կինը պետք է հիշի, որ թվարկվածներից ամենակարևորը նրա համար սիրուհու դերն է: Չափազանց հոգատարությունը տանում է դեպի մոր դերը (իսկ մայրը լինում է միակն ու անկրկնելին)։ Պետք է համակերպվել 2-րդ, բայց ուրույն դերի հետ: Այլապես տղամարդը կսկսի խեղդվել և փնտրել իրեն նոր կին, ով կլինի բավականաչափ թույլ, երբ կթողնի տղամարդուն հոգ տանել իր մասին:

3. Վերջերս ավելի հաճախ եմ նկատում «որսորդ կանանց» սրճարաններում և ակումբներում։ Գտնում եմ, որ կանանց դերը պետք է լինի ճիշտ հակառակը՝ «ցանկալի որս» («желанная добыча»): Ես այդ հարցում, թերևս, չեմ փոխի կարծիքս: Առաջին քայլը պետք է լինի տղամարդունը. հետո ի՞նչ, որ 21-րդ դարում ենք ապրում: Եղի՛ր կին, և թող տղամարդուն լինել տղամարդ: Երբ հանդիպում ես երազանքներիդ տղամարդուն, մի՛ խառնվիր իրար և մի՛ «կախվիր նրա վզից»: Հիշի՛ր, որ որսի գնալը դեռ հնուց եղել է արական սեռի մենաշնորհը: Եվ ինչքան անհասանելի լինի «որսը», այնքան ցանկալի կլինի նրան հասնելը: Պետք չէ շփոթել կանացի և տղամարդկային դերերը միմյանց հետ։

4. Կինն, անպայման, պետք է իմանա իր արժեքը և չշռայլի իրեն։ Յուրաքանչյուր տղամարդու հետ պետք է պահես քեզ այնպես, կարծես դու ամենալավն ու ամենալավին արժանին ես, և նա կսկսի հավատալ դրան: Մատուցելու ձևը շատ կարևոր է։ Իհարկե, այս ամենը ոչ մի դեպքում չպիտի փոխակերպվի գռեհկության, կոպտության, գոռոզության, այլ պետք է ընդամենը լինել վստահ։ Երբեք չանես նման արտահայտություններ, ինչպիսիք են. «Մի տեսակ անորակ մազեր ունեմ, տեսքս հոգնած է...», որովհետև նույնիսկ, եթե այդպես չլինի, դու ուշադրությունը ակամայից կշեղես նշված «թերություններիդ» վրա, և այդպես էլ կընկալվես հակառակ սեռի կողմից։ Դրա փոխարեն փորձի՛ր շեշտել առավելություններդ:

5. Վերջում կուզենամ նշել մի կարևոր հատկանիշ։ Եթե ուզում ես լինել միշտ ցանկալի տղամարդուդ համար, մի կողմ դիր փնթփնթալն ու բողոքելը, աշխատավայրում ունեցած անհաջողություններն ու տխուր թեմաների քննարկումները, թափթփված մազերն ու հագուկապը, առօրյա ներքնազգեստն ու անխնա տեսքը:Մենք բոլորս էլ սիրում ենք տոներ, տղամարդիկ էլ բալիկների պես էլ ավելի են սիրում դրանք: Դու պետք է լինես թարմ խելառ քամի սիրելիիդ համար, որ նա երբեք չհագենա քեզ շնչելուց: Խանդի տեսարաններ, կասկածներ, հեռախոսազանգերի ստուգումներ, հետևել... այս ամենը տղամարդուն կորցնելու ամենաարագ ճանապարհներն են: Ինչպես բոլորս այնպես էլ տղամարդիկ սիրում են հարմարավետություն և ուրախ մթնոլորտ, ուրեմն մեզ՝ կանանց, պետք է լինել նաև խելամիտ, բացի գեղեցիկ և խնամված լինելուց: