«Գուդվին»-ի աշխատակցին դաժանորեն սպանած 33-ամյա երիտասարդը հրաժարվում է հանրային պաշտպանից

Շենգավիթ վարչական շրջանի ընդհանուր իրավասության դատարանում Կարեն Մարդանյանի նախագահությամբ սկսվեց Կարեն Շահինյանի գործի դատական քննությունը:

33-ամյա Կարեն Շահինյանը մեղադրվում է շահադիտական դրդումներով կատարած սպանության համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով:

Ըստ մեղադրանքի՝ Շահինյանը 2015 թվականի դեկտեմբերի լույս 24-ի գիշերը՝ ժամը 1-ից 2-ի սահմաններում, գտնվել է Երևանի Մայիսի 9-ի փողոցի 49 հասցեում գործող «Գուդվին Բետ» բուքմեյքերական գրասենյակում:

Նա խաղադրույքներ է կատարել, պարտվել է, ապա շահադիտական դրդումներով՝ գրասենյակի չհրկիզվող պահարանից գումար հափշտակելու նպատակով կտրող-ծակող գործիքով մոտ 10 հարված է հասցրել գրասենյակի 28-ամյա աշխատակից Արթուր Նազարյանի մարմնի տարբեր մասերին՝ պարանոցին, կրծքավանդակին, որովայնին, սպանել է նրան և գումարը հափշտակելով՝ դիմել է փախուստի:

Կարեն Շահինյանի նկատմամբ հայտարարվել էր միջպետական հետախուզում: Նա հայտնաբերվել է 2016 թվականի փետրվարի 18-ին ՌԴ Օրենբուրգի մարզի Բուզուլուկ քաղաքում: Տեղափոխվել է Հայաստան:

Կարեն Շահինյանը դատարանին ներկայացրեց ամուսնության վկայականի ու երկու երեխաների ծննդյան վկայականների պատճենները, դրանք կցվեցին գործին:

Առողջական վիճակի վերաբերյալ նախագահողի հարցին ամբաստանյալ Կարեն Շահինյանը պատասխանեց. «Նորմալ է»: Նա հայտնեց, որ նախկինում դատված է եղել:

Կարեն Շահինյանը 2010 թվականին 5 տարի 6 ամիս ազատազրկման էր դատապարտվել թմրամիջոցների շրջանառության հետ կապված հանցավոր արարքների համար: Պատժից նա ազատվել է 2014 թվականի ապրիլին:

Նախաքննության ընթացքում Կարեն Շահինյանը հրաժարվել էր պաշտպան ունենալու իրավունքն իրացնելուց:

Նախագահողի հարցին՝ չի՞ ցանկանում, արդյոք, պաշտպան ունենալ դատական քննության ընթացքում, ամբաստանյալը պատասխանեց. «Ներկա պահին չեմ ցանկանում, հենց որ ցանկանամ՝ կասեմ»:

Այնուհետև նա պարզաբանեց. «Չեմ ուզում հանրային պաշտպան ունենալ: Մենք պաշտպան ունենք՝ ուրիշ գործով ՝ մեր ընկերոջ գործով է զբաղված, մոտ մեկ ամսից կվերջացնի, կգա իմ գործով կմասնակցի… Պաշտպան չուզենալս, այո, կապված է նյութական վիճակիս հետ, բայց ինձ հանրային պաշտպան պետք չի…»:

Դատական նիստին չէին ներկայացել տուժողի իրավահաջորդն ու տուժողի ներկայացուցիչը, ինչպես նաև վկաները:

Դատական նիստը հետաձգվեց բավական երկար ժամանակով՝ մինչև 2017 թվականի հունվարի 17-ը: