Արևմուտքն արձագանքել է Ռուսաստանի դեսպանի սպանությանը

Դեկտեմբերի 19-ին Թուրքիայում ցուցահանդեսի բացման ժամանակ սպանվել է Ռուսաստանի դեսպան Անդրեյ Կարլովը, ինչը դարձել է արևմտյան ԶԼՄ-ների գլխավոր թեման։

The Guardian պարբերականը տեղի ունեցածը համեմատել է 1914թ. ավստրիացի էրցհերցոգ Ֆրանց Ֆերդինանդի սպանության հետ և գրում է, որ հանցագործությունը կարող է նոր կայծ հանդիսանալ տարածաշրջանային հերթական հակամարտության համար։ Պարբերականը նաև գրում է, որ, ամենայն հավանականությամբ, ՌԴ-ի և Թուրքիայի նախագահներ Վլադիմիր Պուտինն ու Ռեջեփ Թայիփ Էրդողանը «ընդհանուր լեզու կգտնեն», որպեսզի մեղքը բարդեն իրենց ենթադրյալ ռազմավարական հակառակորդների վրա։

Ամերիկյան The New York Times թերթը գրում է, որ այս իրադարձության հետևանքը դեռևս դժվար է գնահատել երկարաժամկետ հեռանկարում։ Վերջին կես տարվա ընթացքում երկու երկրների միջև հարաբերությունները զգալիորեն ջերմացել են այն բանից հետո, երբ թուրքական ռազմաօդային ուժերը հարվածեցին ռուսական ինքնաթիռը։ Սակայն պարբերականի կարծիքով՝ դեսպանի սպանությունը հազիվ թե դառնա ՌԴ-ի և Թուրքիայի միջև հարաբերությունների խզման նոր պատճառ, ընդհակառակը՝ կմտերմացնի երկրներին՝ Սիրիայում ահաբեկչության դեմ պայքարի հարցում։

«Արդյոք դեսպանի սպանությունը վրե՞ժ էր Թուրքիայի հետ Պուտինի «կեղտոտ գործարքի» համար»՝ նման հարցադրում է անում Մայքլ Բեռլին Daily Mail բրիտանական պարբերականում։ Ռուս դեսպանի վրա հարձակումը տեղի ունեցավ Սիրիայի հարցով երկկողմ բանակցություններից մեկ օր առաջ՝ մատնանշում է հոդվածի հեղինակը։ Խելքին մոտ է կարծել, որ Կարլովին կրակած ոստիկանը նրանցից մեկն է, որն աջակցում է Սիրիայի ընդդիմադիր ուժերին, որոնք կռվում են Բաշար Ալ-Ասադի դեմ։

Ամերիկյան The Washington Post պարբերականն էլ գրում է, որ դեսպանի սպանությունը ամենալպիրշ և ցուցադրական հարձակումն է Ռուսաստանի դեմ՝ Սիրիայի պատերազմին մասնակից լինելուց ի վեր։

Ռուսաստանի դեսպանի սպանությունը կարող է զգալիորեն ազդել Սիրիայի պատերազմի ընթացքի վրա՝ կարծում է Tagesspiegel-ի լրագրող Սյուզան Գյուստենը։ Թուրքիայի դիրքերը ռազմական հակամարտությունում կթուլանան, իսկ Ռուսաստանը հետագայում կարող է մեծ աջակցության հույս ունենալ Անկարայի կողմից։

The Time թերթն իր հերթին գրում է, որ դեսպանի սպանությունը նոր փորձություն կարող է լինել Պուտին-Էրդողան նոր միության համար։ Սպանված դեսպանը գլխավոր միջնորդներից մեկն էր Ռուսաստանի, Թուրքիայի և Իրանի միջև հարաբերություններում, նա քաջատեղյակ էր Ռուսաստանի կողմից դաշինքների ստեղծման այն կողմերից, որոնց մասին ՌԴ-ն հաճախ նախընտրում է լռել՝ գրում է թերթը։