Ոստիկանությունը 12-ամյա հղի աղջնակին բաժանել է ամուսնուց

Եկատերինբուրգում հիվանդանոց է տեղափոխել 12-ամյա հղի աղջիկ՝ գնչուական թափառախմբից։ ՌԴ ՔԿ քննիչները քրեական գործ են հարուցել ՌԴ ՔՕ 131 հոդվածի 4 մասով «Սեռական հարաբերություն 14 տարեկանը չլրացածի հետ՝ օգտվելով վերջինիս անօգնական վիճակից» ։

Աղջկան հիվանդանոց էին տեղափոխել ծանր վիճակում։ Ոչ նա, ոչ նրա 16-ամյա «ամուսինը»՝ Պետրոն, փաստաթուղթ չունեին։ «ՌԻԱ Նովոստիի» փոխանցմամբ առաջին օգնությունը ցուցաբերելուց հետո բժիշկները միանգամից դիմել են ոտիկանություն։

Պարզվել է, որ իր ապագա ամուսնու հետ Լաուրան ծանոթացել է 10 տարեկանում։ Նա Օմսկից էր Եկատերինբուրգ եկել ՝ հորաքրոջն այցելության։ Իսկ երբ 14-ամյա գնչու տղան սիրահարվել է աղջկան, նրանք որոշել են ամուսնանալ, ընդ որում ծնողների համաձայնությամբ։ Մեկուկես տարի առաջ նրանք գնչուական ավանդույթներով հարսանիք են տոնել ու սկսել են ապրել միասին տղայի ծնողների հետ։ Մեկուկես տարի հետո էլ որոշել են, որ ժամանակն է երեխայի մասին մտածել։ Լաուրան հիվանդանոց էր տեղափոխվել սուր ցավերով ու գիտակցության կորուստով, պարզվել է, որ նա արդեն 18 շաբաթական հղի է։

Աղջկան հիվանդանոցից տարել են քաղաքացիական կենտրոն, որտեղ ընտանեկան բռնության ենթարկված կանայք ու երեխաներ են։ Այնտեղ 12-ամյա ապագա մայրը կմնա մասնագետների մշտական հսկողության տակ։

Գնչուների թափառախումբը եկել է ոստիկանություն ու պահանջել իրենց վերադարձնել աղջկան։ Նրանց ղեկավար Յան Սոկոլն ասում է, որ զույգը շատ երջանիկ է եղել, քանի դեռ Լաուրային չէին հանձնել սոցիալական խնամակալության մարմիններին։

Լաուրան նույնպես վստահեցնում է քննիչներին, որ ինքն ամուսնացած է իր հոժար կամքով եւ հղիացել է նույնպես իր ցանկությամբ։

Այս շաբաթ Պետրոյի ծնողները նրան երկրից դուրս են հանել, վախենալով քրեական հետապնդումից։