Իմ որդին 25 օր մարտնչել է Ջաբրայիլում, ես երբեք չեմ հոգնի պայքարելուց. զինվորի ծնող (տեսանյութ)

Ես այստեղ զուտ մասնակից եմ, քանի որ ժողովուրդը փողոցում է, ես էլ եմ այստեղ: Կարծում եմ՝ այս իշխանությունը ցանկացած գնով պետք է հեռանա, ով, ինչ գնով պատրաստ լինի այս իշխանությանը հեռացնել, մենք այդ պայքարողների կողքին ենք ամեն կերպ: Այս մասին այսօր Փաշինյանի հրաժարականի պահանջով «Հայրենիքի փրկության շարժման» հանրահավաքի ժամանակ ասաց փաստաբան Երվանդ Վարոսյանը:

«Մենք այլևս նահանջելու տեղ չունենք: Իմ որդին 25 օր մարտնչել է Ջաբրայիլում, ես երբեք չեմ հոգնի պայքարելուց, անհնար է պատկերացնել մի իրավիճակ, որ ես կհոգնեմ: Ասեմ ավելին, օրվա իշխանությունը չի հեռանա այնքան ժամանակ, քանի դեռ ինքը ունի չհեռանալու հնարավորություն: Ես օրվա քաղաքական իշխանությանը 5 մատիս պես գիտեմ, եթե նրանց չհեռացնեն, նրանք 50 տարի էլ մնալու են իշխանության, ո՛չ ռազմական դրությունն են հանելու, ո՛չ ընտրություն են անելու»,-ասաց նա:

Վարոսյանի խոսքով՝ բոլոր այն քայլերը, որոնք ուղղվում են Նիկոլ Փաշինյանին հեռացնելու ուղղությամբ, արդարացված են. «Եթե ես նպատակ ունեմ ապրել Հայաստանում, եթե իմ երեխաները շարունակելու ապրել Հայաստանում, ապա Նիկոլ Փաշինյանը իշխանության չպիտի լինի, մենք այլ տարբերակ բացարձակապես չունենք: Կամ Հայաստանը լինելու է Թուրքիա, կամ մենք լինելու ենք վտարանդի, կամ Փաշինյան Նիկոլը գնալու է իր տուն, եթե բախտը բերի, լավագույն դեպքում»:

Անդրադառնալով ՀՀ երրորդ նախագահ Սերժ Սարգսյանի՝ օրեր առաջ արած հայտարարություններին և դրանց վերաբերյալ Նիկոլ Փաշինյանի լռությանը՝ փաստաբանը նշեց, որ վերջինս չի գտնում, թե ինչ նոր սուտ հորինի:

Մանրամասները՝ տեսանյութում