Հուշարձանը պղծելու մասին. Չեմ բացառում նաեւ այն ուժերին, որոնք փորձում են հայերին հակասեմական ներկայացնել

Քաղաքագետ Մենդել Կորսունսկին զրուցել է Իսրայելում գտնվող «Նոյյան տապան» հայկական մշակութային կենտրոնի նախագահ Դավիթ Գալֆյանի հետ` կապված Երեւանում Հայոց ցեղասպանության եւ Հոլոքոստի զոհերի հուշարձանի պղծման հետ:

Նախորդ օրը տեղեկատվություն էր հրապարակվել այն մասին, որ Երեւանի կենտրոնում պղծվել է Հայոց ցեղասպանության եւ Հոլոքոստի զոհերի հուշարձանը, ի՞նչպիսին է ձեր դիրքորոշումը այս միջադեպի կապակցությամբ:

Դե, ի՞նչ դիրքորոշում կարող է լինել վանդալիզմի ակտի հանդեպ: Բնականաբար՝ բացասական: Չէ որ, պղծվել է 20-րդ դարի երկու ամենասարսափելի հանցագործությունների հետեւանքով զոհված երկու ժողովուրդների զոհերի հիշատակը: Դա սարսափելի է, որ նման ստոր քայլեր են կատարվում: Օրինակ՝ մի քանի տարի առաջ սափրագլուխ խաղացող երիտասարդ տղաները պղծել էին Պետահ Տիկվայում Երկրորդ համաշխարհային պատերազմի զոհ դարձած հրեաների հուշարձանը՝ դրա վրա սվաստիկա եւ ֆաշիստական խորհրդանիշներ նկարելով: Եւ ամենահետաքրքիրն այն է, որ այս երիտասարդներից շատերի տատիկներն ու պապիկները Հոլոքոստի զոհեր են եղել: Բայց, ինչպես ասում են, ընտանիքն առանց այլանդակի չի լինում: Ի դեպ, նրանց շատ շուտ գտան եւ դատեցին։

Ի՞նչ եք կարծում՝ ով է կանգնած նրանց հետեւում

Ինձ համար դժվար է դատել, թե ով է կանգնած այս կեղտոտ հանցագործության հետեւում: Ամենայն հավանականությամբ, ինչ-որ անգրագետ տականքներ: Ճիշտ է, չեմ բացառում նաեւ որոշ արտաքին ուժերին, որոնք փորձում են հատուկ փչացնել մեր հարաբերությունները եւ հայերին ներկայացնել որպես հակասեմականներ, թեեւ բոլորին է հայտնի, որ Հայաստանը միշտ հեռու է եղել այս սարսափելի երեւույթից: Այստեղ՝ Իսրայելում ադրբեջանական լոբբին պարբերաբար տպագրում է ոչնչով չհաստատված ինչ-որ անհասկանալի հոդվածներ հայկական հակասեմականության մասին՝ մոռանալով, որ հենց իրենք են մեղադրվում դրանում, մոռանալով վերմախտի ադրբեջանական լեգեոնի, Խալիլ Խասմամեդովի, Շաֆի Ռուստամբեյլիի, Նագի Շեյխզամանլիի, Ֆուադե Էմիրջանի, Էմինե Ռասուլ-զադեի եւ այլոց մասին: Այսօր էլ մենք գիտենք ադրբեջանական «բազմամշակութայնության» գինը: Եւ, վերադառնալով ձեր հարցին, կասեմ, թե հուսով եմ, որ իրավապահ մարմինները արագորեն կգտնեն եւ օրենքով կպատժեն հանցագործներին: Առավել եւս, որ առավոտյան տեղեկանալով այս հանցագործության մասին՝ Երեւանի քաղաքապետ Հայկ Մարությանը վարկենապես արձագանքեց՝ դատապարտելով վանդալիզմի այս ակտը, եւ իրավապահ մարմիններին կոչ արեց շուտափույթ կերպով գտնել հանցագործներին:

Պարոն Ցինկերը ֆեյսբուքյան իր էջում ուղերձ է գրել ողջ հայ ժողովրդին: Ի՞նչ եք կարծում՝ որքանով է արդարացված այսպիսի ուղերձը

Դե, այս պարոնը ներկայանում է որպես քաղաքական գործիչ, բայց նրա արտահայտությունները չեն տեղավորվում մարդու ուղեղում: Անընդունելի է մեկ-երկու ավազակների պատճառով ամբողջ ժողովրդին վիրավորելը: Առավել եւս, նա, հավանաբար, մոռանում է, որ պղծվել է ոչ միայն Հոլոքոստի, այլեւ Հայոց ցեղասպանության զոհերի հուշարձանը: Եւ ընդհանրապես, նման հռետորաբանությունն անթույլատրելի է: Այսպես կարող են արտահայտվել կամ ոչ մաքուր քաղաքական գործիչները, կամ ոչ շատ խելացիները: Նա, եթե չեմ սխալվում, Սերժ Սագսյանի կառավարման օրոք Իսրայել-Հայաստան բարեկամության ֆորում էր ստեղծել: Մի՞թե նա կարծում է, որ իր թույլ տված հայտարարությունները նպաստում են երկու ժողովուրդների եւ պետությունների հարաբերությունների հաստատմանը: Եթե այո, ապա դա իրավիճակի հանդեպ հեռատեսական մոտեցում չէ: Հիշում եմ, երբ նա որպես անկախ դիտորդ ժամանակին մեկնել էր Հայաստան՝ թավշյա հեղափոխությունից առաջ: Ըստ ամենայնի նա այլեւս նման շահավետ առաջարկներ չի ստանում, ահա եւ նեղացել է:

Եւ վերջապես, ձեր կարծիքով, որքանո՞վ կարող է սա ազդել երկու ժողովուրդների հարաբերությունների վրա

Ես շատ հուսով եմ, որ երկու հին ժողովուրդները կունենան այնքան իմաստություն, հասկացողություն եւ համբերություն, որպեսզի չտրվեն այս սադրանքին եւ չփչացնեն հարաբերությունները: Առավել եւս, որ միայն վերջերս են սկսել դիվանագիտական հարաբերություններ հաստատել եւ դեսպանություններ են բացվել երկու երկրներում: