«Հուզվեցի այդ անակնկալից»․ Զառա Սահակյանը՝ 34-ամյակի անակնկալների, տարիքից չվախենալու և կատարված ամենամեծ երազանքի մասին

Դերասանուհի Զառա Սահակյանն այսօր նշում է 34-ամյակը։ Tert.am Life-ի հետ զրույցում Զառան պատմել է կեսգիշերի անակնկալի, ուշադրության կենտրոնում լինել չսիրելու, երազանքների, ձեռքբերումների և իր տարիքը մոռանալու մասին։

Դերասանուհու խոսքով՝ կեսգիշերին Բոհեմ թատրոնում «Կին կոդ» ներկայացման փորձին է եղել, նույնիսկ, մոռացել է ժամանակի զգացողության մասին, չի նկատել, որ արդեն կեսգիշերն անց է։

«Ներկայացման անձնակազմն ու Women’s club-ի անդամներն անակնկալի բերեցին ինձ, տորթով, մոմերով մի փոքր նշեցինք։ Անկեղծ ասած, անգամ հուզվեցի։ Այնպես չէ, որ նրանց շնորհավորանքը շատ անսպասելի էր, բայց երբ հերթը քեզ է հասնում, անակնկալը մի տեսակ խորհրդավոր է դառնում։ Դրանից հետո եկա տուն, որտեղ բալիկս և հարևանի բալիկը չէին քնել, սպասել էին ինձ, շնորհավորեցին։ Առհասարակ, կարևոր է, թե ով է անակնկալն անում, սիրելի մարդկանց անակնկալները միշտ հաճելի են»,- ասաց նա։ Ինչ վերաբերում է երեկոյին՝  Զառան ասաց, որ օրվա հետ կապված ծրագրեր չունի, ամեն ինչ թողել է ինքնահոսի։

Ըստ Զառայի՝ գուցե զարմանալի է, բայց ծննդյան օրվա ուշադրությունից իրեն լարված է զգում։ «Հանրային մարդ եմ, բայց ծննդյանս օրը լարվում եմ, չեմ ուզում ուշադրության կենտրոնում լինել, իսկ ուրիշների ծնունդներին բլբուլ եմ կտրում:) Չնայած այս ամենին՝ բոլորի հոգում էլ ծննդյան օրը հրաշքի սպասում է լինում։ Երազանքներդ, նպատակներդ այդ օրը տիեզերք ես ուղարկում, հետո հետ ստանում։ Որքան էլ նպատակի մարդ եմ, այս օրը կարող եմ ինձ թույլ տալ երազանքներ մտապահել։ Ես զգացել եմ, որ երազանքները կատարվում են, երբեմն, արագ, երբեմն՝ ոչ։ Սիրում եմ երազանքներին, նպատակներին տանող ճանապարհը, որովհետև ճանապարհն ինքդ ես կերտում,- ասաց նա և հավելեց, որ իր ամենամեծ երազանքն արդեն կատարվել է,- Մասնագիտությունս ժամանակին ինձ համար երազանքի պես մի բան էր, որին քայլ առ քայլ հասա, չեմ նստել բազմոցին և ուղղակի երազել»։

Զառան նկատեց, որ իր ձեռքբերումները շատ են։ «Կյանքիս կարևորագույն ձեռքբերումը որդիս է։ Նա իմ կյանքում շատ բան է փոխել, վերաիմաստավորել է այն։ Հանրային մարդկանց երեխաները որոշ չափով տուժում են, որոշ չափով՝ շահում։ Շահում են, որովհետև մասնակցում են փորձերի, բացահայտում այդ աշխարհը, տուժում՝ ծնողների ժամանակի առումով։ Հիմա դասապատրաստման տեսանկյունից, երբեմն, թերանում եմ, փորձում եմ հասցնել, բայց, ընդհանուր առմամբ, թեկուզ երեկոյան ուշ քնելով քննարկում ենք տղայիս օրը, խոսում իր ձեռքբերումներից,- ասաց նա և ընդգծեց, որ իր ձեռքբերումներից է նաև մասնագիտությունը,- Կյանքում բարդ է գտնել այնպիսի մասնագիտություն, որից չես ձանձրանա, որը ժամանակի ընթացքում քեզ համար նողկալի չի դառնա։ Ամենօրյա աշխատանքային ներվի հետ եթե լինի նաև չսիրած մասնագիտություն, կյանքդ քաոս կդառնա։ Կարևորում եմ նաև մարդկանց բարի վերաբերմունքն իմ նկատմամբ, չգիտեմ՝ ինձնի՞ց է բխում, թե՞ ուղղակի բախտավոր եմ։ Զգում եմ, որ մարդիկ ինձ սիրում են, իսկ դա ինձ էներգիա է տալիս։ Երախտապարտ եմ մարդկանց, խելագարվում եմ մեր հայերի համար»։

Դերասանուհին այս տարի դարձել է 34 տարեկան․ խոստովանեց, որ մի պահ նույնիսկ մոռացել էր, թե քանի տարեկան է։ «Մոռացել էի տարիքս, մտածում էի՝ 32 տարեկան եմ։ Օրեր առաջ հարցնում էին՝ 33 տարեկան եմ դառնալու, թե՞ 34, լուրջ պատասխանեցի՝ 32։ Մեծացող թվերից չեմ վախենում, այդ պատճառով էլ տարիքս մոռացել էի, այնպես չէ, որ ուզում եմ ինձ փոքրացնել։ Կյանքի բնականոն ռիթմ է, տարեցտարի պետք է մեծանաս։ Միայն կցանկանայի 20 տարեկանի էներգիա ունենալ, ես մարդկանց էներգիայով եմ շոշափում։ Կան մարդիկ, օրինակ, ովքեր 20 տարեկան են, բայց 50 տարեկանի էներգիա ունեն։ Ինձ հոգով, երբեմն, 30, երբեմն, 16 տարեկան եմ զգում։ Երիտասարդ լինելու գաղտնիքը լավատեսությունն է, պետք է ներսի հեքիաթը չկորցնել, երեխաների հետ հաճախ ժամանակ անցկացնել։ Պետք է քեզնից վանես այն, ինչը հարկադրված ես անում և մոտեցնես այն, ինչը սիրով ես անում»,- նշեց նա։

Զառան նաև ասաց, որ երջանիկ է, բայց ոչ լիարժեք։ «Մեր երկրի հետ կապված շատ հարցեր կան։ Երջանիկ եմ, որովհետև գիտեմ՝ պայքարող մարդիկ ենք, երջանկությունն իր մեջ պայքար է պարունակում։ Չի կարող երջանկությունը լինել միայն հարթ ճանապարհներով, պետք է լինի և՛ լույս, և՛ մութ»,- եզրափակեց նա։