«Ավելացող տարիները, իհարկե, վախեցնում են ինձ, բայց ես շատ գոհ եմ ինձնից»․ Օլյա Հակոբյանը՝ տարեդարձի, օրվա անակնկալի և գեղեցկանալու մասին

Դերասանուհի Օլյա Հակոբյանն այսօր տոնում է 33–ամյակը։ Tert.am Life–ի հետ զրույցում Օլյան ասաց, որ շատ է սիրում ծննդյան օրը, սակայն օրվա հետ կապված հատուկ ծրագրեր չունի։ Ամեն դեպքում, ընկերները կարողացել են հաճելի անակնկալ մատուցել դերասանուհուն։

«Օրս շատ լավ եմ սկսել։ Գիշերը քնած էի, ընկերներս եկան մեր տուն, ցոգոլով տորթ էին բերել։ Շատ ուրախացա, որովհետև չէի սպասում։ Օրս շատ հավես ու լավ սկսեցի։ Թե ինչպես կանցկացնեմ երեկոս, հատուկ չեմ պլանավորել, հուսամ՝ չծրագրած օրը շատ ավելի լավ կանցնի,– ասաց նա ու հավելեց, որ իր օրը պարտադրում է, որ շրջապատում բոլորն ուրախ լինեն։ –Չափից շատ եմ սիրում ծննդյանս օրը։ Այն մարդկանց, ովքեր կողքիս են, կարելի է ասել, պարտադրում եմ, որ այսօր լինեն կողքիս և, անպայման, ունենան լավ տրամադրություն։ Հասկանում եմ, որ դա եսասիրական է, բայց իմ ծնունդն է, կարծում եմ, որ տարին մեկ անգամ ունեմ իրավունք պահանջելու»։

Տարիների հետ մեծացող թվերն Օլյային վախեցնում են, բայց փորձում է չսևեռվել դրանց վրա՝ գնահատելով ունեցածը․ «Տարիները, իհարկե, վախեցնում են ինձ, ո՞ւմ չեն վախեցնում, բայց ես շատ գոհ եմ ինձնից, ինձ չի վախեցնում տարիքս այն առումով, որ ես ինձ շատ լավ եմ զգում։ Հուսամ՝ իմ հետագա կյանքը նույնքան լիքը կլինի, որքան այս տարիների ընթացքում է եղել»։

Տարեցտարի նկատելի է, թե ինչպես է Օլյան աշխատում արտաքնի, կառուցվածքի վրա, կատարելագործում այն։ Վստահեցնում է՝ այդպես տարիքի դեմ չի պայքարում․ «Անկեղծ ասած, երբեք չեմ մտածել գեղեցկանալ տարիքի դեմ պայքարելու համար։ Ես ուղղակի ունեմ լավ տրամադրություն և ուզում եմ լինել գեղեցիկ»։

Դերասանուհու 2 որդին՝ 7–ամյա էրիկն ու 6-ամյա Ռոբերտը, վաղ առավոտյան են շնորհավորել մայրիկին։ «Երկուսով շատ էին սպասում ծննդիս, հաշվում էին օրերը, առավոտյան շնորհավորեցին, ասացին, որ անակնկալ ունեն և գնացին դպրոց»,– ժպիտով պատմեց Օլյան։

Հենց նրանց է դերասանուհին համարում իր կյանքի ամենամեծ ձեռքբերումը․ «Միանշանակ կյանքի ամենամեծ ձեռքբերումը տղաներս են։ Դրանից լավ բան իմ կյանքում չի եղել։ Աստված իրենց էլ, ինձ էլ առողջություն տա, որպեսզի իրար հետ երկար ճանապարհ անցնենք»։

Դերասանուհու կյանքում կորուստներ էլ են եղել, բայց նա դրանց վրա չի կենտրոնանում։ «Կորուստներ շատ եմ ունեցել, բայց երբեք չեմ ընկճվում։ Փառք Աստծո, որ դրանք շատ մեծ չէին, չեմ կարող նշել այնպիսի կորուստ, որն ինձ վրա ազդած լինի։ Փորձում եմ առաջ գնալ»,– ասաց նա։