Աշխարհահռչակ մարդիկ, որոնք հեռացան մեզնից 2016 թվին

Ալան Ռիքման (ծնվել է 1946-ի փետրվարի 21-ին) - բրիտանացի դերասան, ռեժիսոր: 1996-ին «Ռասպուտին» ֆիլմում խաղացել է գլխավոր դերը, որի համար ստացել է «Ոսկե գլոբուս» և «Էմմի» մրցանակներ: Ռիքմանի երկրպագուներից շատերը նրա հաջողության ամենակարևոր մասը համարում են ձայնը: Արտասովոր ձայներանգից բացի, դերասանը կատարյալ անգլիական առոգանության էր տիրապետում և յուրահատուկ խոսելաձևի: Մահացել է ենթաստամոքսային գեղձի քաղցկեղից:

Դևիդ Բոուի, Դևիդ Ռոբերտ Ջոնս (ծնվել է 1947-ի հունվարի 8-ին)- բրիտանացի ռոք երգիչ և երգերի հեղինակ: 50 տարի զբաղվել է երաժշտական գործունեությամբ և իմիջը հաճախ է փոխել՝ նրան «ռոք երաժշտության քամելեոն» են անվանել: Վախճանվել է լյարդի քաղցկեղից:

ՈՒմբերտո Էկո (ծնվել է 1932 -ի հունվարի 5-ին) - իտալացի գիտնական, փիլիսոփա, նշանագիտության և միջնադարյան գեղագիտության մասնագետ, գրող:
Զբաղվել է միջնադարյան և ժամանակակից գեղագիտության, զանգվածային մշակույթի ուսումնասիրմամբ, մշակել է նշանագիտության սեփական տեսություն: Նրա համար առանցքային խնդիրներից մեկը մեկնությունն էր՝ ընթերցողի և հեղինակի փոխհարաբերությունները: Վախճանվել է ենթաստամոքսային գեղձի քաղցկեղից:

Հարփեր Լի (ծնվել է 1926-ի ապրիլի 28-ին)- ամերիկացի գրող, «Սպանել ծաղրասարյակին» վեպի հեղինակը: Արժանացել է ԱՄՆ-ի քաղաքացիական բարձրագույն պարգևին՝ Ազատության նախագահական շքանշանին: Կյանքի 90-րդ տարում՝ փետրվարի 19-ի առավոտյան մահացել է քնած ժամանակ: Երբեք ամուսնացած չի եղել և երեխաներ չի ունեցել:

Իմրե Կերտես (ծնվել է 1929-ի նոյեմբերի 9-ին) - հունգարացի գրող, 2002-ի գրականության Նոբելյան մրցանակի դափնեկիր: Օսվենցիմ և Բուխենվալդ համակենտրոնացման ճամբարների կալանավոր: Այս փորձն է եղել Կերտեսի ստեղծագործությունների հիմքում: Առավել հայտնի են Կերտեսի երկու վեպերը՝ «Առանց ճակատագրի» և «Կադեշ չծնված երեխայի համար»: Տառապել է Պարկինսոնի հիվանդությամբ:

Զահա Մոհամմադ Հադիդ (ծնվել է 1950-ի հոկտեմբերի 31-ին)- արաբական ծագմամբ իրաքա-բրիտանացի ճարտարապետ և դիզայներ, դեկոնստրուկտիվիզմի ներկայացուցիչ: 2004-ին դարձել է պատմության մեջ առաջին կին ճարտարապետը, որ պարգևատրվել է Պրիցկերի մրցանակով: Բրիտանական կայսրության Կին Կոմանդորի շքանշանակիր է: Մահացել է Մայամիում՝ սրտի տագնապից:

Փրինս Ռոջերս Նելսոն (ծնվել է 1958-ի հունիսի 7-ին)- ամերիկացի երաժիշտ, երգիչ, ականավոր կիթառահարներից մեկը (Rolling Stone ամսագրի ցուցակում 33-րդը): Նա հանդես է եկել Փրինս անունով: «Գրեմմի» մրցանակի յոթակի դափնեկիր է, «Օսկարի» և «Ոսկե գլոբուսի» դափնեկիր: 2004-ին Փրինսի անունը ընդգրկվել է ռոք-ն-ռոլի Փառքի դահլիճում: Մահացել է իր Փեյսլի պարկ կալվածքում: Մահվան պատճառը ֆենտանիլի պատահական գերչափաքանակն է, որը նա ընդունում էր կոնքազդրային հոդերի ցավերը մեղմելու համար: Մահվանից կես տարի առաջ նրա մոտ ՁԻԱՀ էր ախտորոշվել:

Մուհամմեդ Ալի, Կասիուս Մարսելուս Քլեյ (ծնվել է 1942-ի հունվարի 17-ին)- ամերիկացի բռնցքամարտիկ, հանդես է եկել ծանրքաշային կարգում: Համաշխարհային բռնցքամարտի պատմության մեջ ամենահայտնի բռնցքամարտիկներից մեկը: Կարիերայի ավարտից հետո եղել է ՅՈՒՆԻՍԵՖ-ի Բարի կամքի դեսպան (1998-2008): 30 տարի պայքարել է Պարկինսոնի հիվանդության դեմ, մահացել է հիվանդանոցում սեպտիկ շոկից:

Էլի Վիզել (ծնվել է 1928-ի սեպտեմբերի 30-ին)- ամերիկացի և ֆրանսիացի գրող: 1986-ի խաղաղության Նոբելյան մրցանակի դափնեկիր: Նացիստական Օսվենցիմ և Բուխենվալդ համակենտրոնացման ճամբարների կալանավոր: Ավելի քան 40 գրքի հեղինակ է: Նրա ստեղծագործությունների մեծ մասը Հոլոքոստին են նվիրված: 2014-ին Իսրայելի վարչապետ Բենիամին Նեթանյահուն փորձել էր Վիզելին համոզել առաջադրվել Իսրայելի նախագահ, սակայն նա հրաժարվել է: Վախճանվել է ԱՄՆ-ում՝ 88 տարեկանում:

Շիմոն Պերես (ծնվել է 1923-ի օգոստոսի 2-ին) - Իսրայելի 9-րդ նախագահն է: 11 գրքերի և արաբա-իսրայելական հակամարտության պատմության վերաբերյալ մեծ թվով հոդվածների հեղինակ է: 2008-ին ստացել է Բրիտանական կայսրության Մեծ խաչի ասպետի կոչում, Սուրբ Միքայելի և Սուրբ Գևորգի շքանշաններ: 1994-ի խաղաղության Նոբելյան մրցանակի դափնեկիրն է: ՈՒղեղում ընդգրկուն արյունազեղման հետևանքով կոմայի մեջ է ընկել, վախճանվել է սեպտեմբերի 28-ին: Մահվանից հետո դարձել է օրգանների դոնոր: Նրա եղջերաթաղանթը պատվաստվել է փոխպատվաստման սպասող հիվանդին:

Լեոնարդ Քոեն (ծնվել է 1934-ի սեպտեմբերի 21-ին)- կանադացի երգիչ և երգերի հեղինակ: Քոենի երգերի թեմաներն էին՝ կրոնը, միայնությունը, կիրքը, մարդկային բարդ հարաբերությունները: 2002-ի հոկտեմբերի 10-ից Կանադայի շքանշանի կոմպանյոն է, որը Կանադայի քաղաքացիների համար բարձրագույն պարգևն է: Մահացել է 82 տարեկանում, Լոս Անջելեսի իր տանը:

Ֆիդել Կաստրո (ծնվել է 1926-ի օգոստոսի 13-ին) - կուբացի հեղափոխական, պետական գործիչ, 1959-ից մինչև 2006-ին իշխանությունը եղբորը հանձնելը՝ 47 տարի ղեկավարել է Կուբան: Կաստրոն Գինեսի ռեկորդների գրքի մեջ է մտել՝ ողջ մնալով 100 մահափորձերից հետո, որոնց թվում են եղել թունավորված սիգարը և պայթուցիկով բեյսբոլի գնդակը: Վախճանվել է նոյեմբերի 25-ին աղիների ծանր հիվանդության հետևանքով:

Ջորջ Մայքլ, Յորղոս Կիրիակոս Պանայոտու (ծնվել է 1963-ի հունիսի 25-ին)։ Ծագումով հույն բրիտանացի երգիչ է։ Երաժշտական կարիերան սկսվել է 1981-ին, երբ դպրոցական ընկերոջ՝ Էնդրյու Ռիջլիի հետ ստեղծեց The Executives խումբը, որ չկարողացավ հաջողության հասնել, և այդ ժամանակ Մայքլն ու Ռիջլին որոշեցին հանդես գալ Wham! դուետով։ Մենակատարի և դուետի կազմում իր կարիերայի ընթացքում վաճառել է երգերի 100 մլն օրինակ։ «Գրեմմիի» կրկնակի մրցանակակիրը մահացել է 53 տարեկանում դեկտեմբերի 25-ին Օքսֆորդշիրի իր տանը սրտային անբավարարությունից։