Ինչի՞ են ձգտում Պուտինն ու Ալիևը

«Ադրբեջանն այս քայլով ցույց է տալիս, որ չի հրաժարվում ղարաբաղյան հակամարտությունը ուժային ճանապարհով լուծելու մտքից ու շարունակելու է թշնամանքը Հայաստանի ու հայ ժողովրդի նկատմամբ»,-«Առաջին լրատվական»-ի հետ զրույցում անդրադառնալով՝ հայ-ադրբեջանական սահմանի լարվածությանը, հակառակորդի կողմից դիվերսիոն ներթափանցման փորձին, (ինչի արդյունքում հայկական կողմը ունի երեք զոհ) ասաց ՄԱՀՀԻ-ի ասոցացված փորձագետ Ռուբեն Մեհրաբյանը:

Փորձագետը հատկանշանական է համարում այն հանգամանքը, որ այս հարձակումը տեղի ունեցավ ընդամենը ՀԱՊԿ գագաթաժողովից օրեր անց, երբ հիշեցնենք, Հայաստանի ներկայացուցիչը կրկին չստանձնեց գլխավոր քարտուղարի պաշտոնը. «Ադրբեջանը ցույց է տալիս, որ ունենալով այն հարաբերությունները Ռուսաստանի հետ, որ նա ունի այսօր՝ իրեն բավարար է, որ ձեռնարկի ցանկացած գործողություն իր ուզած ժամանակ՝ Հայաստանին դնելով իր դիրքերի համար նվաստացուցիչ պայմաններում՝ հաշվի առնելով այս ամենի ռազմաքաղաքական և անվտանգության կոնտեքստը»:

Հետաքրքվեցինք, այս դեպքում, երբ հակառակորդի կողմից ագրեսիա է տեղի ունենում անմիջապես Հայաստանի սահմանին, ըստ կանոնադրության ի՞նչ պետք է ձեռնարկեր ՀԱՊԿ-ը և արդյոք սա հիմք չէ այդ կազմակերպությանը դիմելու համար.«Պատկերացնու՞մ եք՝ ասենք այս գիշեր Ռուսաստանը Էստոնիայի սահմանի վրա դիվերսիոն ներթափանցման փորձ աներ: Գիտե՞ք ինչ հայտարարություններ կհետևեին Բրյուսելից, Վաշինգտոնից, այլ մայրաքաղաքներից: Գիտե՞ք ՆԱՏՕ-ի զորքերի ինչ տեղաշարժ կլիներ ամբողջ եվրոպական մայրցամաքում, երբ ՆԱՏՕ-ի անդամ պետության սահմանը խախտվեր: Այս ամենը կլիներ առանց Էստոնիայի հայտարարությանը սպասելու»,-ասում է փորձագետը:

Իսկ ինչո՞ւ մեր դեպքում այդպես չէ և մենք չենք կարողանում հարաբերություններն այդ կազմակերպության անդամ պետությունների հետ դնել նույն մակարդակի վրա, հարցին ի պատասխան էլ Ռուբեն Մեհրաբյանն ընդգծեց. «Դա նշանակում է, որ ՀԱՊԿ կոչվածը կապիկների հավաքածու է, իրենից ոչինչ չի ներկայացնում: Դա ֆեյք կազմակերպություն է, ո՛չ հավաքական է, ո՛չ անվտանգություն է, ո՛չ պայմանագիր է, ոչ էլ կազմակերպություն է: Դա ընդամենը Ռուսաստանի կողմից Հայաստանի վրա հագցրած զսպաշապիկ է՝ Հայաստանի թևերը բռնելու և Ադբեջանին մեր վրա հարձակվել տալու համար»:

Առայժմ Հայաստանի ԱԳ նախարարության կողմից ոչ մի հայտարարություն չկա. «Ես այնուամենայնիվ հույս ունեմ, որ այդ հայտարարությունը կլինի, ԱԳՆ-ը կդիմի Մինսկի խմբի անդամ երկրներին՝ կներկայացնի ապացույցներ, որ այս խախտումը տեղի է ունեցել հենց Ալիևի ռեժիմի կողմից: Եվ կպահանջի այս դիվերսիայի համար Ալիևին պատասխանատվության ենթարկել՝ բոլոր հնարավոր միջոցներով:

Ոմանք չափազանց շնորհակալ են Ռուսաստանին իր զսպող դերի համար՝ հիմա թող նորից չափեն կա՞ արդյոք զսպող դերը, քանի՞ կոպեկ արժի այդ զսպող դերը»: