«Ծնողներիդ վաստակած գումարն առանց մտածելու ես ծախսում, քոնը՝ ոչ». Գևորգ Մկրտչյանը՝ 16 տարեկանում իր վաստակած գումարով առաջին մեծ գնման և նոր մեքենայի մասին

Երգիչ, դերասան Գևորգ Մկրտչյանն աշխատել սկսել է 15-16 տարեկանից: Tert.am Life-ի հետ զրույցում նա խոսել է առաջին աշխատանքի, իր վաստակած գումարով հեռախոս և մեքենա գնելու, տուրիզմի ոլորտում ունեցած կրթության մասին:

Ըստ Գևորգի՝  աշխատել սկսել է ավարտական դասարաններում: «Այդ ժամանակ ապրում էի Աշխաբադում: Այնտեղ ոսկյա զարդերի խանութ ունեինք, այդ շրջանում տատիկս վատառողջ էր,  խանութում ես էի աշխատում որպես վաճառող, որովհետև ոսկյա զարդերի խանութն ամեն մեկին վստահել չէինք կարող: Իմ նախաձեռնությունն էր, բայց ծնողներս ողջունեցին: Բնականաբար, դասերս մի փոքր տուժում էին, բայց առանձնապես չէի էլ ուզում օտար երկրում շփվել օտարազգիների հետ, ինձ համար խանութում նստելը, աշխատելն ավելի հետաքրքիր էր»,- պատմեց նա:

Ըստ երգչի՝ չի հիշում, թե որքան գումար է վաստակել առաջին անգամ: «Միայն հիշում եմ, որ iphone 6-րդ սերնդի հեռախոսը նոր էր վաճառվում, երբ իմ վաստակած գումարով գնեցի այն: Այդ ժամանակ 16 տարեկան էի»,- պատմեց նա:

Գևորգն ընդգծեց, որ ուղղակի փորձում էր ինքնուրույն գումար վաստակել: «Կարծում եմ՝ փոքր տարիքից պետք է ֆինանսապես կայանաս: Դա հետագայում քեզ օգնում է, սկսում ես ծախսերդ հաշվարկել, գնահատում ես այդ գումարը: Երբ դու ես վաստակում, այլ կերպ ես ծախսում գումարը, երբ ծնողներդ են տալիս, կարծես առանց մտածելու ծախսես: Հարգում եմ յուրաքանչյուրին, ով փորձում է աշխատել: Կապ չունի, թե դա ինչ աշխատանք է, իմ աչքերում աշխատող մարդն ավելի բարձր է թվում»,- նկատեց նա:

Երգիչը պատմեց, որ կրթություն ստացել է տուրիզմի ուղղությամբ, ժամանակին փորձել աշխատել հենց այդ մասնագիտությամբ: «Դիմել եմ օդանավակայան, այլ տեղեր աշխատելու համար, բայց պատասխաններ չեմ ստացել: Կարծում եմ՝ պատճառն այն էր, որ Հայաստանի քաղաքացի չեմ: Դրանից հետո սկսեցի որպես երգիչ ներկայանալ, բայց չեմ փորձել կրկին տուրիզմի ոլորտում աշխատանք փնտրել: Հիմա զբաղվածությունս այնքան շատ է, որ չեմ հասցնի»,- նշեց նա:

Գևորգը նաև շեշտեց, որ իրեն շատ են հարցնում, թե ինչո՞ւ տուրիստական ընկերություն չի բացում: «Դա իմ մասնագիտության մեջ է մտնում, կարող եմ գիտելիքներս օգտագործել այդտեղ: Հանրային մարդ լինելն էլ շատ կօգնի այդ գործում, բայց դեռ ժամանակ չունեմ»,- ասաց նա:

Երգիչը նաև հայտնեց, որ մոտ մեկ ամիս առաջ նոր մեքենա է ձեռք բերել սեփական միջոցներով: «Մոտ մեկ ամիս առաջ իմ վաստակած գումարով Mercedes c class 2017 թվականի արտադրության մեքենա եմ գնել, որն իմ երրորդ մեքենան է: Ուղղակի որոշեցի փոխել հին մեքենաս ու նորը գնել»,- եզրափակեց նա: