«Չեմ ձգտում մեծանալ»․ «Սարի աղջիկ» սերիալից Աիդա Կարապետյանը՝ 19-ամյակի անակնկալների, փոխված կյանքի և իրականացած երազանքի մասին
Life
«Սարի աղջիկ» հեռուստասերիալից լսարանին հայտնի դարձած դերասանուհի Աիդա Կարապետյանն այսօր նշում է 19-ամյակը։ Նա նախատոնական ֆոտոշարք է իրականցրել, որը տրամադրել է Tert.am Life-ին և զրուցել մեզ հետ։
Աիդայի խոսքով՝ ուղղակի որոշել է, որ նախածննդյան ֆոտոշարք պետք է ունենալ։ «Ներկայացել եմ երկու պոչիկով, ինչպես դպրոցական աղջիկ։ Լուսանկարների ոճի միտքն իմն էր, ներկայանում եմ ինձնից փոքր աղջկա կերպարով, որովհետև չեմ ձգտում մեծանալ, սիրում եմ մանկական կերպարը»,- ասաց նա։
Դերասանուհին տոնական օրը սկսել է ընտանիքի անդամների հետ․ «Կեսգիշերին ընտանիքիս անդամները տորթով շնորհավորեցին ինձ, ինչպես ամեն տարի։ Կեսգիշերի անակնկալը սիրում եմ, ինձ համար այն տարիների հետ անհետաքրքիր չի դառնում։ Սիրում եմ ծննդյանս օրը, դրա հետ կապված անակնկալները՝ ևս։ Ամեն տարի օրը յուրովի է անցնում, մեծանում ես, կյանքի նոր փուլ մտնում, այլ հոգեվիճակի մեջ լինում։ Գիտակից տարիքում ծնողներիդ, եղբորդ վերաբերմունքը լրիվ այլ կերպ ես ընկալում»։
Դերասանուհին ասաց, որ այս տարի որոշել էր չնշել ծննդյանս օրը, բայց ծնողներն իր փոխարեն կազմակերպել են ամեն բան, մանրամասներից դեռ տեղյակ չէ։ Աիդան շեշտեց, որ նախորդ մեկ տարվա ընթացքում իր կյանքում շատ բան է փոխվել։
«Բուռն, հետաքրքիր զարգացումներով լի տարի էր։ Անցնող տարում կյանքս միանգամից փոխվեց, փոփոխությունները միայն դեպի լավն էին։ Ամեն օրս լեցուն, հետաքրքիր է անցել։ Այնպես չէ, որ մինչև նկարահանվելը հետաքրքիր կյանք չեմ ունեցել, ուղղակի այս ամենը լրիվ այլ էր։ Ամենախորհրդավորն այն է, որ նախորդ տարի մոմերը փչելիս մտապահածս երազանքը կատարվեց, և ես նկարահանվեցի։ Վստահ եմ, որ բոլորի երազանքները կիրականանան, այդ արարողությունը զուր չէ։ Այս տարի ևս երազանքս արդեն մտապահել եմ, հուսով եմ՝ կիրականանա։ Այնպես չէ, որ պարզապես երազում եմ իմ նստած տեղում։ Երազանքներս դարձնում եմ նպատակներ, համառորեն քայլում դրանց ուղղությամբ»,- ընդգծեց նա։
Երիտասարդ դերասանուհին իրեն երջանիկ է զգում․ «Ինձ երջանկացնում է նույնիսկ ամենաչնչին բանը։ Ես ուրախ եմ, որ լավ ընտանիք, հարազատներ, ընկերներ ունեմ։ Ձեռքբերում է, որ հիմա այնտեղ եմ, որտեղ կամ, պարային ասպարեզում ևս հաջողություններ եմ գրանցել։ Փորձում եմ ամեն րոպեն լիարժեք ապրել, որպեսզի հետո չափսոսամ»։
1
2
3
4
5
1
2
3
5
1
2
3
4
5
