Ավարտվել է 16-ամյա տղայի սպանության գործի նախաքննությունը. դանակահարողը կալանավորված է

ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում ավարտվել է 16-ամյա Հայկ Ասիրյանի սպանության դեպքի առթիվ հարուցված քրեական գործի նախաքննությունը, քրեական գործն ուղարկվել է դատարան:

Ավելի վաղ տեղեկացրել ենք, որ 2016 թվականի հունիսի 30-ին «Արմենիա» ՀԲԿ-ից ահազանգ է ստացվել առ այն, որ իրենց մոտ բուժօգնության են տեղափոխվել 16-ամյա Հայկ Ասիրյանը, նրա եղբայրը՝ 28-ամյա Ա. Ասիրյանը եւ 26-ամյա Ռոբերտ Սահակյանը:

ՀՀ Քննչական կոմիտեից հայտնում են, որ հուլիսի 1-ին՝ ժամը 00:15-ի սահմաններում, 16-ամյա Հայկ Ասիրյանը, գիտակցության չգալով, մահացել է:

Դեպքի առթիվ Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում հարուցված քրեական գործով ձեռնարկված անհետաձգելի քննչական գործողությունների արդյունքում պարզվել է, որ Ասիրյան եղբայրները մարմնական վնասվածքներն ստացել են Ռ.Սահակյանի հետ տեղի ունեցած վիճաբանության ժամանակ:

Քննությամբ հիմնավորվել է, որ 2016 թ. հունիսի 30-ին՝ ժամը 22:00-ի սահմաններում, Երեւանի Հույսի ավան թաղամասում Ռ.Սահակյանը, մոտեցել է Սահակ Ասիրյանին, եւ անձնական հարցերի շուրջ վիճաբանություն է առաջացել Ասիրյան ավագ եղբայրների եւ Ռ.Սահակյանի միջեւ։ Վերջինիս ձեռքին տեսնելով դանակ՝ նրանց է միացել նաեւ կրտսեր Ասիրյանը եւ փորձել օգնել եղբայրներին, որի ժամանակ էլ Ասիրյան եղբայրներից երկուսը դանակահարվել են, վնասվածքներ է ստացել նաեւ Ռ.Սահակյանը։ Տուժած 2 եղբայրներին երրորդ եղբայրը ընկերոջ ավտոմեքենայով տեղափոխել է բժշկական կենտրոն, որտեղ կրտսեր Ասիրյանը, գիտակցության չգալով, մահացել է։

Մինչդատական վարույթում ձեռք բերված բավարար ապացույցների համակցությամբ՝ Ռ.Սահակյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 1-ին եւ 10-րդ կետերով, 235-րդ հոդվածի 4- րդ մասով: Նրա նկատմամբ որպես խափանման միջոց է ընտրվել կալանավորումը:

Նախաքննությունն ավարտվել է եւ քրեական գործը՝ մեղադրական եզրակացությամբ, ուղարկվել է դատարան: