«Մովեսին վաղուց ինձ հարազատ եմ համարում». Էվա Ոսկանյանը՝ Արցախի երկրորդ պատերազմում զոհված զինվորին նվիրված իր նոր երգի և ապրումների մասին

Երգչուհի Էվա Ոսկանյանի «Մամ ջան» կոչվող նոր երգն ու տեսահոլովակը նվիրված է Արցախի երկրորդ պատերազմում զոհված 19-ամյա Մովսես Սարգսյանին: Tert.am Life-ի հետ զրույցում Էվան պատմել է երգի ստեղծման, տեսահոլովակի նկարահանումների և իր ապրումների մասին:

Էվայի խոսքով՝ իր կյանքում երաժշտական իմ ամենամեծ դադարը եղել է պատերազմի շրջանում:

«Համրացած էի, չէի կարողանում անգամ մեկ նոտա սեղմել, երգել: Մի օր ինձ գտավ Սյուզի անունով աղջիկ, որն ասաց՝ պատերազմի թեմայով երգի խոսքեր է գրել, ուզում է, որ ես էլ երաժշտությունը գրեմ: Առաջին արձագանքս մերժումն էր, որովհետև չէի մտածում՝ այդ թեմայով կարող եմ ինչ-որ բան անել: Հետո Սյուզին ուղարկեց խոսքերն ու համաձայնեցի: Նրա քրոջ որդին՝ 19-ամյա Մովսես Սարգսյանը զոհվել էր Արցախի երկրորդ պատերազմում: Երգը Մովսեսին է նվիրված, Սյուզին լրիվ ուրիշ մասնագիտություն ունի, բայց այնքան լցված է եղել, որ գրել է խոսքերը: Երկար ժամանակ տղա կատարող էինք փնտրում, որովհետև երգը զինվորի խոսքն է մայրիկին, բայց չգտանք ու ես երգեցի»,- պատմեց նա:

Ըստ երգչուհու՝ ձայնագրման գործընթացն իր համար հուզական տեսանկյունից բարդ էր: «Ունեմ մտերիմ ու հարազատ մարդիկ: Նրանցից մեկն էլ Լիլիթ Նավասարդյանն է, որն ինձ օգնեց անել երգի գործիքավորումն ու ձայնագրությունը: Մի քանի հոգով հավաքվեցինք, էմոցիոնալ տատանումների գնով ստեղծեցինք այն, ինչ ունենք: Հուզմունքը երգելիս խանգարում էր, բայց պետք է սովորենք խոսել ու երգել այս մասին: Մովսեսին չեմ ճանաչել, բայց ուզում եմ լավ ճանաչել, փնտրել: Նրան վաղուց ինձ հարազատ եմ համարում»,- ասաց նա:

Տեսահոլովակի ռեժիսորը Հովհաննես Ղազարյանն է: «Տեսահոլովակի միտքն իրենն է, ես գիտեի, որ նա ըմբռնմամբ կմոտենա հարցին, չի անի ուղղակի անելու համար: Հովհաննեսը խորը տղա է, գիտեի, որ շարքային, հերթական տեսահոլովակ չի լինի: Նկարահանման օրն ուղղակի կատարողի դերում եմ եղել, ամեն ինչ թողել եմ Հովհաննեսի ձեռքերում: Դա ինձ համար բացառություն է, որովհետև նախկինում իմ բոլոր տեսահոլովակների նկարահանումների ժամանակ շատ ֆունկցիաներ եմ իրականացրել»,- նշեց Էվան:

Երգչուհին նաև նկատեց, որ պատերազմը ծանր էր բոլորիս համար, մոտ մեկ տարի է՝ փորձում ենք այդ իրավիճակից դուրս գալ:

«Նկատում եմ, թե որքան են մարդիկ, ես փոխվել: Հույսս չեմ կորցնում, որ լավ կլինի, բայց նկատում եմ՝ առաջվա պես ոչինչ չի լինի, ոչ ոք չի լինի: Պետք է հնարավոր ամեն կերպ փորձենք վերականգնվել: Ինքս երգը կատարելուց առաջ ու հետո ներքին փոփոխություններ եմ զգում: Խաղաղված ու հանգիստ եմ, որովհետև 3-4 ամիս քնել ու արթնացել եմ երգի շուրջ մտածելով»,- եզրափակեց նա: