Նպատակս որակյալ երաժշտություն մատուցելն է, որը կկարողանա փոխել մարդկանց ճաշակը․ Էմանուել Հակոբյան

Որոշ ժամանակ առաջ երաժիշտ, գործիքավորող Eman-ը (Էմանուել Հակոբյան) ռեփեր Նարեկ Մեծ Հայքի և DJ Smoke-ի հետ համատեղ ներկայացրեց հայտնի «Շոգա» երգի 2-րդ մասը։

Newsarm.live-ը զրուցել է Էմանուելի հետ՝ երգի շարունակության գաղափարի, ստեղծման և գրանցած հաջողության մասին․

«Թեև «Շոգա»-ի պրեմիերայից արդեն երկար տարիներ են անցել, բայց, միևնույնն է, այն շարունակում է մնալ մեր երգարվեստի ամռան գլխավոր հիթերից։ Եվ հենց այս պատճառով  անկեղծ կլինեմ ու կասեմ, որ սկզբում վախ ունեինք, որ 2-րդ մասը գուցե այդքան հաջողություն չունենա։ Սակայն ի ուրախություն մեզ՝ այդպես չեղավ»,- ասաց Էմանուելը՝ մանրամասնելով․

«Գրեթե մեկ տարի փորձում էինք այն վերջնական տեսքի բերել։ Այն մի քանի անգամ փոփոխությունների է ենթարկվել, քանի որ սխալվելու իրավունք չունեինք։ Դատելով արձագանքներից՝ պետք է նշեմ, որ այն բավական դրական կարծիքների է արժանացել, ինչը, կարծում եմ, վկայում է այն մասին, որ մենք չենք հեռացել «Շոգա»-ից»,- ասաց Էմանուել Հակոբյանը։

Վերջինս նաև տեղեկացրեց, որ շատ շուտով հանրության դատին է հանձնելու իր նոր՝ թվով երրորդ անհատական աշխատանքը․

«Այս աշխատանքի գաղափարն ինձ մոտ առաջացել է, երբ ականատես եղա մի տեսարանի։ Այն իրենից ներկայացնում է փոքրիկ պատմություն՝ իր սկզբով, ընթացքով և հանգուցալուծումով։ Ստեղծագործության հիմքում ջութակի ելևէջներն են, այն Oriental Deep House ոճի մեջ է, ինչի շնորհիվ ունկնդիրը կտեղափոխվի այն աշխարհ, որն այդ պահին իր երևակայությունը թույլ կտա։ Արել եմ այնպես, որ  յուրաքանչյուրն այս ստեղծագործությունը լսելիս ունենա իրեն հատուկ զգացողություն, այսինքն՝ երևակայելու հնարավորություն»,-  պատմեց երաժիշտը։

«Որպես մասնագետ՝ իմ առաջնային նպատակը որակյալ երաժշտություն մատուցելն է, որը ոչ միայն ճաշակով կլինի, այլև կկարողանա փոխել մարդկանց ճաշակը, երաժշտության հետ կապված պատկերացումները, վերջ ի վերջո, ինչ-որ առումով նոր, բարձր ցուցանիշ կսահմանի՝ հազարավոր հայկական երգերի մեջ։ Հատկապես իմ անհատական կարիերայի դեպքում կարելի է ասել, որ ծայրահեղ բծախնդիր եմ դառնում, ինչը շատ դեպքերում՝ նույնիսկ ինձ խանգարում է։ Երբ ամեն ինչ ուզում ես կատարյալ անել, միշտ ձգտել ավելի լավին, շատ հաճախ նաև խճճվում ես այդ ամենի մեջ, և դա սկսում է իրոք քեզ խանգարել»,- մեզ հետ զրույցում եզրափակեց Էմանուել Հակոբյանը։