Գնե՞լ, թե՞ չգնել սիգ
Տնտեսություն
«Փաստ» օրաթերթը գրում է.
Թեև սիգ տեսակի ձկան որսն արգելվել է Բնապահպանության նախարարության կողմից, բայց մինչ օրս շարունակվում է այդ ձկնատեսակի ապօրինի որսը Սևանա լճում և վաճառքը հայաստանյան քաղաքներում:
Բնապահպանության նախարարության բնապահպանական պետական տեսչության պետի տեղակալ Իգոր Սարգսյանը «Փաստ»-ի հետ զրույցում նշեց, որ հնարավոր չէ Սևանա լճի ողջ տարածքում շուրջօրյա հսկում իրականացնել: Նրա խոսքով՝ Սևանա լճից մոտ 99 ցանց և երկու նավակ է առ այսօր առգրավվել, որոնք նախատեսվում է ոչնչացնել, դրանից բացի, մինչ օրս 1357 ձուկ է առգրավվել:
– Ինչպես բնապահպանության նախարարությունն է տեղեկացնում, որսի արգելքի 12 օրերի ընթացքում հայտնաբերվել են սիգի ապօրինի վաճառքի բազմաթիվ դեպքեր: Մասնավորապես 1300 ձուկ է առգրավվել: Ինչպե՞ս է ստացվում, որ մի քանի կառույցներ համատեղ հսկում են իրականացնում, սակայն այսպես էլ չի հաջողվում բացառել ձկնագողությունը:
– Բնականաբար Սևանա լիճը մեծ է, ամբողջությամբ չենք կարողանում տարածքը հսկել: Հիմնականում գիշերային ժամերին են որսագողություն անում: Նախորդ տարիների համեմատությամբ բավական իջել են որսագողության դեպքերը: Հիմնականում շեշտը դրել ենք բացատրական աշխատանքների վրա, որպեսզի մարդիկ ձեռնպահ մնան ձուկ որսալուց:
– Առանց հովանավորության հնարավոր չէ նման հսկողության պայմաններում անգամ գնալ լճից ձուկ հանելու ռիսկի, իսկ ըստ պաշտոնական տվյալների՝ Սևանա լճում ձկնորսական ցանցեր ու նավակ են հայտնաբերվել: Սրանից հետևո՞ւմ է, որ ապօրինի որս իրականացնողների հետևում մեծ կշիռ ունեցող անձնավորություն կա կանգնած:
– Ոչ, չի հետևում, բացառվում է նման բան: Գոնե առնվազն մինչ այսօր չեն եղել այնպիսի դեպքեր, որ հովանավորները միջամտեն: Ուղղակի ձկնորսները ինքնակամ մտնում են, չեն լսում հորդորները: Որոշների նկատմամբ պատժամիջոցներ ենք կիրառում՝ այս պահի դրությամբ չորս քրեական գործ կա հարուցված յոթ անձանց նկատմամբ:
– Եթե ըստ հաղորդագրության՝ լճին հարակից համայնքների ղեկավարների հորդորով գյուղերի բնակիչներն իրենց լողամիջոցները հանել են լճից, այդ դեպքում ապօրինի որսն ովքե՞ր են անում:
– Ամբողջությամբ չեն հանել: Մենք ափամերձ տարածքների համայնքների ղեկավարների հետ հանդիպել ենք բնակիչների, որսորդների հետ: Մեր հորդորներով շատ շատերն են ձեռնպահ մնացել: Անցած տարիների համեմատ՝ հիմա վերահսկողությունը շատ խիստ է:
– Ի՞նչ քայլեր պիտի ձեռնարկել, որպեսզի ձկների ապօրինի որսը ոչ միայն արգելված լինի խոսքով, այլև իսկապես չլինի:
– Մարդիկ պարզապես չեն լսում հորդորները, չեն պատկերացնում, որ այսօրվա մեկ օրը կկերակրի տարին: Եթե ձվադրման շրջանում կարողանան ձեռնպահ մնալ, ապա մյուս տարի կամ երկու տարի անց արդեն արդյունագործական չափերի կհասնի ձկան պաշարը, և օրինական կարգով՝ թույլտվություններով, մարդիկ որս կանեն ու չեն համարվի իրավախախտ կամ հանցագործ: Ձվադրման ավարտին մնացել է մի 10 օր: Սա միայն բնապահպանների խնդիրը չէ: Մենք չենք կարող լճի ամբողջ տարածքով՝ ամեն մի ճանապարհի, ամեն մի ափի ու ամեն մի կիլոմետրի վրա օրուգիշեր մարդ կանգնեցնել, որպեսզի նա չթողնի ձկնորսներին մտնել ջուր: Սա մեր բոլորիս խնդիրն է:
– Մեր տեղեկություններով, շրջայց իրականացնող անձինք գալիս են լճի մոտակայքում ձուկ վաճառող անձանց բռնում, իսկ լճի վրա իրենց նավակներում որս անող անձանց չեն էլ մոտենում: Սա ինչպե՞ս կմեկնաբանեք:
– Այդքան էլ այդպես չի: Եթե մեր նավերը լճի վրա մի ուղղությամբ գնում են, այն մյուս ուղղությունից ձկնգողը մտնում է, մինչև գալիս ենք՝ նա արդեն չկա: Վաճառքի կետերում առգրավումներ կատարելով և քրեական գործեր հարուցելով որոշակիորեն նպաստում ենք, որ ձուկ հանողին ֆինանսապես ձեռնտու չլինի լիճ մտնելը:
Շարունակությունը` «Փաստ» օրաթերթի այսօրվա համարում:
1
2
3
4
5
1
2
4
5
2
