Արթուր Բաղդասարյանը հատուկ հրահա՞նգ է ստացել

Քաղաքականություն 16 Դեկտեմբեր, 2016 12:23

«Հայկանդուխտ» ավանդապաշտ-ժողովրդավարական կուսակցության նախագահ Արմենուհի Ղազարյանը պատրաստվում է հայց ներկայացնել դատարան՝ ընդդեմ «Հայկական վերածնունդ» կուսակցության նախագահ Արթուր Բաղդասարյանի՝ պահանջելով դատարանից անվավեր ճանաչել «Հայկական վերածնունդ» կուսակցության գրանցումը։ Թե ինչն է հիմք հանդիսացել նման պահանջով դատարան դիմելու համար՝ «Առաջին լրատվական»-ի հետ զրույցում Արմենուհի Ղազարյանը պարզաբանեց, որ սույն թվականի փետրվարի 21-ին «Հայկական վերածնունդ» կուսակցության հիմնադիր համագումար՝ որպես այդպիսին չի եղել, այլ այդ օրը եղել է «Հայկական վերածնունդ միավորում» կուսակցության հիմնադիր համագումարը, որը ստեղծվել է նախկինում «Հայկանդուխտ» և մի քանի այլ կուսակցությունների համագործակցության արդյունքում։ Արմենուհի Ղազարյանի պնդմամբ՝ Արթուր Բաղդասարյանը ապօրինի կերպով կեղծել է «Հայկական վերածնունդ միավորում» կուսակցության փաստաթղթերը, պետռեգիստրում գրանցելու ժամանակ հանել է «Հայկական վերածնունդ միավորում» կուսակցության ամբողջական անվանումից միավորում բառը և «Հայկական վերածնունդ» անվանումով իբրև նոր կուսակցությունը ներկայացրել է գրանցման։ Սրանից զատ՝ տիկին Ղարզարյանը հավաստիացնում է, որ ՀՎԿ-ի ներկայիս կանոնադրությունն այն կանոնադրությունը չէ, որը հաստատվել է փետրվարի 21-ի համագումարի ժամանակ։

«Ես եղել եմ «Հայկական վերածնունդ միավորում» կուսակցության կառավարման խորհրդի անդամ, համագումարի ժամանակ ելույթ եմ ունեցել, ակտիվ մասնակցել եմ նաև կուսակցության կառավարման խորհրդի բոլոր նիստերին։ Երբ ես պետք է ներկայացնեի «Հայկանդուխտ» կուսակցության 2015թ-ի տարեկան հաշվետվությունը, և այդ կապակցությամբ ուզեցի իմ կնիքը, ինձ ասացին, որ իմ կնիքը չկա, պատգամավոր Հովհաննես Մարգարյանի բառերով ասած՝ իմ կնիքը փռթել են, բայց երբ որ ես հետաքրքրվեցի, թե այդ ինչ իրավունքով են իմ կնիքը փռթել, ով է փռթել, ինձ հետո զանգահարեցին և ասացին, որ գնամ իմ կնիքը վերցնեմ։ Ես հիմա նաև կասկածում եմ, որ այդ կնիքով նրանք կարող են հաշվեհամարներ բացեն և ֆինասական տարբեր գործողություններ անեն, և այս առիթով էլ դատախազությանը կխնդրեմ, որպեսզի ուսումնասիրություններ կատարեն, թե այդ կնիքով ինչ հաշվեհարմարներ կան բացված»,- շեշտեց Արմենուհի Ղազարյանը և հավելեց․

«Երբ որ գրանցել են ՀՎԿ-ն՝ ՕԵԿ-ը հիմնադիր անդամ ընդհանրապես չի եղել, գրանցման պահին էլ, որ ներկայացրել են, թե իբրև դա 12 կուսակցությունների միաձուլման արդյունք է, դա էլ է ընդհանրապես միֆ, 8 կուսակցություն է միավորվել, որի մեջ ՕԵԿ-ը չի եղել, այն ոչ լուծարվել է, ոչ էլ միաձուլվել։

Ես պահանջել եմ նաև թե՛ արդարադատության նախարարությունից, թե՛ գրանցման պետռեգիստրից ՀՎԿ-ի գրանցման արձանագրությունները, իսկ այդ արձանագրությունների մեջ ամրագրված է, որ համագումարի համաձայն՝ ՀՎԿ նախագահ է միաձայն ընտրվել Հայաստանի ագրարային կուսակցության անդամ Արթուր Բաղդասարյանը, իսկ քարտուղար՝ Անահիտ Եղոյանը։ Ստացվում է, որ միավորվում են 8 տարբեր կուսակցություններ, որտեղ չկա ՕԵԿ-ը, և հանկարծ մի ինչ-որ 10-11-րդ կուսակցության անդամին ընտրում են իրենց կուսակցության նախագահ։ Սա աբսուրդ է, պատկերացնո՞ւմ եք։ Ես մամուլում էլ կարդացի, որ երբ Ագրարային կուսակցության նախագահ Արա Մելքոնյանին հարցրել են, թե արդյո՞ք Արթուր Բաղդասարյանը հանդիսանում է տվյալ կուսակցության անդամ, նա պատասխանել էր, որ ոչ, նա երբեք այդ կուսակցության անդամ չի եղել։ Վաղն ու մյուս օրն էլ կարող է պատահի, որ նույն Արթուր Բաղդասարյանը մի ինչ-որ այլ պետության կուսակցության նախագահ ընտրվի՝ այս նույն կեղծիքներով։ «Հայկական վերածնունդ» կուսակցություն գոյություն չունի, դա ապօրինի զավակ է»։

Տիկին Ղազարյանի խոսքերով՝ երբ նա սկսել է այս ամենի մասին ԶԼՄ-ներով բարձրաձայնել, ՕԵԿ-ականները սկսել են իրեն վիրավորել և մեղադրել այդ ամենը կազմակերպելու և նյութական շահ հետապնդելու մեջ։ Ավելին՝ մինչ այդ էլ այդ նույն ՕԵԿ-ականները իրեն փորձել են դրամական միջոցներ առաջարկելով լռեցնել, սակայն այդ կերպ արդյունք չստանալով, դրանից հետո էլ փորձել են ուժային միջոցներով վախեցնել։

«Պատգամավոր Իշխան Խաչատրյանն էր մի ամբողջ օր ու գիշեր ինձ զանգում, համոզում էր, թե ոչ մի բան մի արա, ձայնդ կտրի և այլն, բայց ես ասացի, որ իմ որոշումից հետ չեմ կանգնելու»,- պատմեց նա և միևնույն ժամանակ ավելացրեց․

«Ի տարբերություն ՕԵԿ-ականների՝ ես նյութական շահ չեմ հետապնդում, ի տարբերություն նրանց՝ ես արատավորված չեմ և այսօր հայց եմ ներկայացնում դատարան Արթուր Բաղդասարյանի և համակարգող խորհրդի նախագահ և կուսակցության կառավարման խորհրդի անդամ Անահիտ Եղոյանի դեմ, թե ինչու և ինչպես են այդ կեղծիքները կատարել։ Նրանք հայտարարում են նաև, թե ես համագումարին չեմ մասնակցել, սակայն իմ մասնակցությունը փաստելու վերաբերյալ կան թե՛ լուսանկարները, թե՛ տեսագրությունները, ակնհայտ սուտ են խոսում և այս ձևով էլ ուզում են գան իշխանության, սողոսկեն խորհրդարան, որպեսզի շարունակեն խաբել ժողովրդին։ Վայ մեզ ու մեր ժողովրդին, որ Արթուր Բաղդասարյանը ու նրա կողքը հավաքված արատավոր ՕԵԿ-ականները պիտի գան իշխանության։ Այս նույն կերպ էլ արտասահմանում հասարակական միավորումների գրասենյակներ են բացում՝ բացարձակ խաբելով բոլորին»։

Հարցին ի պատասխան, թե ինչպես է պետռեգիստրն առանց ներկայացված փաստաթղթերի իսկությունը ստուգելու՝ գրանցել ՀՎ կուսակցությունը, Արմենուհի Ղազարյանը շեշտեց, որ հենց այդ պատճառով էլ որպես երրորդ անձ պատասխանող կողմ հայցադիմումի մեջ ներգրավվել եմ պետական ռեգիստրին պարզաբանում ստանալու համար։

Բացի դրանից՝ Արմենուհի Ղազարյանը դիմելու է նաև Սահմանադրական դատարան՝ պահանջելով նաև կասեցնել ՀՎԿ-ի գործունեությունը՝ մինչև առաջին ատյանի դատական ակտի վերջնական կայացումը՝ վճիռն ուժի մեջ մտնելը։

Արմենուհի Ղազարյանի դիտարկամամբ՝ իր և իր կուսակցության նկատմամբ նման վերաբերմունք է դրսևորվել Արթուր Բաղդասարյանի և ՕԵԿ անդամների մի շարք թերությունների մասին խոսելու համար։

«Այն պլատֆորմը, որի շուրջ ես համախմբվել էի նրանց հետ՝ միացյալ ուժերով երկիրն այս վիճակից դուրս բերելն էր։ Սակայն Արթուր Բաղդասարյանը շատ ինքնահավան մարդ է ու սուտ խոսքերով, ժողովրդին կուտ տալով՝ փորձում է մարդկանց հավաքել իր գլխին։ Նրանց դուր չէր գալիս, որ ես շատ թերություններ տեսնում էի, որոնց մասին բարձրաձայնում էի նաև կառավարման խորհրդի նիստերին, օրինակ՝ Փելեշյանին ՏԻՄ ընտրություններում նշանակում են քաղաքապետի թեկնածու առանց մյուս անդամներին հարցնելու և դա այն դեպքում, երբ Փելեշյանը գնում է Տեր հորն է ծեծում, ո՞վ է նա, որ քաղաքապետի թեկնածու առաջադրվի, կամ ՕԵԿ-ից գյուղապետի 3 թեկնածու են դնում, իսկ 26 հոգու՝ ՀՎԿ-ից են առաջադրում ու այսպիսի շատ բաներ։ Իրենց, հավանաբար, այնպիսի մարդիկ են պետք, ովքեր չորքոտանու նման գլուխները կախ պիտի ենթարկվեն իրենց ու առանց այդ էլ քանդված երկիրն իրենց հետ միասին կործանեն։ Այդ նույն Արթուր Բաղդասարյանը հատուկ հրահանգով քաղաքական դաշտը մաքրում էր, կուսակցություններին լուծարելու էր տանում, որպեսզի իրենք մնան իրենց մարդկանցով։ ԱԺ-ում էլ Հեղինե Բիշարյանը կամ Հովհաննես Մարգարյանը էդպես ամպագոռգոռ ելույթներ են ունենում, թե իբր իրենք ընդդիմադիր են, բայց հետո քվեարկում են իշխանահաճո ձևով։ Իսկ ես, կներեք, համաձայն չեմ այսպիսի մոտեցումների հետ»։

Տիկին Ղազարյանը վստահեցնում է, որ եթե ներպետական ատյաններում խնդրի օրինական, արդարացի և օբյեկտիվ լուծման չկարողանա հասնել, ապա կդիմի նաև ՄԻԵԴ։ Նա հույս հայտնեց, որ խնդրի լրջությունը հաշվի առնելով՝ այս անգամ դատարանը ճիշտ որոշում կկայացնի։

«Ամբողջական դատական համակարգը թաղված է կոռուպցիայի մեջ, Վճռաբեկ դատարանի նկատմամբ էլ ոչ մի վստահություն չունեմ, բայց ուզում եմ հավատալ, որ այս անգամ արդար վճիռ կլինի, քանզի սա այն դեպքն է, երբ մի ամբողջ ժողովրդի ճակատագրի հարց է քննարկվում և այդ ժողովրդի մասնիկ են կազմում նաև դատավորները։ Դատարանից պահանջելու եմ, որ ՀՎԿ-ի գրանցման վարչական ակտերը առոչինչ ճանաչեն և դրանից հետո, բնականաբար, ես պահանջելու եմ նաև բարոյական վնասի հատուցում՝ 3 միլիոն դրամի չափով։ Հիմա մարդիկ կմտածեն, թե նյութական շահ եմ հետապնդում, բայց դա նյութական շահ չէ, այլ օրենքի պահանջն է ինձ խաբելու և իմ իրավունքներն ոտնահարելու համար»։

«Հայկանդուխտ» ավանդապաշտ-ժողովրդավարական կուսակցությունը գործունեություն է ծավալում 1994թ-ից և կուսակցության նախագահի հավաստամամբ՝ այսօր կուսակցությունում կա գրանցված 3850 անդամ և այն ժամանակ նրանք պայքարել են խաբված ավանդատուների շահերի պաշտպանության համար։

«Ի դեպ՝ դեռևս 2006թ-ից Արթուր Բաղդասարյանը փորձում է խաբված ավանդատուների հարցերով զբաղվել և այսօր էլ հայտարարում է, թե ժողովուրդ, ովքեր բանկերից իրենց ավանդները չեն հասցրել ստանալ, ուրեմն գնացեք ՀՎԿ-ի գրասենյակներ ու ձեր տվյալները թողեք։

Ես՝ Արմենուհի Ղարզարյանս ուզում եմ ասել, որ ժողովուրդ ոչ մեկդ չգնաք, կրկին խաբեություն են ուզում անել՝ գալիք ընտրություններին են պատրաստվում, փորձում են ձեր տվյալները վերցնել ու օգտագործել։ Ի օգուտ ձեզ՝ ոչ մի բան էլ չեն անելու»,- եզրափակեց նա։