«Շոու բիզնեսում կան մարդիկ, որոնք իրական կյանքում այլ են, հանրությանը ներկայանալիս՝ լրիվ այլ, հիասթափություններիցս մեկը դա է եղել»․ Իլոնա Մկրտչյան

18-ամյա դերասանուհի Իլոնա Մկրտչյանը վաղ տարիքից հեռուստատեսությունում հայտնվելու և դերասանուհի դառնալու ցանկություն է ունեցել։ Ասում է՝ չնայած արդեն  նկարահանվում է, ինքն իրեն դերասան չի կոչում, քանի որ համապատասխան կրթություն չունի։

Tert.am Life–ի հետ զրույցում Իլոնան պատմել է երազանքներին հասնելու, հաջողությունների և հիասթափությունների մասին։

Կարիերայի սկիզբը

«Ինքս ինձ վրա աշխատում եմ և փորձում եմ անել ամեն ինչ, որպեսզի արդարացնեմ ռեժիսորի պահանջները։ Դեռ վաղ տարիքից շատ եմ մասնակցել քասթինգներից, միշտ է եղել իմ պայքարը հանուն երազանքի։ Ես չունեմ կրթություն, սակայն փորձի միջոցով հասա այն արդյունքին, որը հիմա կա։ Այսինքն՝ ես, նկարահանվելով երկրորդական, երրորդական, չորրորդական կադրերում, փորձեցի հասկանալ, թե ինչ է կատարվում նկարահանման հրապարակում»,– ասաց նա։

Ինչ վերաբերում է համապատասխան կրթություն ստանալուն՝ Իլոնան նկատեց, որ բարձրագույն կրթություն ստանալու ցանկություն ունի, սակայն հստակ ոչինչ դեռ չի որոշել։

Նա պատմեց, որ վաղ տարիքում ծնողները լուրջ չեն վերաբերվել դերասանությամբ զբաղվելու իր ցանկությանը․ «Մայրս ուզում էր, որ ես ինտերիերի դիզայներ դառնայի, սակայն ժամանակի հետ ծնողներս սկսեցին հպարտանալ ինձնով և սատարել։ Ես զբաղվում եմ նրանով, ինչն ինձ հաճույք է պատճառում, սակայն դեռ չեմ հասել իմ «երազանքների աղջկան»։ Փոքրիկ քայլերով գնում եմ դեպի ցանկալի։ Հիմա ունեմ գեղարվեստական ֆիլմում նկարահանվելու առաջարկ, սակայն չակերտները բացել չեմ կարող, քանի որ հստակ պայմանավորվածություն առայժմ չկա։ Կա նաև սիթքոմում խաղալու առաջարկ»։

Իլոնայի խոսքով՝ նախապատվությունը տալիս է գեղարվեստական ֆիլմին։ Շատ է  ցանկանում է նկարահանվել Հրաչ Քեշիշյանի ֆիլմերում, միշտ առանձնացրել է նրա ֆիլմերը։

Իլոնան իրեն հաջողակ է համարում․ «Ամեն դեպքում ես հայտնվեցի այնտեղ, որտեղ երազում էի՝ ճիշտ ժամանակին, ճիշտ վայրում, ճիշտ մարդկանց հետ։ Ըստ իս, եթե իմ առաջին քայլերը անեի այլ մարդկանց հետ, հնարավոր է, հիասթափվեի ընտրածս ճանապարհից»։

Ընկերական շրջապատը և շոու բիզնեսը

Նոր ոլորտը նաև նոր շրջապատ բերեց Իլոնային։ Երիտասարդ դերասանուհին նշեց, որ ընկերների ընտրությունը բարդ է, քանի որ տարիների ընթացքում հիասթափությունը մեծացել է, փորձում է պահել ընկերական և գործնական հարաբերությունների բալանսը։

«Առհասարակ, ես բոլորի հետ ջերմ հարաբերություններ ունեմ, սակայն ավելի շատ գործնական հարաբերություններ եմ պահում։ Ժամանակի ընթացքում հասկանում ես, որ ոչ բոլորին է պետք մոտ թողնել, մտերիմ համարել, քանի որ հիասթափություններ են լինում։ Ունեմ ընկերներ, որոնց հետ արդեն տասը տարուց ավել է մոտ եմ։ Բայց և այնպես, իմ լավագույն ընկերը մայրս է»,– ասաց Իլոնան։

Երգչուհի դառնալու նպատակը

Դերասանի աշխատանքը կայուն չէ․ այս ոլորտի ներկայացուցիչները մի շրջան կարող են նկարահանվել, մի շրջան աշխատանք չունենալ։ Իլոնայի խոսքով՝ ցանկանում է ևս մեկ աշխատանք ունենալ, սակայն դա չի խանգարի դերասանությամբ զբաղվելուն։

«Վերջերս տեսահոլովակում նկարահանվելու առաջարկ ստացա իմ շատ սիրելի ռեժիսոր Կարեն Ամյանից։ Ճիշտ է, կան դերասաններ, որոնք հրաժարվում են ոչ հայտնի երգիչների տեսահոլովակներում նկարահանվելուց, սակայն ես այդպիսի խտրականություններ չունեմ, մեծ հաճույքով եմ մասնակցում այդ նկարահանումներին»,– ասաց Իլոնան։

Նա նաև երգչուհի դառնալու  նպատակ ունի։ Նա ասաց, որ դեռևս քայլեր չի անում, բայց ցանկանում է ներկայանալ ջազ ոճում։

Անկեղծությունն ու հիասթափությունը

Դերասանուհին ասաց, որ վերջերս շատ ակտիվ չէ սոցցանցերում։ Հետևորդների մեկնաբանություններին ու կարծիքներին, սակայն, Իլոնան հետևում է։ Նա ասաց, որ եղել են թե՛ ոգևորող, թե՛ հիասթափեցնող մեկնաբանություններ։

«Ամենից շատ ոգևորվում եմ Մկրտիչ Արզումանյանի մեկնաբանություններից և լայքերից։ Իսկ վատ մեկնաբանություններին ուշադրություն չեմ դարձնում կամ պարզապես ջնջում եմ դրանք։ Շատ են մեկնաբանություններ գրում արտաքնիս վերաբերյալ, կարծում են, թե պլաստիկ վիրահատությունների եմ դիմել։ Իրականում այդպես չէ, բայց սկսել եմ նորմալ վերաբերվել նման կարծիքերին»,– ասաց նա։

Իլոնան վստահեցնում է, որ ինքն անկեղծ է իր հետևորդների հետ։ «Իմ մեջ սիրում եմ անկեղծությունը, շատ անկեղծ եմ իմ լսարանի հետ և առհասարակ։ Շոու բիզնեսում կան մարդիկ, որոնք իրական կյանքում այլ են, հանրությանը ներկայանալիս՝ լրիվ այլ։ Իմ հիասթափություններից մեկի պատճառն էլ դա է եղել։ Ես ինձ ցույց եմ տալիս այնպիսին, ինչպիսին կամ՝ թերություններով, առավելություններով»,– ասաց Իլոնան ու հավելեց, որ իր ամենամեծ թերությունը համարում է շատ էմոցիոնալ լինելը, կցանկանար դա փոխել իր մեջ։ Միաժամանակ նկատեց, որ դա իրեն օգնում է աշխատանքի մեջ․ կարողանում է զգալ կերպարի էմոցիաներն ու փոխանցել դրանք։