Հրապարակվել է տեսանյութը, որում ադրբեջանական մամուլում հայտնված հայ սպան նշում է, որ մեքենայով գալիս է Հայաստան (տեսանյութ)

Կինոռեժիսոր Արշակ Զաքարյանը ֆեյսբուքյան իր էջում տեղադրել է ՀՀ ԶՈւ նախկին սպա Նորայր Մինասյանի հետ իր տեսազրույցը, ով, ադրբեջանական ԶԼՄ-ներից մեկի պնդմամբ, «օգնություն է խնդրել ադրբեջանական իշխանություններից»։

Նշենք, որ Արշակ Զաքարյանին Նորայր Մինասյանն ասել է, որ ավտոմեքենայով գալիս է Հայաստան, և այդ պատմության մասին մամուլի ասուլիսով է հանդես գալու։

Պաշտպանության նախարարության հասարակայնության հետ կապերի վարչության պետ Գևորգ Ալթունյանը Tert.am-ի հարցին, թե ի վերջո Նորայր Մինասյանը վերադարձե՞լ է Հայաստան, թե ոչ, չկարողացավ պատասխանել՝ ասելով, թե քանի որ Նորայր Մինասյանը նախկին սպա է, այլևս ՊՆ-ն չի զբաղվում այդ հարցով:

Ազգային անվտանգության ծառայության մամուլի խոսնակ Սամսոն Գալստյանը Tert.am-ի հարցին ի պատասխան ասաց, որ այդ առթիվ հրապարակման ենթակա տեղեկություն չունեն:

Կինոռեժիսոր Արշակ Զաքարյանը իր էջում գրել է. «Նորայր Մինասյանը խնդրում է փոխանցել բոլորին, որ ինքը նեղացած չէ ոչ մեկից՝ իրեն վիրավորելու կամ դավաճան անվանելու համար, քանզի ցանկացած ադեկվատ ու իրեն հարգող հայ պետք է որ այդպես էլ արձագանքեր նման պարագայում»:

«Փաստը մնում է փաստ, որ ես գալիս եմ տուն, իսկ մնացածը՝ ամեն ինչ նորմալ է»,-ասել է Նորայր Մինասյանը:

Նորայր Մինասյանի պնդմամբ՝ ավելի վաղ Ադրբեջան գնացած Վահան Մարտիրոսյանն է հրապարակել նյութը, իսկ ավելի ուշ իրեն գրել է, թե նա արդեն դավաճան է համարվում Հայաստանում և վերադառնալ չի կարող։

Դրանից հետո Նորայր Մինասյանը դիմել է Սոչիում հայկական հյուպատոսարան, ձեռք բերել վերադառնալու փաստաթուղթ և շտապ գալիս է Հայաստան։

Հիշեցնենք, որ Tert.am-ն ավելի վաղ զրուցել էր նախկին սպայի կնոջ՝ Սաթիկ Սարգսյանի հետ, ով հերքել էր ադրբեջանական լրատվամիջոցի տարածած տեղեկությունն այն մասին, թե Երևանում գտնվող իրենց ընտանիքին հայկական իշխանությունները ճնշում են։