Քահանան հերքել է իրեն հասցեագրված մեղադրանքը

Տեր Կորյուն քահանա Մարտիրոսյանը հերքում է տեղեկությունն այն մասին, թե Երևանի Սբ Երրորդություն եկեղեցում 2016 թ. դեկտեմբերի 31-ին ինքը 50 000 դրամ է պահանջել պսակադրության կարգ կատարելու համար։

Տեր Կորյուն քահանա Մարտիրոսյանը Tert.am–ի խմբագրություն է ուղարկել հերքում, որում ասվում է.

«Սույն թվականի հունվարի 10-ին Tert.am լրատվական կայքում հրապարակվել է իմ (իմա՝ Տեր Կորյուն քհն. Մարտիրոսյան) մասին ստահոդ տեղեկություններ պարունակող մի գրություն: Հրապարակման մեջ ինձ ներկայացվում է Սուրբ Պսակի արարողությանը մասնակից հավատացյալներից գումար պահանջելու մեղադրանք:

Զերծ կմնամ երկարաշունչ շարադրանքից: Կարծում եմ, բավարար է անգամ արձանագրումը, որ ներկայացվածը հերյուրանք է և բացարձակապես կապ չունի իրականության հետ: Դրամի և առհասարակ նյութի նկատմամբ իմ վերաբերմունքն ավելին չէ, քան այն, ինչ որ սահմանված է Տիրոջ կողմից՝ Սուրբ Գրքի մեջ: Սա վկայված է նաև իմ ապրած կյանքով ու կենցաղով, որին տեղյակ են ինձ ճանաչող բոլոր մարդիկ: Այս առումով բացարձակապես մտահոգված չեմ ինձ վարկաբեկելու փորձերից:

Սույն հերքումը ներկայացնում եմ՝ բացառապես անսալով հավատավոր իմ հոտի անդամների հորդորներին՝ կանխարգելելու համար հետագա շահարկումները»։

Արարատյան Հայրապետական Թեմի տեղեկատվական բաժնի հոգևոր համակարգող Տեր Եսայի քահանա Արթենյանը Tert.am–ի հետ զրույցում նույնպես հերքեց տեղեկությունը, թե Տեր Կորյուն քահանա Մարտիրոսյանը գումար է պահանջել պսակադրության կարգ կատարելու համար։ «Նման բան չի կարող լինել։ Մենք պարզել ենք, որ նման բան տեղի չի ունեցել։ Տեր Կորյունը գումար չի պահանջել քաղաքացիներից»,– ասաց Տեր Եսայի քահանա Արթենյանը։