Նկարիչների հույսը գոնե մի նկար վաճառելն է

«Ա1+»-ը գրում է․

Գերազանցության դիպլոմով Փանոս Թերլեմեզյանի անվան գեղարվեստի պետական քոլեջն այս տարի ավարտած Կլարա Մարգարյանն իր ապագան գեղանկարչության հետ չի կապում:

«Նկարել եմ միշտ, ինչքան ինձ հիշում եմ: Իսկ պրոֆեսիոնալ նկարչությամբ զբաղվում եմ 5 տարի, Երևանի Փ. Թերլեմեզյանի անվան գեղարվեստի պետական քոլեջում, որը շատ մեծ դպրոց էր: Թերլեմեզյանում ամենակարևոր բաներից մեկը որ ձեռք բերեցի, դա գեղագիտական ճաշակն է: Մի քանի ցուցահանդեսի եմ մասնակցել»,- մեզ հետ զրույցում պատմեց Կլարան:

Սակայն, երբ եկել է հիմնական մասնագիտություն ընտրելու պահը, որոշել է դառնալ համակարգչային դիզայներ, որովհետև ինչպես ինքն է ասում` այս մասնագիտությունը` ի տարբերություն նկարչության, թույլ կտա «հացի փող» վաստակել:

«Ցավոք սրտի հենց բուն գեղանկարչությամբ մեր օրերում այնքան էլ հետաքրքրվողներ չկան: Հիանալի կլիներ օրվա ապրուստը հենց նկարելով էլ վաստակել, ստանալ պատվերներ»,- մեզ հետ զրույցում ասաց 19-ամյա ուսանողուհին:

Այն, որ նկարչությամբ ասյօր հնարավոր չէ ապրուսը հոգալ, վկայում են նաև Կլարայի շատ ավագ գործընկերները:

Սարյանի այգում իր նկարները վաճառող Մարիամ Վարդանյանը տարիներ առաջ նույնպես ավարտել է Թերլեմեզյանի անվան գեղարվեստի պետական քոլեջը և իր ողջ կյանքը նվիրել նկարչությանը, սակայն անկեղծանում է, որ նկարների վաճառքից ստացված գումարն այսօր չի բավարարում ապրելու համար:

«Մի կերպ պարտքով հաց ենք առնում, հետո մտածում ենք` թոշակ կստանանք կամ մի փոքր նկար կվաճառվի: Անցած տարվանից մեծ նկար չեմ վաճառել, մեծերը տարել եմ պահեստ»,- պատմում է նա:

Մարիամ Վարդանյանի հետ նույն այգում իրենց նկարները վաճառող մյուս գեղանկարիչները ևս վկայում են, որ Հայաստանում նկար գնողներն օրեցօր պակասում են: Գեղանկարիչ Նորիկ Հարությունյանն այս հանգամանքը կապում է արտագաղթի հետ:

«Ժողովուրդ չկա, որ առնի, ո՞ւր է ժողովուրդ, Հայաստանում մարդ մնա՞ց որ, բոլորը գնացել են ու դեռ գնում էլ են»,- դժգոհեց նա:

Սարյանի այգում ու Վերնիսաժում նկարներ վաճառելու հույսով ամբողջ օրն անցկացնող նկարիչների մեծ մասն ավագ սերնդի ներկայացուցիչներ են, ովքեր օրական մեկ-երկու նկար վաճառելուց բացի ապավինում են թոշակին, որով կարողանում են, ինչպես իրենք են ասում, գոյատևել:

Նոր սերնդի ներկայացուցիչ Կլարա Մարգարյանը հենց այս իրավիճակին ծանոթ լինելով է, որ որոշել է սիրած մասնագիտությանը զուգահեռ նաև այլ մասնագիտություն ընտրել: Բայց երիտասարդ նկարչուհին լի է լավատեսությամբ և վստահ է, որ եկամուտ ապահովող դիզայների մասնագիտությունից զատ, այնուամենայնիվ, հնարավորություն կունենա ազատ ժամանակ զբաղվել նաև նկարչությամբ` բավարարելով ոչ միայն ֆինանսական, այլև` հոգևոր պահանջմունքը: