Արա Բաբլոյանի նկատմամբ ընտրված խափանման միջոցը վերացված է

ԱԺ նախկին նախագահ Արա Բաբլոյանի նկատմամբ ընտրված խափանման միջոցը՝ ստորագրություն չհեռանալու մասին, վերացված է։ Տեղեկությունը Facebook-ի իր էջում հայտնում է Բաբլոյանի պաշտպան Արամ Վարդևանյանը։

«Ցանկանում եմ տեղեկացնել, որ այսօր կայացավ ԱԺ նախկին նախագահ Արա Բաբլոյանի վերաբերյալ ծայրահեղ անհիմն, իրավունքից դուրս գտնվող քրեական գործով հերթական նիստը, որի արդյունքում դատավոր Մանուկյանը որոշեց բավարարել իմ միջնորդությունը և վերացնել Արա Բաբլոյանի նկատմամբ ընտրված խափանման միջոցը»,- տեղեկացնում է Վարդևանյանը։

Նրա խոսքով՝ խափանման միջոցը վերացնելու վերաբերյալ ներկայացված միջնորդության հիմքերից մեկն այն էր, որ 2020 թվականից մինչ օրս Արա Բաբլոյանը 4 անգամ թույլտվություն էր ստացել կարճ ժամանակով մեկնելու Հայաստանից։

Դրանցից երեքի դեպքում նա մեկնել էր և սահմանված ժամկետից շուտ վերադարձել։ Տրամադրված թույլտվություններից մեկից, որը տրվել էր 2020 թվականի մարտին ՀՀ գլխավոր դատախազության կողմից, Բաբլոյանն առհասարակ չէր օգտվել՝ կորոնավիրուսային համավարակով պայմանավորված։

«Չնայած այս հանգամանքներին, դատախազությունը, ինչպես միշտ, առարկեց միջնորդությանը, սակայն դատարանը իրապես իրացրեց արդարադատություն»,- նշում է պաշտպանը։

Փաստաբանն իր գրառման նեջ նաև շեշտում է, որ իրավապահ մարմինները պետք է գիտակցեն՝ խափանման միջոցը «բոլոր դեպքերում» կիրառելու համար չէ։ Նա ընդգծում է՝ խափանման միջոցի կիրառումը պետք է ունենա իրական հիմքեր, իսկ եթե դրանք չկան, պարզապես ենթակա է վերացման։

«Իրավապահները պետք է զգուշավորություն ցուցաբերեն». Բադասյանը` Բաբլոյանի գործի մասին

Հիշեցնենք, որ Արա Բաբլոյանը մեղադրվում է ՀՀ քրեական օրենսգրքի 300-րդ հոդվածի և 314-րդ հոդվածի 1-ին մասերով` մի խումբ պաշտոնատար անձանց հետ ՀՀ սահմանադրական դատարանի լիազորություններին տիրանալու, ինչպես նաև պաշտոնեական կեղծիք կատարելու մեջ:

Ըստ առաջադրված մեղադրանքի` 2018–ի մարտի 1-ի դրությամբ, երբ 2015–ի դեկտեմբերի 6-ի փոփոխություններով Սահմանադրության 7-րդ գլխի ուժի մեջ մտնելուն մնացել էր շուրջ 40 օր, մի խումբ պաշտոնատար անձինք այդ պաշտոնում իրենց թիմակցին մինչև 70 տարին լրանալը պաշտոնավարելու հնարավորություն ընձեռելու նպատակով, Սահմանադրությամբ նախատեսված կարգի խախտմամբ, զավթել են իշխանությունը՝ Հրայր Թովմասյանին 2018–ի մարտի 21-ին նշանակելով ՍԴ նախագահ։

ՍԴ–ի այն ժամանակվա նախագահ Գագիկ Հարությունյանի պաշտոնավարման ժամկետը լրանալու էր 2018–ի մարտի 23-ին (70 տարեկան դառնալուն պես), սակայն նա մարտի 21-ով ՀՀ ԱԺ նախագահ Արա Բաբլոյանին հասցեագրված դիմում է ուղարկել ՍԴ նախագահի պաշտոնից հրաժարվելու վերավերյալ, իսկ Բաբլոյանն այն ստորագրել է։

Բաբլոյանը վստահեցնում է` իրեն մի բանի համար կարող են մեղադրել, և դա կապված է Փաշինյանի հետ