Զինծառայող Արթուր Աջամյանի սպանության դեպքի վայրը փոխվել է. վկաների ցուցմունքներն էլ հակասում են իրար. փաստաբան

Երկու տարի առաջ դեկտեմբերի 2-ին ՊԲ N զորամասի պահպանության տեղամասի մարտական դիրքում զինծառայող Արթուր Աջամյանի՝ մահացու հրազենային վիրավորում ստանալու դեպքի առթիվ հարուցված քրեական գործով դեռեւս կասկածյալի կարգավիճակ ունեցող անձ չկա։

NEWS.am-ի հետ զրույցում Արթուր Աջամյանի իրավահաջորդների ներկայացուցիչ, փաստաբան Հայարփի Սարգսյանն ասաց, որ դժգոհ է քննչական գործողությունների արդյունքից, եւ դեռեւս Արցախյան պատերազմից առաջ հանցագործության մասին հաղորդում է ներկայացրել։

«Քանի որ քրեական գործով մի շարք խախտումներ էի նկատել կապված դեպքի վայրի փոփոխությունների հետ, Աջամյանի գլխին կրակոց էր արձակվել, բայց գնդակը մինչեւ օրս հայտնի չէ՝ որտեղ է, որոնց մասով անհրաժեշտ էր հարուցել քրեական գործ։ Քննիչն էլ այդ հանգամանքներն անտեսում էր։ Այդ առնչությամբ էլ ես քննիչին նաեւ բացարկ էի հայտնել։ Պատերազմի ընթացքում արդեն իմ ներկայացրած հաղորդումն ուղարկվել էր զինվորական դատախազություն, այնուհետեւ վարույթն իրականացնող մարմնին։ Այդ քննությունը ձգձգվում էր, իսկ քննիչը մնաց նույնը, այսինքն՝ բացարկը մերժվեց»,- նշեց նա։

Սարգսյանն ասաց, որ նշանակվել են նոր փորձաքննություններ՝ դատաբժշկական, դատաքիմիական, դատակենսաբանական։

«Աջամյանի եղունգների տակ հայտնաբերվել են արնանման եւ մաշկի հետքեր, որոնք ստացված փորձաքննության եզրակացության համաձայն՝ կարող էին պատկանել թե՛ Աջամյանին, թե՛ դիրքի ավագին, իսկ վիրավորում ստացած Դավիթ Մելիքբեկյանին պատկանելիության հարցը բացառվել է։ Պարզվում է, որ Աջամյանի եղունգների տակ հայտնաբերվել են մաշկի հետքեր, արյան հետքեր եւ հագուստի մանրաթելեր։ Գենետիկական փորձաքննության են ենթարկվել եւ բացառվել են, որ դրանք պատկանեն Դավիթ Մելիքբեկյանին։ Այդ հետքերը կարող են պատկանել ե՛ւ դիրքի ավագին, ե՛ւ Աջամյանին։ Փաստերով կարող են ասել, որ դիրքի ավագին ճանկռել է Արթուր Աջամյանը»,- ասաց փաստաբանը եւ հավելեց՝ ստացվում է, որ նրանց միջեւ տեղի է ունեցել վիճաբանություն։

Ըստ Սարգսյանի՝ վարույթն իրականացնող մարմինն այս դեպքում դիրքի ավագին որպես կասկածյալ պետք է հարցաքններ. «Քննիչն այս պահին Արցախում է, քննչական գործողությունները շարունակվում են»։

Նա նշեց, որ Աջամյանի եղունգների փորձաքննության արդյունքներն արդեն երկու ամիս է՝ ստացվել է, սակայն քննչական գործողություն չի իրականացվում։

Անդրադառնալով դեպքի վայրի փոփոխմանը՝ Սարգսյանը պատմեց. «Աջամյանի զենքը դրված է եղել իր վրա, ինքն էլ գտնվել է սանիտարական մեքենայի մեջ։ Երբ իրեն հայտնաբերել են, մահացած է եղել։ Պետք է իրեն ձեռք չտային, ինքնաձիգի վրա էլ մի քանի տեսակի մատնահետքեր կան։ Մինչեւ իրավապահ մարմինների ժամանելը Աջամյանին տեղափոխել են սանիտարական մեքենայի մեջ, զենքն էլ դրել են իր վրա։ Արդեն անհայտ է, թե որտեղ է կրակված փամփուշտը։ Ես ներկաների ցուցմունքների մեջ հակասություն եմ տեսնում, հիմնականում ժխտողական ցուցմունքներ են։ Այսինքն՝ վկաները փորձում են թաքցնել տեղի ունեցածը»։

Նա ասաց, որ սպասելու է քննչական գործողությունների ավարտին, եթե կրկին որեւիցե արդյունք չեղավ, դատական կարգով կվիճարկելի վարույթն իրականացնող մարմնի անգործությունը։

Հիշեցնենք, որ պաշտոնական հաղորդագրության համաձայն՝ 2019 թվականի դեկտեմբերի 2-ին ժամը 06:50-ի սահմանում, ՊԲ հյուսիս-արեւելյան ուղղությամբ տեղակայված զորամասերից մեկի պահպանության տեղամասում, մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է: Դեպքի առթիվ քրեական գործ է հարուցվել սպանության հատկանիշներով։

Հիշեցնենք, որ Աջամյանի հարազատները բողոքի ակցիա էին իրականացրել Ազգային ժողովի մոտ` պահանջելով պարզել իրենց որդուն սպանողին։