Մանրամասներ «Բոգո»-ի ձերբակալությունից

«Փաստինֆո»-ի տեղեկություններով՝ քրեական շրջանակներում հայտնի «Բոգո» մականվամբ Ռուբեն Կոստանյանի ձերբակալությունը կապված է «Ֆեռո» ընկերության նախկին սեփականատեր Ռոբերտ Ավետիսյանի հետ ունեցած գումարային վեճի հետ։ Վերջինս պարտք է ունեցել Ռուբեն Կոստանյանին՝ 10 մլն դրամի չափով, և «Բոգո»-ն որոշել է պարտքերը հետ ստանալ իր ձևով:
Ինչ իմանար «Բոգո»-ն, որ իր կատարած արարքը գուցե քրեական կամ կենցաղային մակարդակում ընդունվեր սովորական, պարտքով գումար է տվել, հիմա էլ պահանջում է կամ փորձում է այլ ճանապարհով ստանալ, սակայն նրա արարքի իրավական գնահատականը այլ է՝ իր ենթադրյալ իրավունքների ինքնակամ իրացում:
Հենց այդ կասկածանքով է նա ձերբակալվել։
Ըստ մեր տեղեկությունների՝ այս պատմությունը նախաբան ունի. «Բոգո»-ն բիզնես ծրագրի համար «Ֆեռո» ընկերության նախկին սեփականատիրոջը՝ Ռոբերտ Ավետիսյանին, շուրջ 15 մլն պարտքով գումար է տվել, որից 5 մլն դրամը վերադարձվել է, իսկ 10-ը չի կարողացել։ Եվ հենց այդ գումարի պահանջի վերաբերյալ նրանք դեռևս այս տարի ամռանը՝ հուլիսի 20-ին, հանդիպել են «555» Հացատանը:
Պարտատիրոջ ու պարտապանի միջև խոսակցությունը չի ստացվել, վիճաբանությանը հաջորդել է ծեծկռտուքն ու հնչել են կրակոցներ:

«Բոգո»-ն ոտքի շրջանում հրազենային վիրավորում է ստացել ու պոլիտրավմա աշխտորոշմամբ տեղափոխվել «Աստղիկ» ԲԿ:
Այս կրակոցների դեպքի առթիվ հարուցված քրեական գործով «Բոգո»-ն տուժող է ճանաչվել, իսկ «Ֆեռո» ընկերության նախկին սեփականատեր Ռոբերտ Ավետիսյանին մեղադրանք է առաջադրվել սպանության փորձի հատկանիշներով:
Այդ օրը Ռոբերտ Ավետիսյանը ևս հրազենային վիրավորում է ստացել՝ աջ և ձախ ազդրի, ինչպես նաև՝ սրունքի շրջանում: Վերջինս ամիսներ շարունակ կալանքի տակ է մնացել եւ միայն վերջերս ազատ արձակվել։
Այսօր գործը կտրուկ այլ շրջադարձ է ունեցել։
«Փաստինֆո»-ի տեղեկություններով՝ ենթադրյալ իրավունքների ինքնակամ իրացման կասկածանքով բացի Ռուբեն Կոստանյանից, ով ԱԺ պատգամավոր սամվել Ալեսքանյանի մտերիմներից է, ձերբակալվել են ևս երկուսը։