Կառավարությունը խստացրեց պատիժները

«Լրագիր»

Կառավարությունն այսօրվա նիստում հաստատեց Քրեական օրենսգրքում փոփոխությունների ու լրացումների նախագիծը:
Արդարադատության նախարար Արփինե Հովհաննիսյանը կառավարության նիստում ասաց, որ խմբագրվել է օրենսգրքի 205-րդ հոդվածը, ըստ որի՝ հարկը, տուրքը, պարտադիր այլ վճարը նվազեցնելու համար կեղծ փաստաթուղթ օգտագործելը պատժվում է տուգանքով՝ նվազագույն աշխատավարձի երկուհազարապատիկից երեքհազարապատիկի չափով, կամ ազատազրկմամբ՝ երկուսից հինգ տարի ժամկետով: Նույն արարքը, որը կատարվել է առանձնապես խոշոր չափերով, պատժվում է ազատազրկմամբ՝ հինգից տասը տարի ժամկետով՝ գույքի բռնագրավմամբ:
Նախարարն ասաց, որ այսօրվա օրենսդրությամբ հանցագործության պահին սահմանված նվազագույն աշխատավարձի երկուհազարապատիկի (2.000.000 ՀՀ դրամ) փոխարեն առաջարկվում է սահմանել նվազագույն աշխատավարձի չորսհազարապատիկը (4.000.000 մլն ՀՀ դրամ):
Հիմնավորումն այն է, որ 2006թ-ից մինչ օրս՝ գրեթե 9 տարի, նշված նորմի շեմը չի վերանայվել՝ պահպանելով հանցագործության պահին սահմանված նվազագույն աշխատավարձի երկուհազարապատիկի չափը (2.000.000 ՀՀ դրամ)։ Մինչդեռ, 2006թ-ից առ այսօր նվազագույն աշխատավարձի շեմն աճել է մոտավորապես կրկնակի անգամ՝ 20.000-ից հասնելով 55. 000 ՀՀ դրամ, իսկ ՀՀ քրեական օրենսգրքի 205-րդ հոդվածի 3-րդ մասով նախատեսված խոշոր չափը՝ 2.000.000 ՀՀ դրամը փոփոխության չի ենթարկվել։