Ինչո՞վ է այժմ զբաղվում «Շիկ աղջիկներ»-ի Կարինեն ու ի՞նչ է մտածում երգարվեստ վերդարձի մասին

1990-2000-ականներին հայկական շոու-բիզնեսում մեծ հեղինակություն էին վայելում «Շիկեր» խմբի աղջիկները: Նրանք աստղային հիթ-շքերթների առաջին հորիզոնականներում էին, ներկա էին հեռուստատեսային բոլոր միջոցառումներին: Թեև այսօր նրանց փոխարինելու են եկել շատ այլ երգչուհիներ և խմբեր, բայց «Շիկեր»-ի աղջիկներին շատերն են դեռ հիշում:
Խմբի մենակատար, ինչպես շատերն են նրան բնութագրում «սևահեր» Կարինե Մանասյանն արդեն 11 տարի է` բնակվում է Միացյալ Նահանգներում:
MAMUL.am-ի թղթակցի հետ զրուցում երգչուհին պատմել է ԱՄՆ մեկնելու պատճառների, այնտեղ հանդիպած դժվարությունների և երգարվեստ հնարավոր վերադարձի մասին:

- Կարինե, ինչպե՞ս որոշեցիք մեկնել ԱՄՆ, ո՞րն էր նպատակը և ինչո՞վ եք զբաղվում այդտեղ։

- ԱՄՆ մեկնելուս միակ նպատակն ամուսնուս կողքին լինել էր, նա ամերիկահայ է: Այստեղ զբաղվում եմ ամեն ինչով, բացի երգարվեստից: Զբաղվում եմ աղջկաս` Լիայիս դաստիարակությամբ, հպարտանում և ուրախանում նրա հաջողություններով: Արվեստի մեծ սերը ժառանգել է ինձնից, սիրում է երգել, նկարել, ստեղծագործել:

- Ի՞նչ դժվարությունների եք հանդիպել և արդեն հաղթահարվա՞ծ եք համարում այդ ամենը։

- Դժվարություններ բոլորի կյանքում էլ պատահում են, բայց կարծում եմ` բոլորն էլ հաղթահարելի են, եթե դրան նայում ես` ինչու չէ նաև հումորով: Կարծում եմ` իմ դժվարությունը երկիր փոխելն էր, հատկապես, որ լեզուն չգիտեի: Երկիրը փոխելով` շատ-շատ բաներ փոխվեցին իմ կյանքում` ապրելակերպը, մտածելակերպը: Բայց կարցում եմ` շուտ հաղթահարեցի` ունենալով կողքիս իմ շատ սիրելի ամուսնուն:

- Կարինե, մտածե՞լ եք նորից երգարվեստ վերադառնալու մասին, նոր երգեր, տեսահոլովակներ ներկայացնել:

- Ամեն օր մտածում եմ նորից երգելու մասին, բայց ինչպես տեսնում եք` առաջին քայլերս դեռ չեմ արել: Կարծում եմ` դա պայմանավորված է նրանով, որ ամուսինս շատ է երես տվել ինձ, դարձել եմ ալարկոտ: Բայց միևնույն ժամանակ էլ պնդում ու պահանջում է, որ նորից երգեմ, շատ է սիրում ձայնս: Ուրախանում եմ, որ արդեն 11 տարի է անցել, ինչ երգարվեստում չեմ, բայց դեմքս չի մոռացվել: Շատ հաճախ է պատահում, որ գտնվելով հայերի միջավայրում, միանգամից ճանաչում են և սկսում նախատել, որ էլ չեմ երգում. հուսով եմ, որ մի օր կուրախացնեմ իմ շատ սիրելի երկրպագուներին»:

- «Շիկեր» խումբը ժամանակին մեծ ճանաչում ուներ, նորից նույն խմբով հանդես գալու մասին երբևէ մտածե՞լ եք։

- «Շիկեր»-ն իրենց քրտնաջան աշխատանքով ահռելի ճանապարհ անցան: Ես ուրախ եմ, որ նրա մեկ և մեծ մասնիկն եմ եղել` հաշվի առնելով, որ հիմնադիրներից մեկը և մենակատարն եմ եղել: Ցավում եմ, որ հիմա խումբը չկա, քանզի մեծ ճանաչում ուներ, ու շատ շատերի կողմից սիրված էր: Ինձ համար «Շիկեր»-ը եղավ մի դպրոց, որը ավարտեցի և գնացի դեպի ապագա: Երբևէ մտքովս չի անցել նորից հանդես գալ «Շիկեր»-ով: Շատ են լինում պահեր, որ կարոտով հիշում եմ այդ տարիները, բայց երբ նորից սկսեմ երգել, արդեն կներկայանամ անհատ, որպես Կարինե Մանասյան: