Մենք նման մարդկանց հետ չենք հանդիպում․ Ում հետ է Արայիկ Հարությունյանը հանդիպել Սյունիքում

Նիկոլ Փաշինյանն ապրիլի 1-3-ը ներառյալ իր գլխավոր խորհրդական Արայիկ Հարությունյանին գործուղել է Սյունիքի մարզ (Գորիս և Կապան)՝ աշխատանքային հանդիպումներ ունենալու նպատակով:

Ամեն դեպքում այսպես է ներկայացված վարչապետի պաշտոնական կայքէջում՝ Նիկոլ Փաշինյանի որոշման ներքո:

Analitik.am-փորձեց մարզից ճշտել, թե ում հետ է հանդիպել Արայիկ Հարությունյանը, մասնավորապես Գորիսում ու Կապանում:

Գորիսի փոխքաղաքապետ Մենուա Հովսեփյանը մեզ հետ զրույցում ասաց, որ Հարությունյանը հանդիպում չի ունեցել ոչ համայնքապետ Առուշ Առուշանյանի, ոչ էլ իր կամ համայնքապետի մյուս տեղակալներից որևէ մեկի հետ: Արդյո՞ք հանդիպման առաջարկ եղել է: Պարոն Հովսեփյանն ասաց, որ կոնկրետ իր մասով չի եղել, մյուսների մասով չի կարող ասել. «Որ լիներ էլ, միանշանակ մերժվելու էր: Մենք նման մարդկանց հետ չենք հանդիպում»:

Ինչ վերաբերում է համայնքում տիրող իրավիճակին, Հովսեփյանն ասաց, որ նույն իրավիճակն է, որևէ բան չի փոխվել:

Կապանի համայնքապետի խոսնակն իր հերթին ասաց, որ համայնքապետի կամ տեղակալներից որևէ մեկի հետ հանդիպում չի եղել, չի եղել նաև առաջարկ: Հարցին՝ տեղյակ են արդյո՞ք, թե ինչու է Հարությունյանը գործուղված եղել մարզ, մեր զրուցակիցը բացասական պատասխան տվեց:

Analitik.am-հարցում է ուղարկել վարչապետի գլխավոր խորհրդականին՝ պարզելու համար՝ արդյո՞ք նա մեկնել է մարզ, ինչ նպատակով է գործուղվել, ում հետ է հանդիպել, ինչ քննարկումներ են եղել, և արդյո՞ք կատարել է իր առջև դրված խնդիրը: