Ալիեւի փեսան

Նոյեմբերի 30-ը կարելի է Ալիեւի կյանքում խորհրդանշական օր համարել: Նրա նախկին փեսային՝ ռուսական շոուի բիզնեսի հայտնի դեմք Էմին Աղալարովի, նախաձեռնությամբ եւ բարձր հովանու ներքո Բաքվում հյուրախաղային համերգ է տվել հանրահայտ Սոսո Պավլիաշվիլին: Ինտրիգն այն է, որ Պավլիաշվիլին, որպես «օկուպացված տարածքներ ապօրինաբար այցելած» անձ, վաղուց ընդգրկված է Ադրբեջանի ԱԳՆ «սեւ ցուցակում»:

Պավլիաշվիլիի համերգը Բաքվում կազմակերպելու շուրջ խոսակցություններն ադրբեջանական մամուլ էին սպրդել դեռեւս անցյալ տարի: Ալիեւյան քարոզչամեքենան, ընդսմին, մի քանի անհաջող փորձ էր ձեռնարկել, որպեսզի երգիչը «ներողություն խնդրի Ադրբեջանի ինքնիշխանությունը ոտնահարելու համար», սակայն Պավլիաշվիլին մնացել էր անդրդվելի: Պաշտոնական Բաքուն երգչից նաեւ Ադրբեջան այցելելու հատուկ խնդրագիր չի ստացել:

Եւ այս ֆոնին հանկարծ հայտնի է դառնում, որ նոյեմբերի 30-ի համերգը տեղի է ունենում Հեյդար Ալիեւի անվան մարզամշակութային կենտրոնում, իսկ Ալիեւի նախկին փեսան հայտարարում է, որ Պավլիաշվիլին Բաքու է հրավիրել իր նախաձեռնությամբ, իսկ «համերգը խանգարելու փորձերը ստորություն են եւ ծառայում են արվեստը քաղաքականացնելուն»: Էմին Աղալարովն, ինչ խոսք, բացարձակ ճշմարտությունն է ասել: Բայց եթե փորձենք վերծանել, ապա կստացվի, որ նա ստորություն է համարում Ադրբեջանի իշխանությունների եւ անձամբ նախկին աներոջ վարքը: Չէ՞ որ Պավլիաշվիլիից բացի Ադրբեջանի ԱԳՆ «սու ցուցակում» ընդգրկված են գրականության, արվեստի, մշակույթի, շոու-բիզնեսի, մարզաշխարհի գուցե թե հարյուրավոր ներկայացուցիչներ, ովքեր այցելել են Արցախ եւ որեւէ քաղաքական նպատակ չեն հետապնդել:

Ինչպե՞ս կարձագանքի Ալիեւը նախկին փեսայի չափազանց կոշտ բնութագրմանը՝ նրանց ընտանեկան խնդիրն է: Փաստն այն է, որ ադրբեջանական մամուլը նոյեմբերի 30-ի երեկոյան տեղեկություն է տարածել, որ Սոսո Պավլիաշվիլիի համերգը կես ժամով հետաձգվել է, իսկ Հեյդար Ալիեւի անվան կենտրոնի շրջակայքում բազմահազարանոց ամբոխ է կուտակվել: Հայտնի չէ՝ նրանք երգչի երկրպագունե՞րն են, թե հավաքվել են, որպեսզի այդ համերգի դեմ իրենց բողո՞քն արտահայտեն:

Բայց Ալիեւն իր դերի մեջ կլիներ, եթե վերջին պահին համերգը «տեխնիկական պատճառներով» չեղյալ հայտարարվեր: Ըստ ադրբեջանական մամուլի, Պավլիաշվիլին իր համերգին հրավիրել է նաեւ Վախթանգ Կիկաբիձեին:

Վահրամ Աթանեսյան, «Հրապարակ»