«Էրիկը շատ էր ուրախացել». Օլյա Հակոբյանի և Աբել Աբելյանի ավագ որդու 8-ամյակի թեմատիկ խնջույքն ու անակնկալները

Դերասանուհի Օլյա Հակոբյանի և դերասան Աբել Աբելյանի ավագ որդին՝ Էրիկը, երեկ դարձել է 8 տարեկան: Օլյան Tert.am Life-ին է տրամադրել ծննդյան խնջույքի լուսանկարներն ու պատմել օրվա մանրամասների և որդու մասին:

Դերասանուհու խոսքով՝ կեսգիշերին որդուն անակնկալ են մատուցել դերասան Դավիթ Աֆրիկյանն ու օպերատոր Հայկ Գաբրիելյանը, որոնք իր մտերիմ ընկերներն են: «Տորթով եկան մեր տուն, Էրիկը շատ ուրախացավ, չէր սպասում: Մոմերը փչեց, երազանք մտապահեց: Քնած չէր, որովհետև շատ է սիրում իր ծննդյան օրը, բոլորին խնդրում է իրեն բարեմաղթանքներ ասել: Դա սովորել է դպրոցում, որտեղ բոլորի ծննդյան օրերին բարեմաղթանքներ են ասում: Նույնիսկ եղբայրը եկավ, շնորհավորեց, Էրիկն ասաց՝ իրեն պետք է բարեմաղթանք ասի: Ով զանգում, շնորհավորում էր,բարեմաղթանքներ էր ուզում: Այդ դրվագը, իսկապես, ծիծաղելի էր»,- պատմեց նա:

Օլյան ասաց, որ Էրիկին անակնկալ են նաև մատուցել դպրոցում: «Երեկ դպրոցի վերջին օրն էր, Էրիկը փոխադրվեց երրորդ դասարան: Դպրոցում ևս նրան անակնկալ էին մատուցել: Ուսուցիչները պիցցայից տորթ էին պատրաստել, ինչից Էրիկը շատ էր ուրախացել: Շնորհակալ եմ, որ նման կրեատիվ բան են մտածել: Դպրոցում Էրիկը շատ ընկերներ ունի, ամբողջ դասարանի հետ ընկերություն է անում»,- ասաց նա:

Օլյան և նախկին ամուսինը՝ Աբելը, սրճարաններից մեկում իսկական տոն են կազմակերպել իրենց որդու համար։ Միջոցառմանը ներկա են եղել նրա դասընկերները․ «Խաղավար էր եկել, որի հետ երգեցին, պարան քաշեցին ու խաղացին այլ զանազան խաղեր: Էրիկն ասում էր, որ ոչ մեկի ծննդյան օրն այդքան լավ չի անցել: Տորթն էլ հատուկ թեմայով էր: Քանի որ ամեն տարի իր հետաքրքրություններն ու սիրելի հերոսները փոխվում են, այս տարի տորթը «Minecraft» վիդեոխաղի թեմատիկայով էր: Կրկին մոմեր փչեց, երազանք մտապահեց, ինչն իր մոտ երկու րոպե տևում է: Հետո ոչ ոքի չի ասում, թե ինչ է մտապահել, որովհետև գիտի՝ այդ դեպքում երազանքները չեն իրականանա»:

Օլյան ընդգծեց, որ թե՛ ավագ որդին՝ Էրիկը, թե՛ կրտսերը՝ Ռոբերտը, նվերների հարցում չափավոր են: «Երբեք ծննդյան օրը հատուկ նվերներ չեն խնդրում: Նույնիսկ երբ ինչ-որ բան էլ խնդրում են ու ասում ենք, որ դա այնքան էլ լավ բան չէ, չեն շարունակում: Իհարկե, ես հատուկ նվեր էի գնել իր համար, զարգացնող խաղ էր, նման բաներով հետաքրքրվում է: Երեկ մեծ քանակությամբ խաղալիքներ է ստացել, ամբողջ օրը մտածում էր՝ ոչինչ չմոռանամ այնտեղ: Էրիկը շատ էր ուրախացել, վերջում ոգևորված հայտարարեց, որ իր միակ ծնունդն էր, երբ խաղալիքներն էին շատ, ոչ թե հագուստը»,- ասաց Օլյան:

Մայրիկը նկատեց, որ երկու եղբոր հարաբերությունները հրաշալի են, իրար շատ են սիրում: «Վերջերս Էրիկի հետ մի տեղ էի գնացել, որտեղ նրան քաղցրավենիք նվիրեցին: Չէր ուզում այդտեղից դուրս գալ, ասաց՝ Ռոբերտի համար էլ է պետք: Միշտ կիսվում են իրար հետ: Երբ նրանցից մեկին խաղալիք եմ գնում, ասում են՝ բա մյուսի՞ն»,- պատմեց նա:

Դերասանուհին ասաց, որ Էրիկի հետ արդեն զրույցներ է ունենում: «Մտածում է մասնագիտության ընտրության մասին, ինձ տարբեր հարցեր տալիս: Նույնիսկ մտածում է՝ տվյալ մասնագիտությամբ գումար կկարողանա՞ աշխատել, թե՞ ոչ: Էրիկը շատ նախասիրություններ ունի, տարբեր խմբակների է հաճախել, հիմա համակարգչային խաղերով ու ֆուտբոլով է հետաքրքրվում: Նույնիսկ որոշել է, որ պետք է ֆուտբոլիստ դառնա, օգոստոսից մարզումների կհաճախի: Թե՛ Էրիկը, թե՛ Ռոբերտն իրենց հայրիկի՝ Աբելի ստուդիա են հաճախում, բայց կարծում եմ՝ Էրիկը չի ցանկանա դերասան դառնալ, դա այնքան էլ նրանը չէ: Ինձ շատ են առաջարկել, որ տարբեր նախագծերում նկարահանվի, նույնիսկ մի անգամ գեղարվեստական ֆիլմի համար քաստինգի եմ տարել, բայց զգացել եմ, որ նրան այդ ասպարեզում ոչինչ չի հուզում»,- եզրափակեց Օլյան: