«Նստեք տեղներդ․ հաջորդ վարչապետը Կարեն Կարապետյանն է լինելու»․ «Փաստ»

«Փաստ» օրաթերթի հյուրն է քաղտեխնոլոգ Կարեն Քոչարյանը

– Պարոն Քոչարյան, ինչքա՞ն եք գնահատում ընդդիմության շանսերն առաջիկա խորհրդարանական ընտրություններում:
– Ընդդիմությունն իր տարբեր հատվածներով բավականին ջլատված ու բաժան–բաժան եղած է: Նրանք կարող են շանս ունենալ, եթե միանան ու ընտրություններին գնան դաշինքով:
– Իսկ նոր սահմանադրությունը իրականում ընդդիմության ձեռքից ինչ–որ բան վերցրե՞ց, թե տվեց: Անկախ նրանից, թե իշխող ուժն ինչպես է ներկայացնում:
– Ես սահմանադրագետ կամ իրավաբան չեմ, որ իրավական գնահատական տամ, բայց մի բան գիտեմ, որ մինչ օրս գործող բոլոր օրենքներն էլ եղել են միջազգային չափանիշներին համապատասխանող: Այսինքն` թղթի վրա յուրաքանչյուր օրենք, այդ թվում և Սահմանադրությունը, լավ է: Հարցն այն իրագործելու մեջ է: Այն է` եթե դու այդ օրենքը չես կատարում, չես ապրում ու գործում օրենքին համահունչ, ապա օրենքի լավ ու վատը չի փրկի:
– Իսկ ընդդիմությունը կկարողանա՞ միավորվել: Ինչպիսի՞ն է Ձեր տպավորությունը:
– Կարծում եմ ընդդիմության ինչ–որ հատված առնվազն կկարողանա: Չեմ կարող բոլորի համար ասել, բայց անպայման միավորումներ կլինեն: Եթե հիշենք` 1995–96 թվականներից միշտ գործել են ամբիցիաները. ո՞վ լինի նախագահի թեկնածուն, ցուցակներում ով ո՞ր տեղը զբաղեցնի: Եվ միշտ վերջին պահին են միավորումներ եղել: Բայց եղել են:
Եվ ասեմ, թե ինչու են միավորվել. որովհետև բոլորն էլ հասկացել են, որ առանց միասին լինելու, ընտրվելու շանս չունեն: Հիմա էլ են նրանք նույնը հասկանում: Մինչև վերջին պահը ամբիցիաները խեղդելու են: Վերջին պահին ամեն ինչ չկորցնելու համար հաղթահարելու են դրանք:
– Իսկ ընդդիմությունը` դաշինքներով, թե առանց դաշինքների, եթե մտնի խորհրդարան, էական դեր կունենա՞ այնտեղ, թե ընդամենը ֆոն կապահովի:
– Դրանք խոսքեր են, որ միշտ ասում ենք: Օրինակ, հիմա՞ ինչ է անում ընդդիմությունը խորհրդարանում: Այնուամենայնիվ, ինչ–որ բան անում է, չէ՞: Հասկանում եմ, որ կոնկրետ քվեարկությունների ժամանակ ՀՀԿ–ն պարզ մեծամասնություն է, և ստանում է այն, ինչ ուզում է:
Բայց եթե կա քաղաքական կամք նորմալ ապրելու, և նաև եթե փաստենք, որ վերջին տարիներին ընդդիմություն և իշխանություն հարաբերությունները համեմատած ավելի քաղաքակիրթ են դարձել, նաև փոխադարձ քաղաքակիրթ երկխոսության անհրաժեշտության մասին իրենց կուսակցության համագումարում արտահայտվեց երկրի նախագահը, ապա մի օր մենք հասնելու ենք հարաբերությունների բավարար որակի:
Ի վերջո այսօր շատ բան է փոխվում. փոխվում է հասարակության մտածելակերպի մեջ, քաղաքական գործիչներն են այլ մոտեցում ցուցաբերում: Եվ ովքեր էլ գան իշխանության, հասկանալու են, որ աշխարհն այլևս այլ է:
– Որքան էլ ընդդիմություն–իշխանություն հարաբերությունները քաղաքակիրթ դառնան, եթե ամեն ինչ այսպես գնա, մեր երկրում փաստացի չի՞ ձևավորվում միակուսակցական համակարգ:
– Այս պահի դրությամբ այդպես պետք է պատկերացնենք: Որովհետև ՀՀԿ–ն ոչ թե պարզապես քաղաքական կուսակցություն է, այլ նաև իշխանության կուսակցություն է: Եվ եթե մի օր, ենթադրենք, Ռամկավար Ազատական կուսակցությունը եկավ իշխանության, հանրապետականների մեծամասնությունը կդառնա ռամկավար–ազատական:
Բայց արդեն անցել է 25 տարի մեր պետության ձևավորման ճանապարհից: Տեղի է ունենում սերնդափոխություն: Երբ այս սերունդը, որն արդեն լճացած է, հեռանա քաղաքական դաշտից և գան նոր մարդիկ, որոնց մտածելակերպն այլ է, շատ բան կարող է փոխվել երկրում: Այդ ժամանակ արդեն հնարավոր է, որ նորից առաջին պլան գան գաղափարները, և մարդկանց գիտակցության մեջ իշխի ոչ միայն իշխանության մոլուցքը:
– Մի հարց էլ` ՀՀԿ վերջին համագումարից: Պետրոս Ղազարյանի խոսքով ասած` ո՞րն էր գլխավոր մեսիջը:
– Ես տեսա մեկ մեսիջ` Սերժ Սարգսյանը բոլորին, խոսքը Հանրապետական կուսակցության անդամների մասին է, ասաց` նստեք տեղներդ` հաջորդ վարչապետը Կարեն Կարապետյանն է լինելու:

Շարունակությունը` «Փաստ» օրաթերթի այսօրվա համարում: