Հղիության 6-րդ ամսում գտնվող կինը կալանավորվել է. դատախազն ու դատավորը տեղյակ չեն եղել

Պաշտոնական փաստաթղթեր վնասելու համար մեղադրվող 39-ամյա Սուսաննա Թադևոսյանը, ով գտնվում է հղիության վեցերորդ ամսում, հետախուզման մեջ գտնվելուց հետո հայտնաբերվել է և տեղափոխվել «Աբովյան» քրեակատարողական հիմնարկ:

Այս մասին Tert.am-ի հետ զրույցում ասաց Սուսաննա Թադևոսյանի պաշտպան Աննա Թամազյանը:

«Իմ պաշտպանյալն ընդամենը մեկ անգամ չի ներկայացել դատարան, եղել է տանը, ոչ մի տեղ չի թաքնվել, ոստիկանությունը նրան տանը հայտնաբերել է և նա տեղափոխվել է «Աբովյան» ՔԿՀ: Հարց է առաջանում՝ հղիության վեցերորդ ամսում գտնվող կինն ո՞ւր պիտի փախչեր, որ ընդամենը մեկ դատական նիստի չներկայանալու համար վերջինիս խափանման միջոցը փոխել են և խափանման միջոց է ընտրվել կալանքը: Բացի դրանից՝ նրան առաջադրված մեղադրանքը նախատեսում է տուգանք, կալանք՝ մեկից երեք ամիս ժամկետով և մինչև երկու տարի ազատազրկում, իսկ նման պարագայում կալանք կիրառելու իրավունք չունեն, քանի որ կալանք կիրառելու համար պատժաչափը գոնե պետք է լինի 2 տարուց ավելին: Մեկ հանգամանք ևս՝ նա իր խնամքի տակ 1,5 տարեկան երեխա ունի»:

Հարցին, թե խափանման միջոց կալանքի դեմ պաշտպանն ի՞նչ քայլեր է ձեռնարկել, Աննա Թամազյանը պատասխանեց, որ գործը կասեցված է և դրա համար նախ պետք է այն վերսկսվի:

Իր պաշտպանյալին տեսակցելու համար էլ Աննա Թամազյանը երեկ դիմել է գործը քննող՝ Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանին, որտեղից իրեն պատասխանել են. ««Սուսաննա Թադևոսյանը գտնվում է հետախուզման մեջ և նրա վերաբերյալ քրեական գործը գտնվում է կասեցված վիճակում, այդ իսկ պատճառով չի կարող Ձեզ տրամադրվել համապատասխան թույլտվություն Սուսաննա Թադևոսյանին ՀՀ ԱՆ «Աբովյան» ՔԿՀ-ում տեսակցելու մասին»: Ես այցելել եմ ՔԿՀ, որտեղից ինձ ասել են, որ ՔԿՀ գնալիս գործը վերսկսելու մասին որոշում ներկայացնեմ: Ավելին՝ դատախազին ես եմ հայտնել, որ իմ պաշտպանյալը հայտնաբերվել և տեղափոխվել է «Աբովյան» ՔԿՀ: Նրանք տեղեկացել են դեպքից երեք օր հետո միայն»:

Այնուամենայնիվ, պաշտպանի մոտ հարց է առաջացել, թե ինչու է հետախուզման մեջ գտնվող անձը գտնվում տանը. «Եթե անձը հետախուզման մեջ է, ինչու են գալիս տնից հանում տանում: Ավելին՝ ասում են, թե ինչ-որ թուղթ կա ստորագրելու, սակայն խաբեությամբ տանում են վստահությունը չարաշահելով: Ի՞նչ վտանգ կարող էր ներկայացնել հղիության վեցերորդ ամսում գտնվող կինը, իրական հանցագործներին այդպես արագ չեն հայտնաբերում և ձերբակալում»,- ասում է պաշտպանը:

Աննա Թամազյանն ասաց, որ հղի կանանց «Նուբարաշեն» ՔԿՀ են տանում, սակայն Սուսաննա Թադևոսյանին տարել են «Աբովյան» ՔԿՀ. «Դատավորը ստորագրել է որոշում՝ «Նուբարաշեն» ՔՀԿ տանելու մասին, սակայն իմ պաշտպանյալին տեղափոխել են «Աբովյան»»:

Պաշտպանը հայտեց, որ Սուսաննա Թադևոսյանը գտնվում է բժիշկների հսկողության տակ, որոշակի խնդիրներ ունի, գտնվում է ռիսկային գոտում։

Նշենք, որ Սուսաննա Թադևոսյանը մեղադրվում է 2016թ. փետրվարի 1-ին Երևան քաղաքի Նալբանդյան թիվ 55 հասցեում դիտավորությամբ պաշտոնական փաստաթուղթ հանդիսացող` Երևան քաղաքի Նոր Նորքի 9-րդ զանգվածի Այգեգործների փող 19 հասցեի բնակիչ Մանվել Հարությունյանի անձնագրի 7-րդ էջը պատռելու մեջ:

Նրան մեղադրանք է առաջադրվել ՀՀ քրեական օրենսգրքի 324-րդ հոդվածի 2-րդ մասով, այն է՝ պաշտոնական փաստաթղթեր վնասելը, որը կատարվել է շահադիտական դրդումներով կամ անձնական այլ շահագրգռվածությունից ելնելով:

tert.am