Երևանում Սուրբ ծնունդի օրը 17-ամյա պատանին դաժանաբար սպանել է ընկերոջը

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Մարինե Մելքոնյանի նախագահությամբ ընթանում է Սուրեն Մ.-ի գործի դատական քննությունը:

Մեղսագրված արարքի կատարման ժամանակ Սուրենն անչափահաս է եղել՝ 17 տարեկան: Հիմա արդեն 18 է, ու դատարանում նրա օրինական ներկայացուցիչը՝ ծնողը, արդեն նրա կողքին չի նստում…

Սուրեն Մ.-ին մեղադրանք է առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:

Դեպքը տեղի է ունեցել անցած տարվա հունվարի 6-ին՝ Սուրբ Ծնունդի օրը: Ընդ որում՝ ասում են, թե սպանությունից առաջ աթեիզմի վերաբերյալ խոսակցություն է եղել տուժողի ու իրեն աթեիստ համարող ամբաստանյալի միջև…

Ըստ մեղադրանքի՝ 2016 թվականի հունվարի 6-ին, ժամը 20-ն անց 30-ի սահմաններում վիճաբանության ժամանակ Սուրեն Մ.-ն սուր կտրող-ծակող գործիքով բազմաթիվ հարվածներ է հասցրել Խաչիկ Ղ.-ի մարմնի տարբեր մասերին, ծանր վնասվածքներ է պատճառել՝ ձախ թոքի բազմաթիվ միջանցիկ ու կույր, սրտապարկի, սրտի ձախ փորոքի վնասումով, հեմոպնևմոթորաքսով, հեմոպերիտոնեումով, հեմոպերիկարդով զուգորդված…

Ստացած վնասվածքներից Խաչիկը 2016 թվականի փետրվարի 9-ին առանց գիտակցության գալու հիվանդանոցում մահացել է…

Ընդհանուր իրավասության դատարանը ամբաստանյալի շահերի պաշտպան Ա. Ոսկանյանի միջնորդությամբ նշանակել էր դատահոգեբուժական-դատահոգեբանական համալիր ստացիոնար փորձաքննություն:

Ամբաստանյալի հայրը ներկայացրել էր փաստաթղթեր, համաձայն որոնց՝ մինչև հանցավոր արարքի կատարումը Սուրեն Մ.-ի մոտ հայտնաբերվել էր վարքի ու հույզերի խառը խանգարում, նա ճանաչվել էր զորակոչի ոչ ենթակա անձ:

Նման պայմաններում նախաքննական մարմինը չէր նշանակել դատահոգեբուժական-դատահոգեբանական փորձաքննություններ, նաև՝ մերժել էր պաշտպանի միջնորդությունը՝ այդ փորձաքննությունները նշանակելու վերաբերյալ:

Մինչդեռ եթե անձի, հատկապես անչափահասի մոտ առկա էին վերը հիշատակված խնդիրները, նրա նկատմամբ դատահոգեբուժական-դատահոգեբանական փորձաքննություններ անցկացնելը, նրա մեղսունակության, ինչպես նաև արարքի կատարման պահին նրա հոգեկան վիճակի, նրա մոտ ֆիզիոլոգիական կամ պաթոլոգիական աֆեկտի առկայության վերաբերյալ հարցերի մասնագիտական պատասխանները ստանալը պետք է որ պարտադիր լինեին:

Այս գործով վկայություն կա, որ դեպքին նախորդող շրջանում տուժող Խաչիկ Ղ.-ն, ինչպես նաև սպանության ականատես վկա Աբել Բ.-ն զանգահարել ու խոսել են Սուրենի հետ:

Ըստ վերջինիս՝ իրեն հայհոյել են, վիրավորել, գումար կամ նվեր են պահանջել: Դրանից հետո դեպքի օրը իրենց ընկեր Վլադի տուն գնալու ճանապարհին, ըստ Սուրենի, Խաչիկն ու Աբելը շարունակել են իրեն վիրավորել, իսկ երբ հասել են Շախսուվարյան փողոցի ավտոտնակների մոտ, Խաչիկը քայլել է առջևից, Սուրենը՝ մեջտեղից, իսկ Աբելը՝ հետևից: Այդ ժամանակ, ըստ Սուրենի, ինքը մտածել է, որ եթե Խաչիկի ու Աբելի հետ գնա Վլադի ծնունդին, հնարավոր է՝ իրեն ծեծի ենթարկեն: Ինքը մոտեցել է Խաչիկին, ձեռքը դրել է նրա ուսին ու ասել է, թե պատրաստվում է հեռանալ, Վլադի տուն չի ուզում գնալ: Այդ ժամանակ, ըստ Սուրենի, Խաչիկը պտտվել ու իրեն մայր է հայհոյել, գրպանից էլ դանակ է հանել ու փորձել է իրեն հարվածել: Ինքը խլել է դանակը նրա ձեռքից ու դրանով հարվածներ է հասցրել Խաչիկին՝ չի հիշում, թե քանի անգամ: Երբ ուշքի է եկել, տեսել է, որ Խաչիկն արյունոտ ընկել է գետնին, իսկ Աբելը փախչում է: Այդ ժամանակ ինքն էլ է փախել…

Դատարանի նշանակած դատահոգեբուժական-դատահոգեբանական համալիր ստացիոնար փորձաքննությունը արդեն կատարվել է, ստացվել է եզրակացությունը: Համաձայն այդ եզրակացության՝ Սուրեն Մ.-ն ճանաչվել է մեղսունակ: Դեպքի պահին Սուրեն Մ.-ն աֆեկտի վիճակում չի եղել, այլ եղել է հուզական լարված վիճակում:

Ամբաստանյալի շահերի պաշտպանի միջնորդությամբ՝ հաջորդ դատական նիստին դատարան կհրավիրվեն ու փորձաքննության եզրակացությունների շուրջ կհարցաքննվեն դատական հոգեբույժն ու դատական հոգեբանը: