«Ծաղիկներ ձյան տակ» սերիալն այս փուլում ավարտվում է. վերջին սերիայի օրն ու նոր եթերաշրջանում սպասվող փոփոխությունները

«Ծաղիկներ ձյան տակ» հեռուստասերիալի առաջին եթերաշրջանը հունիսի 5-ին ավարտվում է։ Նախագծի պրոդյուսեր Ելենա Արշակյանն այս մասին հարցազրույցը վստահել է Tert.am Life-ն ու խոսել ինչպես ավարտի, այնպես էլ երկրորդ եթերաշրջանի մասին։

«Առաջին եթերաշրջանի ավարտն այն պատճառով է, որ հունիսին «Արմենիա TV»-ն սկսում է Ֆուտբոլի Եվրոպայի առաջնության ցուցադրությունը։ Մենք կվերադառնանք եթեր ֆուտբոլի ավարտից անմիջապես հետո`  հուլիսի 13-ից»,- հայտնեց նա։

Ելենայից հետաքրքրվեցինք, թե ինչպես են դադարներն անդրադառնում նախագծերի վրա. «Մենք նախագիծը եթերաշրջանով ներկայացնելու փորձ էլի ենք ունեցել, երբ «Պատվից առավելն» էինք նկարահանում։ Եթեր վերադարձին հեռուստադիտողը շատ կարոտած էր սպասում։ Անկեղծ կասեմ` մեզ համար տարբերություն չկա` նախագիծը կընդհատվի, հետո կվերադառնանք եթեր, թե՞ ոչ։ Մեր հեռուստադիտողը մեզ հավատարիմ է, ինչպես մենք իրեն»։

Ամեն դեպքում դադարից հետո պետք է նոր թափով վերադառնալ. պրոդյուսերը սա շատ լավ է հասկանում և խոստանում է հետաքրքիր փոփոխություններ։

«Սերիալը հեռուստադիտողի կողմից շատ սպասված տեղում է ավարտվելու։ Ես խոստանում եմ, որ մենք վերադառնալու ենք շատ հետաքրքիր նոր կերպարներով, գունեղ, հետաքրքիր վայրերում նկարահանումներով։ Եգիպտոսում մեր ունեցած նկարահանումները հեռուստադիտողները կտեսնեն երկրորդ եթերաշրջանում։ Մոսկվայում ևս նկարահանումներ ենք ունեցել, որոնք կտեսնեն այդ ժամանակ։ Մենք շատ պատասխանատու ենք մոտենում աշխատանքին»,- ասաց Ելենան։

Անդրադառնալով Եգիպտոսում նկարահանումներին` նա նշեց, որ իր հետ մեկնել էին գլխավոր հերոսների դերակատարները` Նորայր Եղյանն ու Ռոմելա Սարգսյանը։ Ստացված նկարահանումների համար դերասանուհին հաղթահարել է իր մեծ վախը։

«Տեսարան էինք նկարահանում, որտեղ Ռոմելան և Նորայրը պետք է լողային։ Նորոն շատ լավ է լողում, իսկ Ռոմելան սարսափում էր լողալուց։ Չէինք կարողանում նկարահանել իր վախի համար, սակայն Նորոն համոզեց Ռոմելային։ Նա վստահեց Նորոյին ու մտավ ծովը։  Այդ տեսարանները նկարահանվել են 50-60 մետր խորությամբ հատվածներում, որտեղ Ռոմելան եղել է առանց անվտանգության  պարագաների։ Լողում էր Նորոյի հետ` հաղթահարելով իր վախը»,- պատմեց պրոդյուսերը։

Հարցին` նրանց մասնակցությամբ բաց տեսարաններ եղե՞լ են, Ելենան պատասխանեց. «Չգիտեմ` որն է բաց ու փակ տեսարանը, ինչպես չգիտեմ` որն է բացասական ու դրական կերպարը։ Ունեցել ենք հետաքրքիր տեսարաններ»։

Հստակեցնող հարցին` համբույրի կամ անկողնային տեսարաններ կա՞ն, թե՞ ոչ, Ելենան նախընտրեց  ինտրիգ պահող պատասխան տալ` «Չգիտեմ։)»։

Ի դեպ, Նորայրը երկրորդ անգամ է ճանապարհ գնում Ելենայի հետ։ Նա նաև սերիալի` Մոսկվա մեկնած կազմում էր։ Թե ինչով էր պայմանավորված այս ընտրությունը, Ելենան պատասխանեց. «Իմ ճանապարհի ընկերների ցանկում տեղ ունեն բոլոր լավ մարդիկ ու լավ դերասանները»։