«Միսս Տիեզերք Արմենիա» և «Միսս Աշխարհ Արմենիա» գեղեցկության մրցույթների ցուցադրությունը, որի ժամանակ ժյուրին ընտրել է հաղթողներին

EXCLUSIVE

Այս օրերին Երևանում ընթանում են «Միսս Տիեզերք Արմենիա 2021» և «Միսս Աշխարհ Արմենիա 2021» գեղեցկության մրցույթները։ Աղջիկներն արդեն մասնակցել են ցուցադրությանը, և ժյուրին կատարել է իր ընտրությունը։ Հաղթողների անունները կհայտարարվեն վաղը՝ սեպտեմբերի 22–ին։

Ցուցադրությունը փակ է եղել, Tert.am Life–ը բացառիկ կարգով ներկայացնում է ցուցադրության լուսանկարներն ու  մանրամասները։

Այս տարի մրցույթն ընթանում է այլ ձևաչափով։ Նախ` կայացավ շոուն, որի ժամանակ աղջիկները ներկայացել են  ցուցադրություն 3 look–ով՝ սպորտային, կոկտեյլային և երեկոյան հագուստով։ Ժյուրիի անդամները նաև հարց ու պատասխան ունեցան աղջիկների հետ նրանց ավելի լավ ճանաչելու համար։ Վաղը կկայանա թագադրման արարողությունը, սակայն թագադրումից առաջ կցուցադրվի աղջիկների մասին պատմող ֆիլմ։

Այս տարի տիտղոսի համար պայքարում է 20 աղջիկ․ 15–ը՝ «Միսս Տիեզերք Արմենիա 2021», 19–ը՝  «Միսս Աշխարհ Արմենիա 2021»-ի համար, քանի որ միջազգային մրցույթների չափանիշները տարբեր են։ «Միսս Տիեզերք»–ին կարող են մասնակցել 18–28 տարեկան աղջիկները, «Միսս Աշխարհ»–ին՝ 17–26։

Ըստ «Միսս Արմենիա» համահայկական մշակութային հիմնադրամի նախագահ Գոհար Հարությունյանի՝ այսպիսի ձևաչափը հնարավորություն կտա ավելի լավ ճանաչելու աղջիկներին։

«Արդեն երկու տարի է՝ մշակում ենք մի ձևաչափ, որով կարող ենք ավելի շատ ներկայացնել մեր աղջիկներին՝ իրենց անցյալը, նպատակները, երազանքները, ինչպես են այդ երազանքները կապում մեր մրցույթի հետ: Մեր աղջիկները կրթված են, շատերը մեծ հաջողությունների են հասել բիզնեսում: Պարզապես ցույց տալ նրանց բեմի վրա քայլելուց, մեր կողմից սխալ կլիներ, որովհետև հասարակությունը չի տեսնում, թե ինչպիսի աղջիկներ են մասնակցում, ինչպիսի ներաշխարհ ունեն, որքանով են արժանի կանգնելու մյուս երկրների գեղեցկուհիների կողքին և մրցել: Դա է պատճառը, որ մենք հիմա մեր աղջիկների մասին վավերագրական ֆիլմ ենք նկարում»,- ասաց Գոհարը։