Մենչի, Լիլուի, Մոսոյի և Նոնայի մասնակցությամբ «Չամադան» ներկայացման պրեմիերան ԱՄՆ–ում

Արմեն Պետրոսյանը՝ Մենչը, Լիլուն, Մոսո Կարապետյանն ու Նոնա Գրիգորյանը Լոս Անջելեսում բնակվող հայերի համար խաղացել են «Չամադան» ներկայացումը։ Մենչը պրեմիերայի լուսանկարները տրամադրել է Tert.am Life–ին ու պատմել նախագծի մանրամասները։

Մեկուկես ժամ տևողությամբ ներկայացման գաղափարը Մենչինն է։ Նա նաև ներկայացման  պրոդյուսերն է։ Սցենարը գրել են Վահան Մովսիսյանն ու Սարգիս Կալպակյանը, բեմադրել է Վահագն Գրիգորյանը։

«Սցենարը խմբագրեցի, բայց փորձերի ընթացքում էլ որոշակի փոփոխություններ արեցինք մինչև ստացանք վերջնական տեսքը։ Մոտ մեկուկես ամիս ամեն օր փորձեր ենք արել»,– ասաց նա։

Անդրադառնալով դերասանական կազմի ընտրությանը՝ պրոդյուսերը նշեց․ «Մոսոյի հետ ի սկզբանե պայմանավորել էինք համատեղ նախագծով ներկայանալ։ Դերասանուհիներին ընտրել ենք ես, Մոսոն և Վահագնը։ Ամենակարևորը՝ չենք սխալվել։ Թե՛ Լիլուն, թե՛ Նոնան իրենց գործը փայլուն կատարեցին»։

Ներկայացումը կարևոր դեր է խաղացել դերասանի համար, որը մոտ երկուսուկես տարի է՝ բեմական որևէ գործով չէր ներկայացել, իսկ 2020 թվականի պատերազմից հետո առժամանակ նաև հեռուստատեսային նախագծերից էր հրաժարվել։

«2 ներկայացում ենք խաղացել, որոնք շատ լավ անցան։ Զգացողություններս աննկարագրելի են։ Բոլորս ևս մի անգամ հասկացանք, որ առանց բեմի մեր կյանքն ուղղակի անհնար է։ Զգացվում էր, որ հանդիսատեսը կարոտած է։ Մենք էլ ոչ պակաս մեր հանդիսատեսին էինք կարոտել,– ասաց նա ու ոգևորությամբ հավելեց, որ մտածում են այս ներկայացումը կրկին խաղալ ոչ միայն Լոս Անջելեսում, այլև Միացյալ Նահանգների այլ քաղաքներում։

«Նախատեսում եմ տարեսկզբին ներկայացումը խաղալ նաև Երևանում»,– եզրափակեց պրոդյուսերը։