Պուտինը պահեց խոստումը

Պուտինը ղեկավար պաշտոններից ազատել է նախագահի գործերի կառավարչության, ԱԴԾ-ի, պաշտպանության և ներքին գործերի նախարարությունների աշխատակիցների, տեղեկացնում է РИА «Новости»-ն՝ հղում կատարելով Կրեմլի մամլո ծառայությանը։ Իրենց պաշտոններից զրկվել են նախագահի գործերի կառավարչի տեղակալ, Գլխավոր բժշկական վարչության պետ Կոնստանտին Կոտենկոն, ԱԴԾ գրանցման և արխիվային ֆոնդերի վարչության պետ, գեներալ-լեյտենանտ Վասիլի Խրիստոֆորովը, պաշտպանության նախարարության Գլխավոր ռազմաբժշկական վարչության պետ Ալեքսանդր Ֆիսունը և ներքին գործերի փոխնախարար, ՆԳՆ քննչական դեպարտամենտի պետ Ալեքսանդր Սավենկովը։ Թեև գրեթե բոլոր չինովնիկներն էլ ազատվել են «սեփական ցանկությամբ» ձևակերպմամբ, իսկ Խրիստոֆորովը՝ «զինվորական ծառայության մեջ սահմանային տարիքի հասնելու» համար, նախագահի մամուլի քարտուղար Դմիտրի Պեսկովը հաստատել է, որ չինովնիկների ազատումները կապված են ՌԳԱ ընտրվելու հետ։

Մեկնաբանելով կրթության փոխնախարար Ալեքսեյ Լոպատինի հետագա ճակատագիրը, որը նույնպես գիտությունների ակադեմիայի կազմում է, Կրեմլի ներկայացուցիչը պարզաբանել է, որ նախարարությունների աշխատակիցների ազատումը կառավարության իրավասության հարց է։

Հիշեցնենք, որ հոկտեմբերի վերջին ՌԳԱ ընտրություններում քվեարկվում էր 25 պետծառայող։ Գիտությունների ակադեմիայում ասել են, որ չինովնիկները չեն կարող հրաժարվել ակադեմիական կոչումներից, քանի որ կազմակերպության կանոնադրությունը նախատեսում է ցմահ անդամակցություն։ Մի խոսքով՝ ազատված չինովնիկների հետ կապված դեպքը հազիվ թե կարելի է ողբերգություն անվանել, քանի որ կարիերայի գնով նրանք գիտնական են դարձել։ Սա, իհարկե, բարձր պաշտոնի հաճույքները չի խոստանում, բայց, ինչպես ասում են, գոնե օր ծերության ինչ-որ կերպ կմխիթարի...