Մոսկվան ու Անկարան «անջատեցին» Ղարաբաղը․ ինչ է կատարվում նրանց միջև
Աշխարհ
Նոյեմբերի 13-ին ռուսական պատվիրակությունը կայցելի Թուրքիա՝ քննարկելու համար Լեռնային Ղարաբաղում համատեղ դիտորդական կենտրոնի ստեղծման հարցը, Բաքվում կայացած մամուլի ասուլիսում հայտարարել է Թուրքիայի ԱԳ նախարար Մեւլյութ Չավուշօղլուն, փոխանցում է ՏԱՍՍ-ը։ «Մենք նշանակալի ենք համարում Լեռնային Ղարաբաղի վերաբերյալ Ռուսաստանի դիրքորոշումը։ Ուրբաթ Թուրքիա կժամանի Ռուսաստանից պատվիրակություն՝ քննարկելու համար Ղարաբաղում համատեղ դիտորդական կենտրոնի ստեղծման մանրամասները», ասել է Թուրքիայի ԱԳՆ ղեկավարը։
Թուրքիայի ազգային պաշտպանության նախարար Հուլուսի Աքարն իր հերթին նշել է, որ նոյեմբերի 13-ին «ընդլայնված պատվիրակություն կժամանի Ռուսաստանից: Կքննարկվեն մարտավարական եւ տեխնիկական հարցեր այն մասին, թե ով որտեղ կտեղակայվի եւ ով ինչով կզբաղվի »,- ասել է նա: Բացի այդ, Աքարը նշել է, որ «Թուրքիան գտնվում է կարգավորման կենտրոնում: Մենք եւ՛ բանակցությունների սեղանի շուրջ ենք, եւ՛ «գետնի վրա»: Ոչ մի «կատարված փաստի» մասին խոսք չկա»:
Եռակողմ հայտարարությունից հետո Թուրքիայի ու Ռուսաստանի պաշտոնատարները յուրօրինակ «լեզվակռվի» մեջ են։ Թուրքերը պարբերաբար խոսում են Լեռնային Ղարաբաղում ռուս-թուրքական համատեղ կենտրոնի ստեղծման եւ թուրք խաղաղապահների ներկայության մասին, Ռուսաստանը պարբերաբար հերքում է եւ նշում, որ ռուս խաղաղապահները տեղակայվելու են Ղարաբաղում, համատեղ դիտորդական կենտրոնը՝ «Ադրբեջանի բուն տարածքում», իսկ թուրք խաղաղապահներ չեն լինելու։
Ընդ որում, այս լեզվակռիվը տեղի է ունենում օրը մի քանի անգամ։ Թուրքիայի պաշտպանության նախարարը հանդիպման նախօրեին հայտարարում է, որ ոչ մի կատարված փաստ չկա, այսինքն՝ հարցը բաց է մնում, թե ով որտեղ է տեղակայվելու։ Խնդրին անդրադարձել է նաեւ Թուրքիայի նախագահի գրասենյակը, հայտարարելով, որ կենտրոնը տեղակայվելու է Ադրբեջանի գրաված տարածքում։ Ի պատասխան Կրեմլի խոսնակն ասել է, որ դա չի համապապատասխանում իրենց ընկալումներին, եւ որ կենտրոնը պետք է տեղակայվի Ադրբեջանի բուն տարածքում։
Ակնհայտ է, որ Բաքուն ու Անկարան Ռուսաստանին «ներս են թողել» Շուշիի վերաբերյալ գործարքից հետո եւ հիմա խաղում են նրա հետ։ Թուրքերն ակնհայտորեն ցանկանում են պոկել ավելին, հնարավոր է՝ նույն այդ համատեղ կենտրոնը հենց Շուշիում կամ Ղարաբաղի մի որեւէ այլ մասում տեղակայելու համար։ Առավել եւս, որ ըստ Պեսկովի՝ եռակողմ հայտարարության մեջ կենտրոնի տեղակայման վայրի մասին ոչինչ ասված չէ եւ դա առանձին պայմանավորվածության առարկա է։
Հետաքրքիր է, որ այս վեճում թուրքերն էլ, ռուսներն էլ Ադրբեջանից «անջատում» են Ղարաբաղը։ Ամեն դեպքում, վաղն այդ հարցը կպարզվի, որից էլ պարզ կդառնան Ղարաբաղի օկուպացիայի ռազմավարության հիմնական տարրերը։ Այսօր հայտարարվեց, որ ռուս խաղաղապահները մտել են Ստեփանակերտ։
1
2
3
4
5
1
2
4
1
2
3
5
