Վարչապետը բացահայտեց Գազպրոմից «խուսափելու» փորձը
Տնտեսություն
ԱԺ-կառավարություն հարց ու պատասխանի ժամանակ պատգամավոր Նիկոլ Փաշինյանը վարչապետ Կարեն Կարապետյանին հարց ուղղեց գազի սակագների վերաբերյալ: Նա նշեց, որ գազի սակագների իջեցման հետ կապված տխուր փորձ կա, առաջին փորձը 2011-ին թվականին էր, երբ գազի գինը փոխվել էր, բայց հանրությունից թաքուն էին պահել: Իսկ ընտրություններից հետո պարզվեց, որ Հայաստանը 300 մլն դոլար պարտք էր կուտակել:
«Ունենք փորձ, որ այդ ընտրություններից հետո էլեկտրաէներգիան էլ, գազն էլ թանկացավ: Եթե ընտրությունները ձեր կուսակցության համար լավ ավարտվեն, ձեր կառավարությունը հանկարծ շարունակի գործել, կարո՞ղ եք երաշխավորել երկու բան, որ ընտրություններից հետո էլեկտրաէներգիայի ու գազի սակագները չեն բարձրանա, կամ ՀՀ-ն այս էժանացման համար չի վճարի ինչ-որ ռազմավարական օբյեկտով, ռազմավարական շահով կամ հեռանկարով», հարցրեց Փաշինյանը:
«Ես պատասխանում եմ՝ այո: Ընտրություններից հետո գազի գինը բարձրանալո՞ւ է, թե չէ՝ ոչ: Եվ դրա դիմաց Հայաստանը որևէ ռազմավարական օբյեկտով վճարելո՞ւ է, թե ոչ` ոչ»,- ասաց Կարեն Կարապետյանը:
Պատգամավոր Տիգրան Ուրիխանյանը Կարեն Կարապետյանին ասաց, որ նա այն վարչապետն է, ով ժամանակին լինելով Գազպրոմի ղեկավար կազմում, Հայաստանից 300 մլն դոլար պարտքի դիմաց տարավ վերջին բաժնետոմսերը:
«Խնդրում եմ սա մենկաբանեք՝ այս համատեքստում գազի գինը կարո՞ղ էր շատ ավելի շուտ նվազել, ո՞ր շահն ենք մենք ձեզ հետ գերադասում՝ Հայաստանի՞, թե այլ երկրի»,- հարցրեց Ուրիխանյանը:
Կարեն Կարապետյանն ասաց, որ երբ այդ գործարքն իրականացվել է, ինքը Գազպրոմում չի եղել:
«Երկրորդ, գործարքը համարում եմ ճիշտ գործարք, որովհետև որևէ շահութաբաժին հայկական կողմը, ինչպես նաև Գազպրոմը այսքան ժամանակ այս գործունեությունից չի վերցրել: Վճարել մի բանի դիմաց քո ակտիվներով, ես այստեղ որևիցե ոչ տրամաբանական լուծում չեմ գտնում, եթե մենք արտաքին պարտքը մաշացնում ենք: Հնարավո՞ր էր այն պահին գազի գինն ավելի էժան լիներ՝ հնարավոր չէր: Բոլոր ժամանակահատվածների համար Հայաստանի համար գազի գինը եղել է նվազագույն հնարավորը Հայաստանում: Ես վերջերս մի հարցազրույցի ժամանակ ասել եմ, որ երբ այս խոսակցություններն ակտիվ էին, կարելի էր հայտարարել աճուրդ կամ տենդեր, հայտարարել՝ ով է ուզում Հայաստանին գազ մատակարարել, մաքսիմալ բաց ու թափանցիկ անել: Եվ մենք վտանգ ունեինք, որ այն ռեգիոնալ գինը, որը կձևավորվեր մեր սահմանի վրա, կհուշեր Գազպրոմ ընկերությանը, որ զիջումը լիներ մինիմալ չափով: Չգիտեմ ինչքանով եք հավատում իմ խոսքին, որևէ անգամ չի եղել, որ Հայաստանին գազ մատակարարվի տարածաշրջանի գնից թանկ», ասաց նա:
Ուրիխանյանը պնդեց, որ այն ժամանակ Կարեն Կարապետյանը ռուսական Գազպրոմ ընկերության ղեկավար կազմում էր:
«Դուք իմ պատասխանը ուշադիր լսեք, ես Գազպրոմում եղել եմ տնօրենների խորհրդի անդամ երեք կազմակերպությունում: Դրանցից ոչ մեկը Հայաստանի գազի ընկերության հետ որևէ հարաբերություն չուներ: Այդ պատճառով ես այդ գործարքի հետ կապ չեմ ունեցել: Երկրորդ, գործարքը համարում եմ տրամաբանական», ասաց Կարեն Կարապետյանը:
1
2
3
4
5
1
2
3
4
5
2
4
5
