Համաշխարհային, համահայաստանյան, այժմ արդեն՝ համահայկական նվագախումբ

Օրերս մշակույթի նախարար Արմեն Ամիրյանը, ՀՀ նախագահին զեկուցելով նախարարության գերակա ուղղությունների մասին, նաև առաջարկել է ստեղծել համահայկական սիմֆոնիկ նվագախումբ, որի կազմում կընդգրկվեն աշխարհի տարբեր ծայրերում հանդես եկող տաղանդավոր հայերը: Գաղափարը հավանության է արժանացել նախագահի կողմից։ Հանրապետությունում նման մեգանախագիծ վերջերս արդեն կայացել էր՝ «Անկախության սերունդ» համահայաստանյան երգչախումբ-նվագախումբ։

Հասարակությանը հայտնի է, որ այս նախագիծը դիրիժոր Սերգեյ Սմբատյանը վաղուց է նախապատրաստում և քննարկում տարբեր երաժիշտների հետ։ Մեզ հետ զրույցում Սերգեյ Սմբատյանը նշեց, որ արդեն իսկ երկու տարի նա աշխատում է ամբողջ աշխարհի հայ երաժիշտներին համախմբող այս նախագծի իրականացման համար: Աշխարհի լավագույն նվագախմբերում գործող հայ երաժիշտների համար դա արդեն վաղուց սպասված է:

«Գաղափարի ամենակարևոր առաքելությունն է աշխարհին ներկայացնել հայ ազգի ներուժը՝ միավորելով աշխարհով սփռված հայ տաղանդներին մեկ բեմում»,- ասաց Սմբատյանը: Մշակույթի ոլորտում ցանկացած նոր ու հեռահար նպատակներ ունեցող ծրագիր ողջունելի է։ Ուրախալի է, որ մշակույթի նախարարը երկրի ղեկավարի մոտ հանդես է եկել նման առաջարկությամբ։