10 կանոն, որոնք կօգնեն ձեզ՝ երջանիկ լինել

1. Կազմակերպված եղեք

Եթե կարողանաք ճիշտ կազմակերպել ձեր օրը, ձեզ ավելի հանգիստ եւ վստահ կզգաք: Օգտակար խորհուրդ. ամենաբարդ եւ աշխատատար խնդիրներն առավոտյան լուծեք: Եթե դրանք հետաձգեք, ամբողջ օրը կզգաք այդ բեռը, իսկ դա ոչ ոքի չի երջանկացնի:

2. Աշխատեք ձեր ունակությունների վրա եւ նորերը ձեռք բերեք

Դրա համար ավելի լավ տեղ ու վայր չկա, քան հիմա եւ այսօր: Պետք չէ հատուկ, կատարյալ օրվա սպասել՝ կիթառ նվագել կամ իսպաներեն խոսել սովորելու համար: Այդպես ավելի արագ շարժառիթ կունենաք անելու այն, ինչի մասին երազում եք տարիներ շարունակ:

3. Ընկերների հետ գործարք կնքեք

Եթե հենց հիմա գումար չունեք երաժշտական գործիքի համար կամ դասընթացներին գրանցվելու համար դեռ մեկ ամիս ժամանակ կա, դա մի օգտագործեք՝ որպես ոչինչ չանելու արդարացում: Հավանաբար, ձեր ընկերներից ինչ-որ մեկը կիթառ ունի, որը տանն անգործ մի կողմ է նետված: Կամ ձեր ծանոթներից մեկը փայլուն օտար լեզու գիտի: Դիմեք նրանց օգնությանը եւ առաջարկեք փոխարենն ինչ-որ բան անել:

4. Կարդացեք, կարդացեք ու նորից կարդացեք

Գիրք կարդացեք, ընդ որում՝ կարեւոր չէ, թե ինչ ժանրի: Հնարավորինս շատ կարդացեք: Գրքերն օգնում են ընդլայնել աշխարհայացքը, ստիպում են մտածել, փորձ են փոխանցում, որը հավիզ թե ստանաք առօրյա կյանքում: Եթե չգիտեք՝ ինչից սկսել, սկսեք Նոբելյան դափնեկիրներից:

5. Ամեն օր վարժություններ արեք

Ամենամեծ սխալն այդ վարժությունները որպես տհաճ, տանջալից բան ընկալելն է: Դուք չպետք է ծաղրեք ինքներդ ձեզ եւ ֆիզիկապես այնքան ծանրաբեռնեք, որ չկարողանաք հաջորդ օրը վեր կենալ մահճակալից: Չափավոր քանակությամբ ամենապարզ վարժություններն արեք: Վարժությունները որպես հետաքրքիր հոբբի ընկալեք, այլ ոչ պարտականություն: Եվ մեկ-երկու շաբաթ անց ֆիզիկական վարժությունների հանդեպ ձեր վերաբերմունքը կփոխվի դեպի լավը:

6. Վնասակար սննդի փոխարեն ձեր նախընտրած մրգերն ու բանջարեղենը կերեք

Այո՛, այս խորհուրդը հազարավոր անգամներ եք լսել, եւ այն ամենեւին էլ ինքնատիպ չէ, բայց դրանից այն պակաս կարեւոր չի դառնում: Սնունդը կարող է կա՛մ օգտակար լինել ձեր մարմնին, կա՛մ վնասել: Եվ երբ վարժվեք չիփսի փոխարեն միրգ ուտել, անմիջապես կզգաք տարբերությունը:

7. Խմբակային պարապմունքների գնացեք

Օրինակ՝ ֆիթնես: Ձիգ կազմվածքով եւ աշխույժ մարզիկն ու համախոհների խումբը սպորտով զբաղվելու լավագույն շարժառիթն են: Եթե կարող եք ձեր ընկերոջը համոզել միասին պարապել, ավելի լավ: Երկուսով ավելի քիչ կծուլանաք եւ կկարողանաք աջակցել միմյանց:

8. Հոգ տարեք ձեր հարազատների մասին

Որքան ժամանա՞կ եք անցկացնում ձեր ամուսնու կամ կնոջ եւ երեխաների հետ: Ինչ էլ լինի ձեր պատասխանը, միեւնույն է, դա բավարար չէ: Հատկապես ժամանակակից աշխարհում, երբ երկու ծնողներն էլ աշխատում են եւ իրենց երեխաներին տեսնում օրական մեկ-երկու ժամ, քնելուց առաջ: Միասին ավելի շատ ժամանակ անցկացրեք, սատարեք միմյանց: Ավելի ակտիվ մասնակցություն ունեցեք ձեր երեխաների կյանքում: Իսկապես միասին ապրեք, այլ ոչ թե համատեղ ընթրիք կազմակերպեք:

9. Գովաբանեք մարդկանց

Շրջապատին երջանիկ դարձնելով՝ ինքներդ էլ կսկսեք ավելի լավ զգալ: Հատկապես եթե հաճելի բաներ ասեք մարդկանց, որոնք ձեզ համար միեւնույն չեն եւ որոնք մասին հոգ եք տանում: Երջանկությունը վարակիչ է: Արտահայտեք ձեր երախտագիտությունը: Եթե տեսնում եք, որ ինչ-որ մեկն իրեն լավ է դրսեւորում որեւէ գործում, ուշադրություն դարձրեք դրան եւ ասեք այդ մասին. կբարձրանա ե՛ւ ձեր, ե՛ւ նրա տրամադրությունը:

10. Ժպտացեք

Ավելի շատ եւ հաճախ ժպտացեք: Երբ ժպտում եք, օրգանիզմը սկսում է էնդոֆրին՝ երջանկության հորմոն արտադրել, եւ կյանքի հանդեպ վերաբերմունքն ավելի լավ է լինում: Բացասական էմոցիաները չեն օգնի հաղթահարել խնդիրները, հակառակը, միայն կխանգարեն ձեզ: Ժպիտով ձեզ ավելի լավ կզգաք, իսկ մարդիկ կսկսեն ի պատասխան ժպտալ: