«Իմանալով տարիքս՝ մարդիկ շոկ են ապրում». Վլադիմիր Արզումանյանը՝ ծննդյան օրվա, նպատակների և երկրորդ մասնագիտություն ձեռք բերելու մասին

«Մանկական Եվրատեսիլ 2010» մրցույթի հաղթող Վլադիմիր Արզումանյանն այսօր նշում է 23-ամյակը: Tert.am Life-ի հետ զրույցում նա խոսել է օրվա ծրագրերի, մարդկանց կողմից ավելի փոքր ընկալվելու, նպատակների և երկրորդ մասնագիտություն ձեռք բերելու մասին:

Ըստ երիտասարդ երգչի՝ օրը շատ լավ է սկսել, տրամադրությունը բարձր է: «Օրս կնշեմ մայրիկիս և նշանածիս հետ: Որոշ ժամանակ հետո ընկերներիս հետ ևս կնշեմ, բայց խնջույք չեմ ունենա, որովհետև չեմ սիրում: Նախընտրում եմ ինձ հարազատ մարդկանց հետ գեղեցիկ օր ունենալ, շքեղ խնջույքների կարիք չունեմ: Կարևոր է, որ կողքիդ մարդիկ մտածեն քո մասին և իրոք հարազատ լինեն քեզ»,- ասաց նա ու հավելեց, որ անակնկալներ ևս ունեցել է, բայց անակնկալը պետք է չբացահայտված մնա։

Վլադիմիրի խոսքով՝ տարեդարձի տորթի մոմերի հետ երազանքներ, հիմնականում, չի կապում: «Ավելի շատ նպատակի մարդ եմ՝ չնայած երբեմն երազում եմ: Նպատակից է կախված, թե երբ այն կիրականանա: Ինձ համար նպատակները շատ կարևոր են, աննպատակ ապրելը տխուր կլինի: Ճանապարհին, իհարկե, բարդություններ լինում են, և ոչ միայն իմ դեպքում: Ուղղակի չպետք է կոտրվել, որովհետև նպատակը կիսատ չպետք է թողնես: Իմ կյանքի ճանապարհներին բարդություններ եղել են կան ու կլինեն, ինչպես բոլորի դեպքում, բայց դրանք հաղթահարում եմ»,- ընդգծեց նա:

Երգիչն այս տարի դարձել է 23 տարեկան։ Նա նկատեց, որ մարդիկ իրեն փոքր են ընկալում: «Լինում է, երբ մարդիկ, իմանալով տարիքս, շոկ են ապրում, մտածում են պետք է 13 տարեկան լինեի: «Մանկական Եվրատեսիլ 2010»-ում իմ հաղթանակից 11 տարի անցել է, փոխվել եմ, մեծացել, բայց փոքր ընկալվելն ինձ չի խանգարում»,– ասաց նա։

Վլադիմիրը հայտնեց, որ շուտով նոր երգեր, տեսահոլովակներ կունենա և մարդկանց մոտ կտպավորվի այս արտաքինով ու այս տարիքում․ «Չեմ ուզում աշխատանքներից շատ մանրամասներ ասել, որպեսզի մարդկանց համար անակնկալ լինեն: «Արցախի ձայներ» խմբի համերգի ժամանակ Արթուր Գրիգորյանի հետ երգեցի «Նվիրական, հավերժ հայրենիք» երգը, որն Արթուր Գրիգորյանը գրել և երգել է պատերազմի ժամանակ, հետո որոշել է նաև ինձ հետ երգել: Ուրախ եմ, որ հնարավորություն ունեցա երգելու այդպիսի կայացած մարդու հետ: Երգն ինձ համար յուրահատուկ նշանակություն ուներ, պահ կար հուզվում էի»:

Խոսելով անձնական կյանքի մասին՝ Վլադիմիրն ասաց, որ այս տարի ամուսնություն չի նախատեսում: «Անձնական կյանքիս մասին շատ խոսել չեմ սիրում, բայց այս տարի դժվար թե ամուսնանամ, միգուցե մյուս տարի»,- նշեց  նա:

Երգիչը պատմեց, որ հիմա երկրորդ մասնագիտություն է սովորում: «Արցախի Մաշտոցի անվան համալսարանի իրավաբանական ֆակուլտետի առաջին կուրսում եմ: Ուզում էի ևս մեկ մասնագիտություն ունենալ, իրավաբանությամբ վաղուց եմ հետարքրքվում, ուղղակի հիմա էր հարմար կրթություն ստանալ, սովորելու համար երբեք ուշ չէ: Չգիտեմ՝ կշարունակե՞մ այդ ուղղությամբ, թե՞ ոչ, տեսնենք, թե կյանքն ինչ ցույց կտա»,- եզրափակեց նա: