Ինտենսիվ խախտումներ շփման գծում. ինչպիսի՞ն է իրավիճակը այժմ․ մեկնաբանում է ղարաբաղցի պաշտոնյան

Դեկտեմբերի 1-ի լույս 2-ի գիշերը ղարաբաղա-ադրբեջանական հակամարտ զորքերի շփման գծի գրեթե բոլոր ուղղություններով հակառակորդը շարունակել է խախտել հրադադարի պահպանման ռեժիմը: Առավել ինտենսիվ խախտումներ են արձանագրվել առաջնագծի արևելյան հատվածում, որտեղ, բացի տարբեր տրամաչափի հրաձգային զինատեսակներից /շուրջ 1400 կրակոց/ հակառակորդը կիրառել է նաև 60 և 82 մմ-ոց ականանետեր /9 արկ/ և հաստոցավոր ավտոմատ նռնականետ /1 արկ/: Ընդհանուր առմամբ, նշված ժամանակահատվածում, ադրբեջանական կողմը հրադադարի պահպանման ռեժիմը խախտել է մոտ 125 անգամ` հայկական դիրքերի ուղղությամբ արձակելով ավելի քան 2000 կրակոց:

Հրադադարի ռեժիմի խախտման արդյունքում հայկական կողմը կորուստ չի ունեցել:

Ինչ վերաբերում է երեկ երեկոյան ադրբեջանական որոշ լրատվամիջոցների կողմից տարածված այն լուրերին, թե իբր ղարաբաղա-ադրբեջանական սահմանի արևելյան ուղղությամբ տեղի ունեցած «դաժան մարտերի ընթացքում» հայկական կողմը տվել է 1 զոհ և 9 վիրավոր, ոչ այլ ինչ է, քան հերթական ապատեղեկատվություն:

ՊԲ առաջապահ ուժերը, ինչպես երեկ` ողջ օրվա ընթացքում, այնպես էլ անցած գիշեր շարունակել են վստահորեն իրականացնել իրենց առջև դրված մարտական խնդիրը և անհրաժեշտության դեպքում հակառակորդին տվել համարժեք պատասխան:

Այս պահի դրությամբ իրավիճակը հանգիստ է:

ԼՂՀ ՊՆ մամուլի ծառայություն

Այս պահի դրությամբ ղարաբաղա-ադրբեջանական հակամարտ զորքերի շփման գծում իրավիճակը համեմատաբար կայուն է. Այս մասին 168.am-ի հետ զրույցում հայտարարեց ԼՂՀ նախագահի մամուլի խոսնակ Դավիթ Բաբայանը։

Դ. Բաբայանի խոսքով՝ իրավիճակը որևէ ձևով չի տարբերվում առօրյայից. «Այն է, ինչ կա, որևէ արտառոց զարգացում տեղի չի ունեցել, չի ունենում, նույն հակառակորդն է, նույն ձևով խախտում է զինադադարի ռեժիմը, բայց սա արտառոց չէ, կամ առավել ևս՝ տագնապալի չէ: Այսինքն՝ այն է, ինչ միշտ կա։ Նրանք նման քայլերի միշտ դիմում էին, դժբախտաբար դիմելու են, որովհետև իրենց էությունն է, բայց ասել, որ սա արտառոց է, ու նման բան երբևիցե չի եղել, դա ճիշտ չէ, նման առօրյա է, ինչն ամեն օր է տեղի ունենում»։

ՀՀ պաշտպանության նախարարության մամուլի խոսնակ Արծրուն Հովհաննիսյան էլ հայտնեց, որ նոր վիրավորներ չկան, իսկ երկու օր առաջ 2 վիրավորվածների վիճակը մնում է կայուն։