Սկանդալ է հասունանում

1in.am

Եվրասիական միության գագաթնաժողովներում նման սկանդալ դեռ չէր եղել։ Այս անգամ գագաթնաժողովն անցել է Սանկտ Պետերբուրգում, առանցքային թեման Մաքսային օրենսգրքի ստորագրումն էր՝ փաստաթուղթ, որը կարգավորում է մաքսային հարաբերությունները ԵՏՄ տարածքում՝ գրում է Gazeta-ն։

Սկզբում փաստաթուղթը ստորագրել են հինգ երկրներից երեքը՝ Ռուսաստանը, Ղազախստանը, Հայաստանը, իսկ Ղրղըզստանը հրաժարվել է հաստատել փաստաթուղթը։ Ղրղըզստանի նախագահ Ալմազբեկ Աթամբաևը հայտարարել է, որ բացասական պահերը ժամանակ առ ժամանակ գերակշռում են ԵՏՄ երկրների համագործակցությունում, ինչը բացասաբար է ազդում հանրապետության ինտեգրման վրա։ Ավելի ուշ Աթամբաևը հաստատել է Մաքսային օրենսգիրքը, սակայն չի ստորագրել հայտարարությունը՝ ներքին տնտեսական համատեղ գործունեություն մշակելու վերաբերյալ։

Ենթադրվում է, որ ԵՏՄ Մաքսային օրենսգիրքն ուժի մեջ կմտնի 2017թ. հուլիսի 1-ից։

Լուկաշենկոն զբաղված էր

Արդյունքում Եվրասիական միության հինգ անդամներից չորսը համաձայնեցրել են Մաքսային օրենսգիրքը։ Սակայն եվրասիական ինտեգրմանն ամենամեծ հարվածը հասցրել է Բելառուսի նախագահ Ալեքսանդր Լուկաշենկոն։ Նա ցուցադրաբար չմասնակցեց գագաթնաժողովին և մնաց Մինսկում։

Լուկաշենկոն պաշտոնական մեկնաբանությամբ հանդես չի եկել։ Ստիպված է եղել մեկնաբանել ընդունող կողմը։ ՌԴ նախագահի մամուլի խոսնակ Դմիտրի Պեսկովը հայտարարել է, որ Բելառուսի նախագահի բացակայությունը դե-ֆակտո «չի խանգարի քննարկել սուբստանտիվ հարցեր՝ կապված ինտեգրացիայի հետ»։

Ամենայն հավանականությամբ, Լուկաշենկոն որոշ ժամանակ անց կհամաձայնեցնի օրենսգիրքը։

«Լուկաշենկոյի հավակնություններն անխուսափելի են, քանի որ Բելառուսի նախագահը հիանալի գիտակցում է իր առավելությունը. նրա երկիրը սահմանակցում է Եվրամիությանը, ՆԱՏՕ-ի երկրներին և խնրահարույց Ուկրաինային»,- ասում է Եվգենի Մինչենկոն՝ Քաղաքական միջազգային փորձագիտական ինստիտուտի տնօրենը։

Այս անգամ վտանգված են ռուսական նավթի և գազի մատակարարումները Բելառուս։ Մինսկը կարծում է, որ ռուսական գազի արդարացի գինը 73 ԱՄՆ դոլար է՝ 1 խմ գազի դիմաց։ Մինսկում պնդում են, որ գազի բարձր գնի պատճառով բելառուսական ապրանքները կորցնում են մրցունակությունը ռուսական շուկայում, ինչը հակասում է ԵՏՄ-ի սկզբունքներին։ Ռուսաստանը համաձայն չէ դրա հետ։

Դժգոհ են բոլորը

Փորձագետների կարծիքով՝ Եվրասիական միության երկրներից յուրաքանչյուրը հավակնություններ է կուտակել Ռուսաստանի և եվրասիական գաղափարի հանդեպ։ Եվրասիական միության հանդեպ ամենաքիչ հավակնություններն ունի Հայաստանը, որը զգալի տնտեսական տարաձայնություններ չունի ՌԴ-ի հետ։

«Գլխավորը, ինչ ստացել է Հայաստանը ԵՏՄ-ի հետ անդամակցությունից, անվտանգության երաշխիքներն են հարևան Ադրբեջանի հետ ձգձգված հակամարտությունում և Լեռնային Ղարաբաղի ստատուս քվոյի պահպանումը»,-ասում է Ալեքսեյ Պորտանսկին՝ Ռուսաստանի «Տնտեսագիտության բարձրագույն դպրոց» Ազգային-հետազոտական համալսարանի համաշխարհային տնտեսության և համաշխարհային քաղաքականության ֆակուլտետի առևտրային քաղաքականության ամբիոնի ղեկավար, պրոֆեսորը:

Այնպես որ՝ պետք չէ սպասել, որ Հայաստանն առաջիկայում դեմարշ կանի, ինչպես Բելառուսը։ Եթե հերթական անգամ չսրվի իրավիճակը Ղարաբաղում՝ ասվում է հոդվածում։

Gazeta-ն գրում է նաև, որ Չինաստանի փաստն իր ազդեցությունն է թողնում նաև Ռուսաստանի և Ղազախստանի հարաբերությունների վրա։ Չինաստանն ավելի շատ ներդրումներ է անում Ղազախստանում, քան Ռուսաստանում. այս առումով երկու երկրները մրցակից են՝ փաստում է Պորտանսկին։