ՊՆ փոխնախարարի նյարդային պատասխանը

«ՉԻ»-ն ՀՀ պաշտպանության նախարարի տեղակալ Արա Նազարյանից հետաքրքրվեց՝ պաշտպանության ոլորտին հատկացված բյուջեով հնարավոր դարձա՞վ լուծել խրամատներում գտնվող զինվորների համազգեստի հարցը, ինչը ծառայողների ծնողների շրջանում դժգոհություն է առաջացրել։

Մեր հարցին ի պատասխան՝ պաշտոնյան ասաց. «Ծայրահեղացված ինֆորմացիաներ եք ստանում եւ տարածում։ Նման խնդիր չկա։ Զինվորը նորմալ վիճակում ա, հագուստն էլ ա նորմալ, ամեն ինչն էլ նորմալ ա»։ Երբ հակադարձեցինք, որ նույն հարցը ուղղել էինք պաշտպանության փոխնախարար Դավիթ Տոնոյանին, եւ նա հաստատել էր, որ կա նման խնդիր, Արա Նազարյանը կրկին զայրացավ. «Ձեզ օրինագիծը չէր հետաքրքրում, Ձեզ ինտրիգաներն էին հետաքրքրում, եւ ինտրիգա տարածելն էր հետաքրքրում։ Ես հիմա կենտրոնացած եմ էս օրենքի վրա, դուք գալիս եք էս պահին ինձ հարմար ա, հարմար չի, հարց եք տալիս։ Դրա համար մամուլի խոսնակ կա» (խոսքը ԱԺ-ում քննարկվող «Զինվորական ծառայութjուն անցնելու մասին» ՀՀ օրենքում փոփոխություններ կատարելու նախագծի մասին է, որը, դրա հեղինակների կարծիքով, միտված է վերացնել զինվորական ծառայության օրենքում եղած բացերը)։

Հիշեցնենք, որ «ՉԻ»-ն իր «Զինվորական համազգեստի որակը` բյուջեի հաշվին» հրապարակման մեջ անդրադարձել էր այն փաստին, որ հայոց բանակի զինվորները ծառայության ընթացքում ստանում են մեկական համազգեստ եւ պարտավոր են այդ հագուստով անցկացնել իրենց երկամյա ծառայությունը։ Նշել էինք, որ մինչեւ ծառայության ավարտը այդ հագուստը, մեղմ ասած, խղճուկ տեսք է ստանում։ Ի վերջո՝ մեծ երեւակայություն ունենալ պետք չէ պատկերացնելու համար, թե ինչ տեսք է ունենում դիրքերում գտնվող եւ խրամատներում ծառայությունն անցկացնող սահմանապահ զինվորների համազգեստը, եթե այն չի թարմացվում։ Մեր, ինչպես նաեւ զինծառայողների այս մտահոգությունը կիսել էր Դավիթ Տոնոյանը ու նշել. «Իրականում մենք աշխատում ենք, որպեսզի փոփոխվեն նորմատիվները։ Մենք պետք է բյուջեի սահմաններում այդ ծրագրային փոփոխումները կատարենք, որպեսզի համազգեստը ավելի հաճախ որակյալ փոփոխություններ կրի»։ Նազարյանից ընդամենը ուզում էինք պարզել՝ բյուջեում նորմատիվները փոխվել են, թե՞ չէ։