Իրինա Թովմասյանի 18-ամյա դստեր՝ Մեգիի նոր տեսահոլովակի շնորհանդեսի հետաքրքիր մանրամասներն ու հյուրերը

«Միսս Հայաստան 2003» Իրինա Թովմասյանի ավագ դուստրը՝ 18-ամյա Մեգին, նոր երգ և տեսահոլովակ ունի: Tert.am Life-ը ներկա է եղել «Emotions» երգի հիման վրա նկարահանված տեսահոլովակի պրեմիերային, ֆիքսել հետաքրքիր դրվագներն ու զրուցել Մեգիի և Իրինայի հետ:

Երգի հեղինակը Վահան Նահապետյան է, խոսքերն անգլերեն են: Ըստ Մեգիի՝ այդպես են արել, որ երգի լսարանն ավելի մեծ լինի: «Այն էմոցիաների մասին է, կան և՛ մեղեդային, և՛ ռիթմիկ հատվածներ: Չի կարող ինձ համար գրված այնպիսի երգ լինել, որտեղ պարային, ռիթմիկ հատված չլինի, ես սիրում եմ այդպիսի հատվածներ: Ամեն ինչ իմ պատկերացրածի նման ստացվեց: Տեսահոլովակում նկարահանվել եմ ես, իմ երկու ընկերուհիները, ովքեր մեծ սիրով համաձայնեցին իմ առաջարկին: Այս տեսահոլովակում կտեսնեք լրիվ այլ Մեգի, քանի որ մոտ երկու տարվա ընդմիջում եմ ունեցել, փոփոխությունները նկատելի են: Այս տեսահոլովակով մուտք եմ գործում մեծերի շոու բիզնես, փոքր Մեգին արդեն 18 տարեկան է»,- ասաց նա:

Երիտասարդ երգչուհու խոսքով՝ տեսահոլովակի նկարահանումների ընթացքում դիմահարդարումն ու վարսահարդարումը փոխում էին 10 րոպեի ընթացքում: «Դիմահարդարումներից մեկի ժամանակ ստվերաներկի փոխարեն շրթներկ էինք օգտագործել, ինչից աչքերս ծակծկում էին և այրվում: Այդպես էլ նկարահանվեցի, երբ մաքրեցինք դիմահարդարումը, աչքերս կարմրել էին»,- պատմեց նա:

Երգչուհու մայրիկը նկատեց՝ Մեգին այնքան է մեծացել, որ տեսահոլովակի հետ կապված գրեթե ամեն ինչ ինքն է որոշել, Իրինան օգնել է կազմակերպչական հարցերում: «Բնականաբար, կողքից խորհուրդներ տալիս ենք թե՛ ես, թե՛ մայրս, բայց դուստրս հստակ գիտի, թե իրեն ինչ է պետք: Արդեն 18 տարեկան է, ընդունվեց Հայաստանում ֆրանսիական համալսարան, մտածելակերպով այնքան հասուն է, իրենով հպարտանալու շատ առիթներ է տալիս: Մեգիի համար այնքան հանգիստ եմ, գիտեմ, որ ինչքան էլ սխալվի, շատ խելացի մտածելակերպ ունի: Գիտեմ, որ ճիշտ մասնագիտություն կընտրի, ճիշտ ուղով կգնա, նույնիսկ եթե շրջապատում ինչ-որ մեկը սխալ քայլ անի, գիտեմ, որ Մեգին նրա հետևից չի գնա: Կարծում եմ ամեն ինչ առաջին հերթին Մեգիի տեսակից է գալիս, հետո դաստիարակությունից»,- ասաց նա:

Իրինան նաև ընդգծեց, որ դուստրը միշտ է այդպիսին եղել: «Մեգին միշտ դասերը սովորելու համար մեկ ժամ է ունեցել, բայց միշտ լավ պատրաստված դպրոց է գնացել: Երբ նայում էի, որ ծնողները երեխաներին խմբակներից հանում են, քանի որ նրանք չեն հասցնում դասերը սովորել, զարմանում էի, Մեգին ամեն ինչ հասցնում էր: Հիմա էլ հասցնում է թե՛ պարը, թե՛ երգը, թե՛ դասերը, թե՛ ժամանցը: Ինձ թվում էր՝ համալսարան ընդունվելուց հետո ոչնչի համար ժամանակ չի ունենա, բայց արի ու տես, որ ունեցավ: Շատ ինքնուրույն մարդ է, կարող եմ երեխաներին 10 օրով իր մոտ թողնել ու գնալ: Երբ նայում եմ Մեգիին, հասկանում եմ, որ տարիներն անցան, արդեն ընկերուհիս է, կարող եմ նրա հետ կիսվել նույնիսկ ինձ հետ կապված հարցերով»,- եզրափակեց Իրինան: